30/إذكرلنا موقف ضحكت فيه من قلبك؟ وموقف زعلت فيه جدا؟
الموقف اللى ضحكنى إنى كنت فى رحله فى ألمانيا أنا واتنين أصحابى كانوا بيحضروا مبعوثين للدكتوراه برضو
واحد منهم فى صيدلة أسيوط والتانى طب أسنان الأزهر وباقى فوزج الرحله كله ألمانى وكانت رحله صغيره تسمى
"رحلة الفقراء" وبعد موصلنا ذهبنا لفندق فزمايلى بيقولولى قول للجرسون يصحينا بدرى وقوله يجيب العشاء لأنك الوحيد
اللى تعرف إنجليزى وفرنساوى والجرسون مش بيتكلم ألمانى وقدرت أتفاهم معاه بالعافيه بالكلام والإشاره لأنى مكنتش متقن
للفرنسيه ساعتها وشافونى أربع بنات من الفوج اللى معانا فى الرحله بكلم الجرسون فقالولى أساله عاوزين نسهر بره
فإمتى آخر ميعاد ممكن نرجع فيه ولأنهم يعرفوا ألمانى وميعرفوش إنجليزى أو فرنساوى فكلمته وحاولت أوصله كلام البنات
فمن كتر من منهمك فى تفهيمه وعاوز اوصله الكلام بالضبط بالإشاره وبالكلام لما قرفت وإضايقت فجه واحد من أصدقائى
وقالى يلا عبد الله خلصت ولا لأ فقولتله إستنى لما نشوف ابن ......."شتيمه" فقاللى الجرسون ليه الغلط ده بقى بالعربى
وطلع من اب جزائرى ومن أم فرنسيه وإتعلم العربيه من واحد مصرى!!!
فلحقت وقولتليه سايبنى من الصبح أفهمك بالفرنساوى وبالإشارات مش تقول إنك بتعرف عربى فقالى معلش افتكرتك أجنبى.
وزعلت جدا عند وفاة أمى لأن مشفتش والدى لذلك كنت متعلق بيها جدا وساعة وفاتها كنت فى الأردن وجيت مصر بس ملحقتش الدفنه الله يرحمها.
31/فيه حد معين متقدرش تققوله لأ أو بمعنى أصح بتنفذله طلباته علطول؟؟؟
بنتى الصغيره والكبيره لأ لأن الصغيره دبلوماسيه وأسلوبها بيعجبنى يعنى بستغلنى بمزاجى فبنفذلها كل اللى هيا عاوزاه.
32/هل تحب إن اولاد حضرتك يمتهنوا مهنتك كمهندس أو كدكتور؟؟؟ولا ممكن تسيبهم زى ما يحبوا هما؟؟؟
أنا تاركلهم حرية الإختيار ومش بدخل فى حياتهم ومش بعرف أصلا هما فى قسم غيه غير لما ييجوا يقدموا فى التنسيق
وهما بيشوفوا مصالحهم كويس وبيجتهدوا.
33/أيه الصفه المهمة أو المبدأ اللى بتعلموا لأولادك وبتحاول دايما إنك ترسخه فيهم؟؟
عدم خلط الأمور ببعضها فالعمل عمل والترفيه ترفيه وأحب الجديه فى كل شىء.
34/حب القرايه حضرتك؟ولو بتحبها أيه الكتاب المفضل ليك؟وأيه نوعية الكتب اللى بتقراها؟؟
طبعا بحبها وأنا بقرأ لأى حد ولإى أى حاجه وبتستهوينى الكتب السياسيه الممزوجه بالتاريخ الحديث.
35/فى وقت الفراغ ممكن تعمل أيه يا دكتور؟؟
أقرأ القرآن أو أتكلم مع أولادى.
36/ايه اليوم اللى عمرك مهتنساه؟؟
يوم مناقشة الدكتوراه فى ألمانيا.
37/هل منصب عميد الكليه منصب متعب وصعب الوصول إليه؟وهل سعيت سيادتك سعيت لهذا المنصب أم أنك توليته من جهات عليا؟
هوه منصب متعب جدا وخصوصا لما يكون فى كليه وليده وجديده زى كليتنا وأنا لم أسعى لهذا المنصب أو أطالب به رغم إننى حصلت على الأستاذيه عام 2002 م والدكتور محمد ثروت كان مشرف على الكليه ونائب رئيس الجامعه حتى أصبحت عميدا للكليه عام 2006.
