eng_ghost مراقب عام المنتديات والحوار العام ومنتدى الهندسة المدنية
عدد المساهمات : 4632 تاريخ التسجيل : 16/04/2008 العمر : 37 الموقع : just in my dreams ,, i can reach any place رقم العضوية : 1036 Upload Photos :
موضوع: الجواز نص الدين !! الخميس 1 أبريل - 20:39
زوقيني يا ماما يا ماما يا ماما ده حبيبي جاي بالسلامه
لما الواحد فينا يا رجاله لما بيفكر يعف نفسه ويتجوز بيروح لأمه ويقولها ماما جوزيني قبل ما انحرف (طبعا ده من كتر الي الشاب بيشوفه في يومه المعتاد في البنات) تقوم ماما تخاف عليه من الرذيله والانحراف وتبدأ تشوفله عروسه نانوسه على مقاسه مفيش ضرر انها تكون بنت الجيران ومفيش مشكله انها تبقى واحده قريبتهم. بس يا ترى الراجل الي خايف على نفسه من الانحراف ده فكر في مشروع الجواز ده كويس؟؟
سيناريوهات كتير بتحصل قبل الجواز ومع اختلاف الطرق وبداية التلميحات فيما بين العريس والعروسه وامهاتهم بس النهايه واحده من الاتنين يا اما كوشه ومعازيم ودي جي وجاتوه يا اما فركشه وكل واحد بيشوف حاله في سكه تانيه
طرق الجواز بالنسبه للشباب
واحد بيدبس نفسه بنفسه (يروح لأمه يقولها انا عايز اتجوز قبل ما انحرف) عبيط يعني
ممكن الواحد فينا يا رجاله يروح لأمه يقولها ماما انا عايز اتجوز ، جوزيني علشان عايز اتلم شويه وخايف انحرف ، تقوم ماما (من عينة ماما نونه) تدورله على عروسه تليق بمقام اسم النبي حارسه وصاينه. وتبدأ ترفع سماعة التليفون على كل الناس علشان تسلم عليهم وتطمن على اخبارهم (ممكن جدا ماما تتصل بناس هيه اصلا مقاطعاهم وناسيه بس علشان الهدف النبيل ده كله يهون) وبعد ما ماما تعمل لسته بكل بنات العيله الصالحين للجواز يبدأ التلميح من ناحية الام للابن بأن عندها كذا عروسه ونقي يا توتو البنت الي تعجبك في دول (ولا كأنه بينقي من قفص تين وياخد التينه الي تعجبه) لو معجبتكش سوسو في ناديه ولو معجبوش الاتنين يبقى في حسنيه (غالبا الامر بيرسى على ناديه). ويبدأ التسبيل وبربشه العيون وبعدها خطوبه وبعدها جواز وبعدها عيال.
واحد امه بتلبسه في عروسه (امه بتعملهاله مفاجأه وبتجبره يتجوز منها ، عن طريق الزن زن)
ممكن واحد ميبقاش في دماغه انه يتجوز من اصله لأنه عايش حياته بالطول والعرض والارتفاع وكل يوم بيقف قدام مول شكل علشان يتعرف على واحده جديده او اكتر. فا يجي في يوم يروح بيته يلاقي امه بتقوله انا عايزه اقعد معاك شويه فا يقول (وبراءة الاطفال في عينيه) ماشي يا ست الكل أأمريني (طبعا هيوافق انه يكلم امه علشان المصروف مينقطعش لما ماما تزعل منه ، امال هيصرف على المزه ازاي؟؟) المهم ماما ساعتها هتقوله انا عندي ليك عروسه انما ايه مال وجمال تقولش ساميه جمال او ناهد شريف في عز تألقهم ، يقوم توتو يحاول يفلفص فا الام ساعتها تقوله علشان خاطري بس شوفها وبعدها احكم عليها وطبعا توتو هيوافق لنفس السبب الي خلاه يسمع ماما من الاول وهيبقى عامل حسابه انه كده كده هيقول عليها وحشه ومش من الType بتاعه. في الغالب الموضوع هيرسى برضه على جواز ان مكانش على اول واحده هيشوفها يبقى هيرسى على تاني واحده او تالت واحده بالكتير طبعا ده اعتمادا على قدرة الام على اقناع توتو ابنها.
