كان نفسي أطلع عربجي !!

كان نفسي أطلع عربجي !!

كان نفسي أطلع عربجي !! 17_1

هو العربجي ماله ! وحش في إيه ؟

يا تري عمرك اتمنيت تطلع عربجي..؟!

أنا اتمنيت.. وكنت فاكر إن الورق المطلوب علشان الواحد يبقي عربجي .. ورقه تثبت إن الواحد بيعرف ي
سوق حصان.. أو حمار.. بس أنا كان طموحي إني أبقي باسوق حنطور مش كارو .. كنت معجب جدا
بشكل الحنطور وخطوطه الانسيابية ولونه ودناديشه والكلاكس بتاعه اللي كان بيضربه العربجي برجله..
يا سلام علي شكل العربجي وهو متربع علي عرش الحنطور كده وماسك كرباجه في إيده ولا فتوات الحرافيش ..
حبيت أوي الحنطور والعربجي ..

لحد ما ابتديت أسمع جمل من ناس كان وجود لفظ العربجي فيها لا يدل علي إنه حاجة لطيفة.. زي مثلا:
«بلاش شغل العربجية ده».. «إنت شكلك قليل الأدب وعربجي»..
«ماتصاحبش الواد ده لحسن شكله كده عربجي».. «إنت إيه.. عربجي»..

ولا جملة سمعتها علي العربجي كانت تبشر بالخير أو تشجع إني أطلعه..
ردود الناس خلتني أسأل نفسي كتير، هو العربجي وظيفة ولا شتيمة؟ ولو هي شتيمة زي يا كلب
ويا حمار ويا صايع وكده.. يبقي الراجل اللي بيسوق الحنطور ده بيشتغل إيه؟! اسم شغلانته إيه؟!
ولما إجابتي دايما كانت بتقول إنه «عربجي»، قلت أسأل حد غيري.. بس غيرت السؤال من، هو العربجي
وظيفة ولا شتيمة؟ لـ هو العربجي ده حلو ولا وحش؟..

كلها كانت ردود وإجابات مش مقنعة بالمرة.. ناس قالولي طبعا مش حلو علشان طول النهار
بيبقي قاعد في الشارع.. أمال يقعد فين؟! في جروبي.. واللي يقول وحش طبعا لأنه قليل الأدب وبيشتم..
طب وهو مين مابيشتمش.. ما كله بيشتم.. وبغض النظر عن الجملة التربوية اللي هاكتبها دلوقتي
إن الشتيمة شيء سيئ وقبيح.. بس موجودة وبتحصل.. في سواقين ميكروباص بيشتموا وسواقين
تاكسيات بيشتموا.. وميكانيكية وسباكين ونقاشين بيشتموا ودكاترة ومهندسين بيشتموا.. وأعضاء مجلس
شعب بيشتموا.. ووزرا بيشتموا وأبهات وأمهات بيشتموا.. ولا الشتيمة بقي ليها ناس وناس..
ناس تشتم، فتبقي الشتيمة طالعه من بقهم زي العسل ودمهم خفيف أوي..
وناس تشتم تبقي شتيمهم وحشة وقولالات الأدب ..

مش عارف أنا محير نفسي ليه! ما أسأل صاحب الشأن.. سألت عربجي وقلتله هو إنت بتشتغل إيه لو سمحت؟
قالي أنا خريج آداب بس حاليا عربجي.. قولتله هي العربجة بتاخد آداب.. قالي لا وتجارة وعلوم وحقوق وزراعة.. كله.. أي حد خريج أي كلية ممكن يشتغل عربجي عادي.. المهم يبقي عنده حصان.. أو حمار..

موضوع العربجي ده كان شاغل تفكيري من زمان أوي .. من صغري تقريبا.. لما كنت باركب الحنطور سواء كنت راكب أو متشعبط ورا.. لدرجة إنه لما كان حد من الضيوف بيسألني نفسك تطلع إيه؟.. كنت برد بمنتهي الطموح والسعادة، وأقولهم: نفسي أطلع عربجي.. وكان كل اللي حواليا يضحكوا.. وكانت أمي تبصلي بصة..
كانت كبيرة علي إني أفهمها.. بس كان معناها بيوصلني.. نظرتها كانت بتقول: «إيه اللي إنت بتقوله ده؟»..
أنا مكنتش حاسس إني باقول حاجة عيب.. هو أنا مثلا قولت نفسي أطلع حمار.. أنا باقول عربجي..
ماكنتش عارف أمي بتبصلي كده ليه؟ وماكنتش فاهم الناس اللي حواليها ضحكوا ليه؟..