38/نفسك الكليه تبقى إزاى يا دكتور؟؟
نفسى الكليه تتطور ونكسب موضوع الجوده بالمشاركه والكليه تكون من أوائل التى تنال الإعتماد وخريجى الكليه يشرفونا فى أى مكان والكليه تكبر وتزيد الأقسام وتكتمل الأشياء الناقصه فى كل قسم والطلبه يجتهدوا أكتر من كده لذلك بحاول أوصلهم الإجتهاد ده وأحفزهم من خلال منصبى كمنسق لبرنامج تنمية مهارات التفكير والإداره.
39/أيه الحاجات اللى بتحبها فى كلية هندسة أسوان وأيه الحاجات اللى بتكرهها فيها؟
من إيجابيات هندسة أسوان أننا بناخد عدد أقل مع إننا ممكن ناخد أكتر بس أنا مش برضا بالعدد الأكبر لذلك كليتنا هيا الوحيده على مستوى الجمهوريه اللى مفيهاش تنسيق بعد إعدادى أو فى أقسام كهرباء وذلك لحاجه فى نفسى
ألا وهى دخول الطالب القسم الذى يحبه علشان ينجز فيه وذلك بالرغم من أنهم دايما بينوهوا لعمل تنسيق فى الكليه
ولكن أنا مطنش الكلامم والشىء اللى بكرهه هو عدم مشاركة الطالبات فى الأنشطه والفئه القليله من الطلبه اللى
مش بتحافظ على جمال الكليه وشكلها ونظافتها والمناوشات الى بتحدث بين الطلبه وبعضها.
40/تتوقع الكليه هتبقى إزاى بعد عشر سنين يا دكتور؟؟من حيث الطلبه والكليه نفسها والإداره كمان؟؟
أتوقع إنها تكون أفضل ويستكمل بها كل شىء ناقص والكليه حصلت على 8 مشاريع بحثيه فى آرواخر سيتمبر الماضى
لخدمة العمليه التعليميه رغم إنها كليه وليده لذلك أتوقع الكثير والكثير لها فى المستقبل وبخصوص الإداره فيوجد أربع
دكاتره فى الكليه حاصلين على الأستاذيه وممكن واحد منهم يحصل على منصب العميد وهم بالترتيب كالتالى:
دكتور عبد المجيد والدكتور لؤى والدكتور أيمن عثمان والدكتور كمال حافظ.
41/فيه طلبة بتعتقد إنى حضرتك بخيل لأنك بتدعم الأنشطه بمبالغ ضئيله فما مدى صحة هذا الكلام؟
أنا بخيل جدا فى المال العام لأن خايف من ربنا فى المقام الأول ومش من القانون والكلام ده وأنا بحب أعمل
موائمه للإمكانيات مع الظروف وبحقق أكبر إستفاده بنفس التكلفه.
42/من خلال زيارتى لمكتب حضرتك كذا مره لاحظت إنى دائما ما تكون القناه التانيه المصريه شغاله!!!
فهل حضرتك بتحب تشاهدها ولا ده محض صدفه؟
بعد إبتسامه يقول العميد أنا مش بتفرج على التلفزيون لأنى مش ببقى فاضى ولكن بيتم تشغيل التلفزيون
علشان اللى بينتظرنى ميزهقش وميملش يعنى تشغيلها بيتم عن طريق الصدفه مش أكتر.
43/ هل بتحب جو العزله حضرتك ولا بتحب جو الشغل والبيت؟
بحب الهدوء ومبحبش الدوشه لأن الهدوء بيخلينى أفكر أحسن والأعصاب بتبقى أهدى وبخصوص العزله
أنا بحب وسط أولادى وبحب شغلى برضو.
44/ لو سبت هندسة أسوان يا دكتور ممكن تشتغل فين؟
أنا ممكن أشتغل بياع ترمس بعد الإستغناء عنى من الجامعه لأنى معنديش مانع أشتغل أى شغلانه مدام شريفه
ومش بتكسف من شغلى وشطارتى إنى أخليها أحسن عربية ترمس.