واحد وواحده عايشين قصة حب من زمان
لما الواحد بيحب واحده ممكن جدا يخش في الحيطه يقسمها اتنين (تقولش فان دام قبل ما يعجر) علشان يوصلها وتفضل معاه علطول ، ساعتها ممكن يتجه الى الطريقه الاولى بتاعت ماما انا عايز اتجوز قبل ما انحرف بس ساعتها هيقول لماما انا عندي عروسه عايزك تشوفيها تقوم الام في اول مقابله في بيت العروسه تعمل زي ماري منيب وتقلب وتفعص في العروسه علشان تشوف ده بلاستيك ولا طبيعي وتختبر الليونه بتاعتها وقواها العضميه وقواها العضليه (امال ايه مش لازم تكون على قدر من الصلابه علشان تتحمل متاعب الحياه ولينه في نفس الوقت علشان تسعد ابنها ومتقساش عليه) ولو لقيت القبول ساعتها هيتم التسبيل والبربشه عيني عينك وحبيبتي وحياتي والكلام ده كله.
بعد اختيار العروسه بيحصل ايه؟
بعد ما عرفنا ايه هيه الطرق التقليديه للجواز بدايه من انواع جواز الصالونات (الي في ناس كتير متعرفوش) لجواز الحب نيجي بقى للفتره بتاعت الاتفاقات والي تعتبر اصعب مطب بالنسبه للعريس والعروسه والي ممكن يفضلو شايلين من بعض بسببه حتى بعد الجواز بـ10 سنين. بالنسبه للعريس بيحس فيها بالاستغلال وانه عيل هفق والناس بتتأمر عليه وبتغالي في البضاعه الي هوه عايز يشتريها وبيحس انه بيشتري سمك في ميه. وبالنسبه للعروسه بتحس فيها انها كيلو عنب بناتي واهلها واهل العريس بيفاصلو عليها لأنهم مش عايزين يدفعو فيها كتير (طبعا دي وجهة نظر البنت). عموما بيتم مناقشة الحاجات التاليه في الفتره دي.
1- المهر والمؤخر: غالبا اهل العروسه بيبصو لقرايبهم ومعارفهم ومش بيرضو بأقل من فلانه الفلانيه الي كتبت المؤخر الفلاني وللأسف معظم العائلات بتغالي جدا في المؤخر اما بالنسبه للمهر او المقدم من المهر مش بيبقى حاجه مهمه بالنسبالهم لأن العريس واهله كده كده هيدفعو معاهم في فرش بيت الزوجيه للعرسان. وفي معظم الاوقات بيحصل مشادات بين العيلتين علشان النقطه دي ، لأن اهل العروسه ممكن يقولو عايزين مؤخر 20 الف جنيه (مع العلم ان العريس ممكن يقرف العروسه ويخليها تسيبله الجمل بما حمل) ويطلع اهل العريس يقولو ليه هيه بنت مين يعني ، فا يقوم اهل العروسه يقولو اصل بنت عمها او بنت خالها عملت المؤخر 20 الف هيه احسن منها ولا ايه في الوقت ده هيطلع العريس من القوقعه الي استخبى فيها اول ما بدأ الكلام ده ويقول يا جدعان دي مش بيعه وشروه املا منه انه يهدي الجو انما الكلمه الي قالها دي هتشعلل الموضوع اكتر واكتر وهيهب فيه اهل العروسه ويقولوله لأ مش بيعه وشروه يا حبيب ماما. واذا كان عاجبك مش عاجبك روح شوفلك واحده تانيه يقوم العريس طبعا يسكت ويدخل القوقعه تاني.