هو العربجي ماله! وحش في إيه؟.. وبعدين هو لو وحش.. ليه ماما كانت بتسيبني أقعد جنبه في الحنطور
وإحنا رايحيين لجدتي يوم الخميس.. ولما كنا بنروح الهرم.. كنت باشوف الأجانب واقفين بيتصوروا
جنب أبوالهول والأهرامات والعربجي.. يكونش الأجانب فاهمين قيمة العربجي وإحنا لأ!..

لأ مش جايز.. ده أكيد، لأني عمري ما شفت واحد مصري بيتصور جنب عربجي.. كنت هاموت
وأعرف ماما زغرتلي ليه؟.. والناس ضحكوا ليه ؟.. هي المشكلة فينا ولا في العربجي؟..

حبيت ألعب اللعبة تاني مع ضيوف تانيين.. بس المرة دي قررت ميتزغرليش.. فغيرت الوظيفة..
وسألني ضيف من نوع الضيوف البايخين اللي وهو بيسألك يلعبلك في شعرك وينعكشهولك
وإنت بقالك ساعة بتسبسب فيه وبتلزقه بالفازلين.. وفي الغالب بيكون سؤاله أبوخ منه..
مش بسبب نوع السؤال تحديدا، ولكن بسبب تكراره.. ولأن في الغالب الضيف مبيبقاش عنده حاجه يقولهالك..
فيقول السؤال التقليدي الممل: وإنت نفسك لما تكبر تطلع إيه يا حبيبي؟.. بصيت لكل الضيوف اللي قاعدين
وأنا مراقب ترقبهم للنطق بأمنيتي.. وكأنهم هايسمعوا حاجة جديدة.. مع إن كل العيال في السن ده
بيقولوا يا إما دكتور زي بابا.. يا إما مهندس زي عمو.. يا إما ظابط عشان أقبض علي بابا.. قصدي ع الحرامية..

المهم بصيت لهم وأنا كلي سعادة وحب وأمل.. بصيت لهم وأنا مبتسم وفاتح بقي من الضرس اليمين
لحد الناب الشمال.. قولتها بصوت عال وبالفم المليان.. يا جماعة أنا..أنا.. أنا عايز أطلع.. أطلع.. مهندس..
الضيوف انتبهولي يا دوب في الزمن اللي قولت فيه الكلمة.. بصوا لي مع ميم المهندس
ولفوا وشوهم مع انتهائي من سين المهندس.. وعااااااااادي جدا.. كل واحد كمل اللي بيعمله..
اللي بيشرب حاجة ساقعة شرب.. واللي بيحط سكر للشاي كمل حططان.. واللي بياكل بياكل..
ولا كأني قولت حاجة.. ولا ماما زغرتلي ولا الضيوف ضحكوا..
فاتأكدت إن العربجي عنده حضور وكاريزما أكتر من المهندس بآلاف المرات..
واللي حصل ده كان دافع قوي إني أفضل مُصر علي رغبتي في الطلوع زي ما أنا عايز..

وكان كل ما حد يسألني نفسك تطلع إيه يا حمادة.. أقوله: عربجي.. فيضحكوا.. وماما تزغرلي.. والعربجي يكبر في نظري أكتر وأكتر.. وماما تزغر، والضيوف مهما يتغيروا.. برضه بيضحكوا.. والعربجي بيعلا ويعلا..

ولما ابتدي مستواي يتراجع في الدراسة.. مسكتني أمي وقالتلي وهي بتزعق: «لحد إمتي هتفضل بليد كده»..
لازم تذاكر وإلا مستقبلك هايضيع وتترمي في الشارع.. إنت إيه نفسك تصيع وتبقي عربجي..
وهنا كان مربط الفرس.. سبت كل الهيصة اللي حاصلة دي.. وقولتلها: أيووووووووه.. ماله بقي العربجي؟
بقالي سنين طويلة عايز أعرف ماله العربجي؟ فهميني.. وبعد شوية صمت ونظرات اللي كان ناقصهم شوية مزيكا سسبنس.. بصت لي وقالتلي: إنت عايز تجنني صح؟.. امشي من قدامي الساعاتي.. قصدي الساعة دي..
دخلت الأوضة وبرضه معرفتش إيه الوحش في العربجي.. يا جماعة لو حد يعرف يقولي..