45/ كيف يدور العمل فى مكتب العميد؟
منذ تولى منصب العميد لم أغير فى الشخصيات اللى بعمل معها وبحب اللى يؤدى عمله والعكس صحيح ولم
أبدل غير شخص واحد فى مكتبى وبدى فرصه للموظف وبعدين بطبق العقاب وفى مره فى موظف إتعاقب
خليته وصل الجزاء بنفسه.
46/هل بتحب السياسه يا دكتور؟؟وهل ليك نشاطات حزبيه؟؟وأيه الحزب اللى حضرتك مشترك فيه؟؟وأيه الحزب اللى بتعجبك مبادئة؟؟
أنا ليا فى السياسه ولازم يبقى ليا لنها بتأثر على حياتنا بشكل مباشر أو غير مباشر وأنا مش بقول لأبنى ومراتى
حزبى أيه ومين اللى بنتخبه علشان مأثرش على آرائهم وبحب المشاركه من قبل الناس أفضل من الكلام فقط
وزمان منتخبتش أخويا وكان مرشح فى المجلس المحلى وبعد معرف زعل منى فقولتله لأنى مفيش إختيار منتخبتكش
وأنتخبك ليه علشان أخويا يعنى!!!!!
وهوه نجح بعد كده ومزعلش لذلك نفسى يبقى فيه حكومه قويه ومعارضه قويه.
47/لو كنت رئيسا لمصر أيه أول حاجه ممكن تعملها فى البلد دى؟؟واخر حاجه ممكن تعملها فيها؟؟
إستكمال الدور الحالى للحكومه لجلب مزيد من الإستثمارات للبلد ومحاولة القضاء على البطاله بأى وسيله وآخر حاجه إنى أروح قصر الرئاسه.
48/حضرتك عاصرت عدة من الرؤساء فمن الرئيس المفضل لديك ولماذا؟
كل ريس له عيوب ومميزات فالرئيس عبد الناصر أحيا القوميه العربيه وعمل مجانية التعليم ونشر الصحه
فحبناه ولكن لم يخل العهد من العيوب والرئيس السادات بتخطيطه وخداعه الإستراتيجى فى 6 أكتوبر
وما تحقق من نصر وبداية إسترداد الأراضى والرئيس مبارك بيحاول يوازن بين السياسه الداخليه والخارجيه
وبيعجبنى فيه إستغلال العلاقات الخارجيه لجلب الإستثمارات ولفايدة البلد وأيضا الهدوء وعدم الإنفعال والتريث
فى آخذ القرارات لأن آخذ القرارات على طريقة عبد الناصر متنفعش فى الوقت ده.
49/هل تؤثر قول الحق حتى ولو هيزعل حد منك؟؟؟سواء قريب أو بعيد؟؟
عادى لو هيزعل الدنيا كلها هقوله برضو.
50/ إذكرلنا موقف إتعلمت فيه حاجه يا دكتور أو اخدت درس منه سواء بطريق مباشر أو غير مباشر؟
لما كنت فى ألمانيا وبحكم عملى كمعيد هناك كنت براقب على مجموعة الطلبه فى إمتحان وكان لازم أسألهم
لو فيه حد تعبان ومش هيقدر يمتحن لأننا لو إمتحنا الطالب وهوه تعبان أو مريض ممكن يرفع قضيه على الكليه
ويسبب مشاكل لدكتور الماده فالمهم سألت الطلبه لو حد تعبان ومش هيقدر يمتحن يقول قبل ما ابتدى فى توزيع
الأوراق بتاعة الإمتحان ففيه طالب قال مش عارف أنا هقدر إمتحن ولا لأ مش قادر أحدد حالتى وقدرتى
على الإمتحان فالمهم روحت للدكتور بقوله هوه انا هستناه لما يحدد حالته قال اه علشان ميبقاش فيه مشاكل
وأنت ممكن تأخر الإمتحان لمدة ربع ساعه وتسيبه يحدد براحته هل هيكمل الإمتحان ولا لأ فالمهم روحت
وأديتله ربعه ساعه يفكر وبعد مخلصت الربع ساعه روحتله وبقوله هتمتحن ولا لأ فضحك وقالى خلاص
همتحن فاتعلمت من كده إنى الطالب لما بياخد الديمقراطيه كامله بيستخدمها للأسف غلط ولما سألت بعد كده
قالولى إن الطلبه بيعملوا كده مع الأجانب بس.