2- الشبكه: اذا تم الاتفاق على المهر والمؤخر (بعد عناء ومفاوضات ومراسيل رايحه وجايه) هيدخل العرسان في مطب تاني اكتر شده وهوه مطب الشبكه وفيه هيطلع اهل العروسه يقولو احنا مش هنرضى بشبكه اقل من 10تلاف جنبه ، فا يقوم اهل العريس يقولو مش كتير 10تلاف ، ثم تعالو هنا دي هدية العريس للعروسه وهمه يحددوها مع بعض. في الحاله دي بيقوم بعض الناس من اهل العروسه بدور الوسواس الخناس الي بينخر في دماغ العروسه وامها ويقولولهم اختارو ما غلى ثمنه دي بنتكم يا ناس ازاي تجيب شبكه تمنها قليل انتو عايزين الناس تاكل الوش بتاع الاحنا. المهم اهل العروسه بيقولو خلاص ينزلو يختارو الي همه عايزينه وزي ما يكون (في الغالب لما ام العروسه وام العريس بيروحو مع العرسان محل الدهب مش بيتفقو وبيحصل خناقه قدام الجواهرجي وشكلهم بيبقى يضحك) وممكن الجواهرجي يضحك عليهم ويديهم شبكه فالصو
3- القايمه: القايمه دي اهم حاجه بالنسبه لأهل العروسه والقايمه دي للي ميعرفهاش عباره عن حتة ورقه فلوسكاب مكتوب فيها محتويات الشقه من الابره للصاروخ زي ما بيقولو وفيها بيتكتب كل حاجه موجوده في الشقه بالتفصيل الممل. يعني ممكن يتكتب حجرة انتريه مكونه من كرسيين وكنبه اسنفنج مستورد. ولو لا قدر الله حصل طلاق العروسه من حقها كل ما تحتويه القايمه من اثاث ومعدات. طبعا مفيش جدال ده حق للعروسه انها تعمل قايمه انما تعمل قايمه بحاجه مش موجوده في الشقه ده الي مش مظبوط. وطبعا العريس بيمضي على القايمه بمجرد ان كتب كتابه على العروسه دي ، ولو اي حاجه في الفرش حصلها حاجه العريس بيتحاسب قانونيا بأنه بدد الامانه الي مكتوبه في القايمه يا اما يدفع تمنها اضعافا مضاعفه.
4- شقة الزوجيه: لازم اهل العروسه يروحو شقة الزوجيه علشان يتفرجو عليها. مش بالضروره العروسه نفسها تروح (علشان كلام الناس) انما بيروح مندوب مفوض عنها علشان يشوف الشقه ولو معجبتهمش الجوازه بتتفركش ، دلوقتي الحمد لله المبدأ ده بدأ يختفي نظرا لأن معظم الشباب بيتجوز في شقه ايجار نظرا لاسعار الشقق الباهظة الي محدش يقدر عليها.
5- مين هيفرش الشقه: وهنا العيلتين بيتفقو على توزيع الفرش على الاوض الي في الشقه ، في الغالب بتتقسم ان اهل العروسه بيفرشو اوضة النوم والانتريه او الصالون (لأن اوضة النوم لازم تبقى على مزاج العروسه) واهل العريس بيفرشو السفره والانتريه او الصالون نظرا لأن اغلى اوضتين همه السفره والنوم ، وطبعا وقت شراء الاوض دي كل طرف بيحاول يدبس التاني في اغلى حاجه. كأنهم اعداء ومش بيجوزو عيالهم لا سمح الله.
6- مراحل الجواز: كل عيله وليها طريقه في مراحل الجواز في الي بيخلي الشبكه مع كتب الكتاب وفي الي بيخلي الشبكه في الاول خالص وفي الي بيلبس دبل الاول وبعدها بيعمل الشبكة وبعدها كتب الكتاب والجواز مع بعض. كل ده بيبقى على اساس العادات بتاعت العيله. طبعا بيبقى في شوية اختلافات بين العيلتين وخصوصا لو المده الي بين كتب الكتاب والدخله كانت طويله نوعا ما.
بعد الاتفاق تيجي الخطوبه
لازم بيبقى في فتره ولو قصيره يدرس فيها العريس العروسه والعكس والفتره دي اسمها فترة الاختبار بس طبعا علشان مينفعش الاتنين يسموها كده فا بيقولو عليها خطوبه. طيب ايه الي بيحصل في الفتره دي؟؟
اولا الاقناع ودراسة الطباع:
بالنسبه للعريس: في الفتره دي العريس بيشوف العروسه هتسمع كلامه ولا لأ فا بيبدأ يحط ليها قواعد وخطوط مينفعش تتعداها. اول القواعد دي هيقولها مفيش خروج من البيت من غير اذن مني (قال يعني الواد عامل فيها ديك البرابر الشرس) ومنها برضه انه اي وقت يكلمها على الموبايل لازم ترد عليه والا هيفهم انها مش عايزه ترد عليه ، حتى لو كانت في الحمام (اعزكم الله ) او بتتكلم في التيلفون مع حد من صاحباتها. معنى كده ان العروسه مطالبه بنقل كل تحركاتها وكلامها للعريس الحمش الي هيبقى دكر المستقبل.