هو العيب فينا ولا في العربجي.. ليه الناس الضيوف ضحكوا عليا لما قولت نفسي أطلع عربجي..
ليه ماما زغرتلي لما قولتلها نفسي أطلع عربجي.. إيه اللي ضايقهم.. فيه إيه في العربجي يضايق..
ليه محدش عايزني أطلع عربجي؟ حد يرد عليا.. يا أخوانا يا ناس يا خلقه.. يا عالم.. ياهووو.. هوو.. هو.. هـ.. (تنهيدة) واضح إن مافيش إجابة..

وبرضه معرفتش ليه محدش عايزني أطلع عربجي.. مش جايز العربجي هو اللي مش عايز يطلع زيي.

أحمــد حلمي

موضوع رائع جدا

مقالة جميلة جداااا
واجمل مافيها انها بقلم احمد حلمي
الي اكتشفنا انه مش بس ممثل ومذيع موهوب
لا كمان كاتب موهوب وذو اسلوب جمييل جدااا في الكتابه
شكراً يارانيا انك خلتينا اكتشفنا الجانب ده من شخصيته

اقتباس :: وبرضه معرفتش ليه محدش عايزني أطلع عربجي.. مش جايز العربجي هو اللي مش عايز يطلع زيي.

أولا ,,,, أحمد حلمي من الشخصيات اللي بجد بحترمها اوي اوييي ,,,, وبحب اقرالها كتييير اوي اوييي

ثانيا ,,, بالنسبه لأخر جمله في المقاله ,,, فعلا عنده حق كان نفسي أطلع عربجي !! Lol

موضوع جمييييييييييل وراااااااااااائع بجد..

وفعلاااااااا..

ليه كلنا بنتريق علي الشغلانه دي..؟؟

علي الرغم انه بيتعب جدااااااااا...وده اكل عيشه...

تسلم ايدك بشمهندسه رانيا

موضوع جميل اوىىىى بجد حلو اوى انك عرضتيه

يارب يحقق لك كل اللي في نفسك وميحرمكيش من اي حاجه وعلي فكره لكل مجتهد نصيب[/i]

MISS_R كتب:: هو العيب فينا ولا في العربجي.. ليه الناس الضيوف ضحكوا عليا لما قولت نفسي أطلع عربجي..
ليه ماما زغرتلي لما قولتلها نفسي أطلع عربجي.. إيه اللي ضايقهم.. فيه إيه في العربجي يضايق..
ليه محدش عايزني أطلع عربجي؟ حد يرد عليا.. يا أخوانا يا ناس يا خلقه.. يا عالم.. ياهووو.. هوو.. هو.. هـ.. (تنهيدة) واضح إن مافيش إجابة..
وبرضه معرفتش ليه محدش عايزني أطلع عربجي.. مش جايز العربجي هو اللي مش عايز يطلع زيي.

أحمــد حلمي
[/size]

أولا هو موضووع روووعه بجد بأشكر مجهودك الكبير يابشمهندسه رانيا
ثانيا بالنسبه لموضوع العربجي انا شايف ان العيب فينا مش في العربجي لأن العربجي ده انسان ممكن يكون كويس وأحسن مننا كلنا عند ربنا وممكن برضه وده الغالب انه يكون انسان بيئه
الموضووع ده عامل بالضبط زي شغلانة الزبال (عامل النظافه ) محدش ينكر انها شغلانه مهمه جدااا جدااا جداااا
لكن في نفس الوقت احنا عارفين هو وضعه في بلادنا شكله ازاااي والناس بتشوفه ازاااي
معلش على الاطاله بس بجد الموضووع شدني جدااا

شهرة العربجى بانها شغلانة سيئة ليست بسبب الشغلانة و لكن منذ بدايتها كان من يمتهنها من اتفه القوم و اقلهم عقلا لانها لا تعتمد على ذكاء او علم ثم اشتهرت بعد ذلك بانها مهنة قبيحة
و لكن اى واحد منا يمكن ان يصبح عربجى اذا عرف كيف يقود الحنطور .