51/ هل فيه خطط أكاديميه لحضرتك؟؟
إهتمامى حاليا بالكليه ومش فاضى لحاجه تانيه وبأشرف على رسايل الماجستير وبناقشها.
52/لو حبيت حضرتك تسمع أغنيه ممكن تسمع لمينوأغنية أيه؟ وهل يوجد فيلم معين بتحبه؟
بسمع لكل الناس وبحب الغنوه اللى ليها معنى مش للهو فقط وبحب الفلكلور الشعبى والأغانى القديمه
لها طابع خاص برضو وبحب فيلم الأرض.
53/ أيه القسم اللى بتحبه يا دكتور؟وأيه سبب حبك ليه أو إعجابك بيه؟
قسم عماره لأنه قسم صغير وتلاقى الطلبه مترابطين مع بعض وعندهم إنتماء للقسم وساعات
بلقاهم بينضفوا القسم ودى حاجه جميله.
54/علمت مصادر منتدى هندسة أسوان بأن سيادتك فى بداية ذهابك لألمانيا تم طردك من قبل الدكتور بحجة أنك لا تعرف اللغه الألمانيه فعكفت سيادتك أمام التلفزيون لمدة شهر حتى أتقنتها.ما مدى صحة هذا الكلام؟
لأ مش بالضبط لما روحت مكنتش بتقن اللغه تمام فالدكتور وبخنى جدا على كده وقالى أنت هتفضل علطول معيد
ومش هتاخد الدكتوره وأحسنلك تروح بلدكم فابتديت بعد كده مشوار تعلم اللغه الألمانيه فكنت بنام واقوم أحلم بيها
لغاية ما تقنتها تمام الإتقان مش بالتلفزيون بس ده من الكتب وحاجات كتير تانيه لدرجة إنى الدكتور اللى وبخنى يوم
ما اخدت الدكتوراه أشاد بيا وبالمجهود اللى أنا عملته وكان فرحان جدا إنى قدرت أعمل حاجه.
55/ هل سيادتك عند مصلحة الطالب حتى ولو كان مخطأ؟
لأ بس أنا بحاول قدر الإمكان إنه ياخد حقه والعقاب ميزدش عن حده وعلى فكره باب مكتبى مفتوح
لأى طالب واللى بيجى ممكن يدخل علطول.
56/ما موعد ظهور النتيجه يا دكتور؟
إن شاء الله مش قبل منخلص المشروع ده لو مجدش فى الأمور جديد وبالتوفيق لجميع الطلبه والطالبات.
57/تم هذا العام إغلاق الممر الخلفى للكليه وتم فتح الباب الخلفى للكليه لفترات معينه.هل من الممكن أن تزيد هذه الفترات العام المقبل؟وهل تسعى سيادتك لفتحه؟وهل يمكن أن تزف البشر للطلبه من خلال منتدانا بأن القادم سيكون أفضل بإذن الله؟
بخصوص فتح الباب أن مش برجع لورا وأنا حابب أنه يبقى مفتوح بس عدد الحرس مش كفايه وهو
ده السبب اللى معطل فتحه دلوقتى ولكن فى حالة تواجد الحرس سيتم فتحه للجميع وتفائلوا خيرا تجدوه
وأكيد القادم هيبقى أفضل إن شاء الله.
58/ بماذا تنصح الطلبه والطالبات وتوصيهم به؟
أوصيهم بالجد والإجتهاد فى العمل لأنى العمل الهندسى ليس بالهين أو السهل وأن يهتموا بالتدريب
الصيفى وأن يهتموا بالحضور أكثر فأكثر وأيضا حذارى من الغش فى الإمتحان أو الشروع فيه
لأن دى جريمه وممكن تعرض نفسك لعقوبات كثيره وكبيره ممكن تضيع مستقبلك وربنا يوفقهم
جميعا لأعلى الدرجات.
وهنا نكون قد إنتهينا من اللقاء الحصرى مع الدكتور عبد الله وإنتظروا منا لقاءات أخرى
مع جميع الشخصيات الهامه والعظيمه.
والله الموفق
موضوع: الآن اللقاء الحصرى والأحدث على الإطلاق مع الدكتور عبد الله عميد كلية الهندسة بأسوان على منتدانا فقط . 
الأحد 15 يونيو - 19:43
