رب اكشف لى قلوب الناس!

رب اكشف لي قلوب الناس
يكتبها : المصري

العنوان دعوة.. سمعتها وأنا أمام الكعبة ورددتها وراء من رددها.. الحكاية كانت في رمضان زي اليومين دول.. الجمعة نعمل عمرة.. ماتغيرش البرنامج بتاعي في رمضان.. كنت دايماً ادخل من باب السلام.. وفي احدي الجمع الرمضانية التقت عيناي بعيني شيخ جليل يشق طريقه للطواف.. معرفش ليه مشيت وراه.. جسمه كان زي الرمح ودقنه بيضا وجلابيته زي الفل.. مش كل ده اللي شدني له.. كان فيه حاجة تانية.. لغاية دلوقتي ما أعرفهاش.. زي ماكون اتنومت مغناطيسي.. حكاية حصلت من 20 سنة ولسة فاكرها زي امبارح.. الشيخ ملامحه في رأسي محفورة.. وصوته وهو بيدعي ربنا كان فيه رجفة تهز البدن وترعش الصدور.. صلي في مقام ابراهيم وجاهدت أن اكون خلفه لأسمع مايقوله في دعائه..
الدعاء تقليدي كالذي نسمع ونحن نهرول بين الصفا والمروة أو كالذي نقرأه في أشواط السعي بينهما.. وفجأة سمعته يقول رب اكشف لي قلوب الناس.. كيف يكشف الله لنا مافي القلوب وهو وحده الذي يعرفها؟ لقيتني بادعو ربي وراه وأقول رب اكشف لي قلوب الناس.. وكانت الرعشة عظيمة والجلابية كأنك دلقت عليها جردل ميه.. وانهمرت دموعي ما اعرفش ليه في اللحظة دي كانت شلال.. خفت اكون اتجاوزت في الدعاء. وخفت اكتر بكتير لأني حسيت ربنا قريب مني بشكل محصلش تاني.. وبعد ماصلينا وهدأت رحت له اسأله.. ياشيخ أنا دعيت وراك وأنا خايف.. قال لي لو ربنا استجاب دعاك حتبقي من أقوي الناس فراسة.. لو ربنا اداك الموهبة دي حتكون قوي جداً.. قلت له يعني حا ابقي ازاي.. قال لي حتعرف اللي بيكلمك بيحبك وإلا منافق.. وحتعرف الخائن من كلامه واللئيم حيقف قدامك عريان ومش حتدي حد صدقة مايستاهلش ومش حتظلم حد لأن شعورك حيهديك..
سألته لكن ليه ياشيخ دعيت ربنا بالدعوة دي.. قال لي يابني أنا باشتغل مع ناس عايز آمن شرهم.. قلت له الله خير حافظاً وهو أرحم الراحمين.. رد قائلاً ان الله يختص عباده المؤمنين بنفحات وفيض من عطائه وعلنا نكون من الفائزين.. في كل رمضان اتذكر هذا الشيخ الذي نسيت اسأله عن اسمه من الرهبة اللي كنت فيها.. بعدها عدت لمصر واستغربت جداً من اللي حصل لي.. مبقتش اقابل حد إلا واعرف هو عايز ايه مني.. اللي بيضحك علي واللي بيحسد واللي يغشك واللي يشتمك واللي فاكر نفسه نبيه واللي بيكذب مع كل نفس واللي بترسم عليك واللي بتسبل وتتنهد.. ساعتها بس عرفت اد ايه الراجل دهه كان عنده حق.. ومش حابالغ لو قلت لكم انه لما يسأل عليا حد باعرف من صوته هو عايز ايه.. ووصلت المنحة الربانية لحد أما خلتني اسمع من يسبني وافاجأه بما قاله عني. ولما اكون مسافر وارجع الاقي واحد مقدم اجازة بتاريخ قديم أقول له ليه ما اتدنيش الورقة قبل ماسافر يقول لي نسيت.. لكن الحقيقة اني بعد ماسافرت غاب هو. وخصموا له الأيام. فقدم الاجازة علشان يقول لي انه نسي يمضي.. وزي دهه كتير.. ساعات بقيت اخاف من نفسي.. لكن اكتر حاجة مزعلاني أن ربنا لما انعم عليّ بفضله مكنتش الناس وحشة قوي كده.. دلوقتي خلاص مبقتش استخدم الفراسة لأن الناس كلها بتحركها المصالح والحكاية مبقتش عايزة فراستي ولا فراسة غيري.. الناس كلهم متهمين حتي يثبت العكس.. وللأسف مازلت منتظر العكس دهه ولسة ماجاش!

اقتباس :: دلوقتي خلاص مبقتش استخدم الفراسة لأن الناس كلها بتحركها المصالح والحكاية مبقتش عايزة فراستي ولا فراسة غيري.. الناس كلهم متهمين حتي يثبت العكس.. وللأسف مازلت منتظر العكس دهه ولسة ماجاش

رب أكشف لي قلوب الناس
شكراً علي هذه المقالة الجميلة
وربنا يصلح الحال

» متى تصفى قلوب الناس
» مفتاح قلوب الناس؟؟؟؟.............
» زوج تهفو إليه قلوب العفيفات
» قلوب من حجر ....
» قلوب الرجال لغز سهل حله