طبعا موضوع رائع كالعاده والاروع ان اللي كتبه احمد حلمي
وانا لي راي في موضوع انه ليه الناس ضحكت لما قال انه نفسه يطلع عربجي لان ده مش طموح اصلا يعني مش حاجه محتاجه مجهود عشان نوصلها واي حد ممكن يبقى عربجي بس مش اي حد ممكن يكون مهندس او دكتور او اي مهنه تاني لان كل مهنه محتجالها دماغ معينه وقدره على التعامل وكده

اولا: تسلم ايديك يا رانيا لعرضك الموضوع ده.

ثانيا :انا اكتر ممثل بحب اشوف افلامه هوه احمد حلمى ومكنتش اعرف انه بيكتب حلو اوى كده
اما بالنسبة لموضوع العربجى فهوه زى ما تقولى كده دى ثقافة مجتمع وللاسف بتدل على مدى تاخرنا وفى مجتمعنا الاهتمام بيكون باللقب مش الوظيفة ,طبعا بخلاف الدول الاجنبية تماما اللى عندهم مفيش فرق بين دكتور او مهندس وعامل النظافة لانهم على دراية بان المجتمع محتاج لكل الوظايف دى , وان كل انسان هوه الافضل اذا قام بعمله باخلاص وتفانى, لكن هنا طبعا الفرق كبير حتى الناس فى المصالح العامة يعنى شوفى لو قالهم ان دكتور او مهندس بيتعامل باى طريقة و لو قالهم انه عربجى حيتعامل باى طريقة طبعا انا مش بقلل من وظيفة العربجى بالعكس المفروض اننا بشر ولازم نتعامل كلنا باسلوب افضل سواء كنا دكاترة او عربجية يجب مراعاة الجانب البشرى .انا بعتذر عن الاطالة بس بجد الموضوع ده بيستفزنى اوى .ويا رب ثقافتنا تتغير للافضل مش الاسوء.
وبجد موضوع يستحق وقفه مننا.
وشكرا خالص لكى يا رانيا على اختيارك لهذا الموضوع الهام جدا.

على الموضوع الجميل
و احمد حلمى ده فعلا فنان كان نفسي أطلع عربجي !! 2696

ايه الجمااااااااال ده

اصلا احمد حلمي بجد ملووووووووووش حل
رووووعه
واسلوبه في الكتابه جميل اووووووي
يخلي اللي بيقرا مركز معاه جدا
وانا بصراحه مش كنت اعرف انه بيكتب كمان
مرسي جدا يا رانيا انك خلتيني اعرف كده واكتشف انه كده

بجد انا اول مرة اعرف انه احمد حلمى بيكتب
و كمان اسلوبه ف الكتابة جميل
لازم اقرا ليه تانى
شكرا رانيا ع الموضوع الجميل ده و المعلومة الجديدة دى كمان

الموضوع جميل يا رانيا تسلم ايدك كان نفسي أطلع عربجي !! 360126

موضوع رائع

جزيل الشكر لكم جميعاً علي مروركم العطر
الذي أسعدني جدااا وزادني شرفاً

وفعلاً يمكن يكون السبب ثقافة الشعب اللي احنا عايشين فيه اللي بيهتم بالمناصب
اما دون ذلك فليس لهم أدني حق وكأنهم مش بشر زينا

وفعلاً " العربجي " لا يعتبر طموح لانه يستطيع أياً كان ان يكون عربجي بدون ادني مجهود
ولكن هذا لا يسمح لنا بأن نحقر من شأن هذا الرجل لاننا في النهاية جميعاً بشر

وشكرااااً ليكم جدااً لمروركم وردودكم وتعليقاتكم الجميلة
اللي زادت من جمال الموضوع
تقبلوا تحياتي

» كمبيوتر عربجي ...
» اختبار نفسي للكشف عن فهم كل من طبيعة المرأة و الرجل
» نفسي أتوب
» نفسي ابقى رئيس مدينة !!!
» انواع الزملكاويه..تحليل نفسي..