بسم الله الرحمن الرحيم
اخوانى الطلبة و الطالبات بالفرقة الثالثة كهرباء سلام الله عليكم و رحمته و بركاته ثم اما بعد:
اكيد كلنا او معظمنا سمعنا عن شركة "SIEMENS".
و ذى ما احنا عارفين كمان انها بتعمل مسابقات بين الجامعات كل سنة و المسابقات دى بتكون فى اجازة الصيف.
ففى مسابقة من المسابقات دى المفروض انها كانت جايه لسنة رابعة و لكن للاسف مافيش حد اشترك فيها من سنة رابعة .
فاقترح الباشمهندس :مصطفى موسى. و هو اللى هيكون مسؤل عن الفريق اللى هيدخل المسابقة دى و هيتابعهم
حضرته اقترح اننا بدل ما الكلية ماتشاركش فى المسابقة خالص ان ممكن الفريق اللى هيدخل المسابقة دى يكون من سنة ثالثة.
فالحمد لله تم الموافقة على الاقتراح ده من رئيس القسم.
المشروع يا جماعة و بكل بساطة :
ان المفروض هيتعمل خلية شمسية هتولد طاقة كهربية و هتتوصل ب "INVERTER"
علشان يحول
the direct current (DC) electricity from photovoltic array into alternating
current (AC) for use with home appliances and possibly a utility grid.
ده يا جماعه المشروع بكل بساطة و لكن المطلوب اننا ننفذ الموضوع ده عملى مش كلام نظرى و "simulation"و كده
رئيس القسم ان شاء الله هيوفر لنا كل ال "components"
اللى هنحتاجها علشان نندخل المسابقة و ان شاء الله هندخل المسابقة دى و هناخد المركز الاول و هنشرف الكلية بتاعتنا
و ماتنسوش يا جماعه اننا بندرس هنا فى "اسوان" و انتوا عارفين الشمس بتبقى عامله اذاى فى اسوان فى الصيف و الشتاء
يعنى ممكن مشروع ذى اللى احنا هنعمله ده نكمل فيه فى بكالريوس و يكون مشروع تخرج وبعد ما نخلص ان شاء الله ممكن نطبق
المشروع ده فى اسوان و نقدر اننا باذن الله نخلى اسوان مش بس "السد العالى" لا ده ان شاء الله يكون فيها اكبر محطة توليد طاقة كهربية بالطاقة الشمسية مش بس فى مصر و لكن فى الشرق الاوسط كله.طبعا الكلام اللى فى الاخر ده مالوش علاقة بالمسابقة ولكن ده حلم انا شخصيا بحلم بيه و ان شاء الله نقدر نحققه.
حتى لا اطيل عليكم اكثر من ذلك:للاسف ان الوقت ضيق جدا ولازم الباشمهندس عايز اسماء الناس اللى هتشارك فى المسابقة علشان يبعتهم فاكس للشركة
فاحنا مش قدامنا الا بكره علشان ناخد اسماء الناس اللى تحب تشارك فى المسابقة و بالنسبة للناس اللى معاى فى الدفعه ان شاء الله انا هكلمهم عن الموضوع ده بكره فى محاضرة الهاى فولتج.
اما بالنسبة للناس اللى فى اتصالات وحاسبات اتمنى ان الاعلان ده على المنتدى يكون وصل لهم و لى طلب خاص عند الباشمهندس :حسام محمد فرج
انه يقول لكل الناس اللى يعرفهم من اتصالات و حاسابات لان ذى ما قولت الوقت ضيق و انا مش هعرف اوصل لهم.
و اى حد يحب يشارك فى المسابقة يجيب لى اسمه بكره وانا ان شاء الله هكون موجود فى الكلية من الساعة 10 الى الساعة 2
انا اخوكم:محمد محمد العزب الفرقة الثالثة كهرباء شعبة قوى و الات.
فى المسابقة عايزين 4 متسابقين فقط
فالناس اللى هتسجل اسمها معاى لو كان عددهم اكتر من 4 سيتم عمل تقييم لاختيار ال 4 اللى هيمثلوا الكلية فى المسابقة دى.و مش معنى
كده ان الناس الباقية مالهاش لازمة و لكن الناس اللى مش هيكون ليهم حظ انهم يشاركوا فى المسابقة ممكن لو عايزين يستفيدوا يشتغلوا مع زمايلهم اللى هيدخلوا المسابقة و يحاولوا يساعدوهم
لاننا فى الاخر هدفنا واحد و مصلحتنا واحده.
معلش يا جماعه اعذرونى انا هنزل الموضوع على المنتدى و مش هقدر ارد على اى حد بعد كده لظروف خاصه بى و لكن لو اى حد عنده اى استفسار بخصوص الموضوع ده انا
ان شاء الله موجود فى الكلية بكره و تحت امركم فى اى حاجة.
اللهم اجعل هذا العمل خالصا لوجهك الكريم ووفقنا لما فيه الخير.
و السلام عليكم و رحمة الله و بركاته
موضوع: هااام جداااااا لطلاب الفرقة الثالثة كهرباء 
الأحد 28 نوفمبر - 20:19