بالنسبه للعروسه: العروسه برضه بتحاول تفرض نفس القواعد دي للعريس من مبدأ الغيره عليه من السكرتيره الي معاه في الشغل وممكن تكلمه وهوه بيشتغل علشان قال ايه وحشها فا قالت تسأل عليه وتشوفه فطر ولا لسه.
ثانيا الزيارات المنزليه من العريس للعروسه:
بالنسبه للعريس والعروسه: الزيارات دي بيتم تحديدها بينهم بشكل روتيني ولازم يتم الابلاغ عنها للحكومتين (اهل العريس والعروسه) علشان اهل العروسه يعملو حسابهم ان العريس هيجي النهارده وطبعا ده مش علشان يقدموله حاجه يشربها انما الهدف اكبر من كده بكتير وهوه انهم يعملو حسابهم ان اخو اعروسه الصغير يقعد في البيت ومينزلش يلعب في الشارع مع صحابه ، طبعا علشان يقعد على الكنبه في النص بينهم ويقوم بدور حرس السلاح الي بيحرس اخته الكبيره من العدوان الغاشم. وطبعا لو اخو العروسه نزل ومعرفوش يجيبوه من الشارع في الحاله دي ام العروسه هيه الي هتقوم بالدور ده وطبعا علشان الخطه متتكشفش بتتكلم مع العريس وتقوله انها اصلا كانت عايزاه علشان تتكلم معاه في شوية حاجات. يعني من الاخر العريس والعروسه مش هيعرفو يتكلمو براحتهم علشان الحراسه المشدده الي موجوده معاهم. فا يفكرو انهم يخرجو علشان يتكلمو بره.
ثالثا: الخروجات والفسح:
بالنسبه للعريس والعروسه: الخروجات دي تعتبر رعب لأهل العروسه لأنهم مش عارفين ايه الي هيحصل بين العريس والعروسه وهمه بره ، والبلد مبقاش فيها امان فا بيخافو يشربها حاجه اصفرا فيها حاجه اخضرا ويلوث عارهم. طبعا الشباب المخطوبين مش بيفكرو في الحكايه دي انما التقاليد والاعراف هيه البتحكم التفكير ده. عموما لازم الاتفاق بين العروسه والعريس على الخروجه يكون في النور واهلها يكونو عارفين. وساعتها هيبعتو معاها اخوها الصغير برضه وطبعا بيحفظوه انه ميرحش لا يلعب مع الاسد ولا يروح يتمرجح بعيد عنهم ولا يشرب العصير بتاعه على ترابيزه تانيه. ويفضل قاعدلهم زي قرد قطع. بعض الشباب قدر يتغلب على المشكله دي بأنه يجيب اي حد من قرايبه الي في سن اخوها الصغير (ممكن ابن اخته الكبيره) علشان يلعبو مع بعض ويسيبوهم يتكلمو شويه في هدوء انما على ميـــــــــــــن تأتي الرياح بما لا تشتهي السفن كل شويه العيلين هيجوله ويقولولو عايزين ناكل ايس كريم ، خالو خالو عايز اعمل حمام ، عمو عمو عايز اكل ترمس. وطبعا العريس هيلاقي نفسه عامل زي الداده والعروسه هتبقى بتضحك من الخطه الي فشلت فشل ذريع.
دي اهم النقط والحاجات الي بتحصل في فترة الخطوبه ، دبلتين في الايدين وخروجات وفسح وتنطيط ، بعدها بتيجي فترة التنفيذ الفعلي للجواز وبتبدأ من فترة تجهيز شقة الزوجيه الي فيها العروسه بتطلع عين العريس وهيه بتختار نوع السيراميك واختيار لون الحيطه وتوزيع الاوض ، طبعا ده حق للعروسه لأنها هتقعد في البيت فتره اطول مما هيقعد فيها العريس لأنه بيشتغل نص اليوم وربع اليوم نايم فا هيقضي في الشقه ربع يوم بس.
تجهيزات الفرح:
اخيرا الفرح قرب والعرسان بيجهزو للجواز والزينه واخيرا العرسان هيعملو حاجه كان نفسهم فيها من زمان (اوعى دماغك تروح لبعيد انا اقصد انهم يقعدو في الكوشه وطبل وزمامير وناس بترقص ومأذون قاعد بيبصمهم على القسايم وفستان فرح وبدله عريس ويلعبو عريس وعروسه بس في الحقيقه). وفي اليوم ده العريس بيروح للحلاق علشان يظبطه والعروسه بتروح للكوافير. وبعدها يدخل العرسان للكوشه والناس بترقص.وطبعا مينفعش اتكلم عن الفرح في نفس الموضوع ده نظرا لطول الكلام عن الافراح والعادات والتقاليد الي بتحكمها (ان شاء الله هكتبها في موضوع لوحدها). وبكده كانت نهاية حياة العزوبيه بالنسبه للعريس الي هيتنشق عليها بعد كده وهيقول ولا يوم من ايامك يا عزوبيه.
نصائح عامه للي عايز يتجوز:-
اولا: لو عايز تتجوز ممكن تختار بين التلات انواع من الجواز مفيش مشكله في بس اهم حاجه لما تبص للعروسه بص لمامتها عملا بالمثل الي بيقول اكفي القدره على فمها تطلع البنت لأمها.
ثانيا: لو انت محطوط في موضع اختيار ومش عارف تختار مين (على اساس ان العمليه مش فارقه معاك وعايز تتجوز وخلاص) يبقى اختار الواحده الي هتخاف ربنا فيك وهتحرص على رضاك. لأن لو واحده مخافتش ربنا فيك انت نفسك هتخاف تسيبها لوحدها في البيت. اما بالنسبه للعروسه فاهم نقطه لازم تلاحظها وعلى الاساس ده توافق او ترفض هل العريس ده بيصلي ولا لأ ، لأنه لو مش بيصلي يبقى بلاها احسن لأن اول حاجه الراجل لازم يكون بيعملها انه يخاف ربنا فا اذا مكنش بيخاف ربنا يبقى مش هيخاف من اي حد.
ثالثا: لازم العريس يفرض سيطره من اول يوم خطوبه لأنه لو معملش كده اهل العروسه هيقولو ايه العيل الهفأ ده الي جاي ياخد بنتنا ده ، وكمان هيقولو دول لما هيتجوزو بنتنا هتمشي البيت على مزاجها وهوه هيبقى كيس جوافه.
رابعا: اوعى ثم اوعى تبقى عامل زي العريس بتاع فيلم التجربه الدنماركيه بتاع عادل امام ، تبقى العروسه قاعده جنبك اسد وانت عامل زي الفار الشركسي ، لازم تبقى حمش ودمك حامي الي يبص لخطيبتك او مراتك تاكله قلمين على كام شلوت علشان يحرم ويبقى عبره
خامسا: شقة الزوجيه لازم يا تكون معروف في المنطقه بتاعتها كويس يا اما تفرض فيها سيطره علشان الناس تعملك حساب لما مراتك تشتري اي حاجه من تحت بعد كده فا يعملولها حساب هيه كمان.
سادسا: يستحسن تدمج كتب الكتاب مع الشبكه في وقت واحد وتخلي كتب الكتاب قبل الجواز بـ3 او 4 شهور ، اول حاجه علشان العروسه تفرش البيت زي ماهيه عايزه ، ثانيا علشان لو لا قدر الله حصل خلاف العروسه متضربش على الشبكه الي انت جبتها. على الاقل هتضمن انها مراتك (مع وقف التنفيذ) وساعتها هتاخد شبكتك منها اذا حبيت.
وربنا يوفقنا ويوفقكم في الجواز ويبارك لكم في العرايس والعرسان.
موضوع: الجواز نص الدين !! 
الخميس 1 أبريل - 20:39
