تساؤلات طالب فى اعدادى هندسة

أعضاء المنتدى الأعزاء

أى طالب فى اعدادى هندسة يقع فى الحيرة بالنسبة لاختيار التخصص
و انا عندى أسئلة حابة انى أعرف اجاباتها من حضراتكم لأنه بجد الأمر ده محير

معظم من سألتهم ليه هما دخلوا القسم معين بالذات قالولى ان الامر ده متعلق بالميول وده بيظهر من دراستهم لمواد اعدادى
و لكن السؤال هل اختيارك للقسم الى انته فيه كان بناء على ميولك فقط أم انك عند اختيارك للقسم قارنت بين ميولك وبين فرص العمل المتوفرة فى المجال الى انت ناوى تدخله
واذا كان القسم الى انت حابب تدخله مجاله فى فرص العمل محدود هل كنت هتدخله

كمان احنا السنة دى مش قدامنا غير قسمين هما مدنى و كهربا فياريت كل عضو يمر بالموضوع يقولنا ايه هيا مميزات القسم الى هو فيه من وجهة نظره و على أى أساس هو اختار القسم ده
فأرجو الافادة
و جزاكم الله خيرا

shimz كتب:: أعضاء المنتدى الأعزاء
أى طالب فى اعدادى هندسة يقع فى الحيرة بالنسبة لاختيار التخصص

فعلا الامر محير جدا واحنا برده السنة اللى فاتت كنا فى نفس الحيرة زيكم برده ..

وانا عندى افتراح و هو
عمل ندوة للطلبة اعدادى لتعريفهم باقسام الكلية وتعريفهم مميزات كل قسم و طبيعة الدراسة فيه .
ويكون فى الندو ة طلاب من كل قسم وحتى دكاترة ومعيدين من كل قسم للاجابة على اسئلة الطلاب .

واتكلمت انا والبشمهندس جودزيلا فى الموضوع . وبنعد ليها لتكون فى بداية الترم الثانى ليكون فى فرصة الطلاب اعدادى لاختيار القسم المناسب .
وان شاء الله هحاول جاهدا لاعداد تعريف شامل لاقسام الكلية يجيب عن كل تساؤلات طلاب الفرقة الاعدادية .

بالفعل يا باشمهندسة الإختيار مش سهل ع الإطلاق
بالذات للى داخل اعدادى هندسة وماعندهوش ميول اولية
تخليه يحط عينه على قسم معين

بس فيه خطأ في كلامك

ان انتى قولتى ان قدامن مدنى - كهرباء بس

لا انتى قدامك مدنى _ باور _ اتصالات _ حاسبات

شعب كهرباء بتختلف تماماً عن بعضها
وكل ذو ميول مختلفة جدااااااا

انا بالنسبة لى مكانش عندى مشكلة كبيرة في موضوع الإختيار

لإنى كنت ناوى ادخل حاسبات من قبل ما ادخل كلية الهندسة أصلاا

رغم كل المعوقات ان حاسبات مالهاش شغل كتييير او بمعنى أصح
اللى بيعرفوا كمبيوتر كتيير

لكن دى اراء ناس مش متخصصة وبتتكلم بصفة العامية وماتعرفش أصلاا
هندسة الحاسبات بتتكلم عن ايه !!!!

وعشان كدة اتجهت لقسمى المحبب الحمد لله وانا بحبه بغض النظر للى حيحصل
لما أتخرج من شغل _ لا شغل

بس انا عملت اللى بحبه ودة احسن شئ ودة اللى حتأدى فيه
ويبى الباقى على ربنا

لكن لو دخلت قسم انت مش حابه أصلاا وليك مثلاً قريب حيشوف لك شغل في القسم
دة او حاجة _
دة حيسبب لك مشكلة كبيرة __ وحتعدى سنوات قسمك دة بالعافية

وانا شفت الحالات دى كتييييير في قسم اتصالات
ناس كانت حابه حاسبات ومتميزة فيه

خافوا ودخلوا اتصالات عشان الشغل وعشان لهم قرايبهم حيشغلوهم في هندسة الإتصالات
دلوقتى بينجحوا بالعافية في اقسام اتصالات ومنهم بيشيل السنة

فلازم تحطى ميولك اولااااا واخيراً قبل دخول القسم

والله الموفق

انا متفق مع يحيى فى كلامه

انك لو دخلتى قسم انتى مش حباه عشان فرص عمله كتير اولا هتبقى الكلية معقدة جدا عليكى

و الحاجة التانية انك مش هتثبتى نفسك فى الشغل عشان انتى بتعملى حاجة مش حباها

اما عن تختارى القسم ازاى فده بيعتمد على اكتر من عامل

اول عامل : ميولك ايه قبل دخول الكلية او فى فترة الكلية

العمال الثانى : انتى حبيتى ايه من المواد اكتر فى اعدادى بس ده مش معناه مادة معينة , هوه حبك لاتجاه معين من المواد سواء مدنى او كهرباء

و زى ما يحيى بيقول ان قسم كهرباء كل شعبة فيه منفصلة تماما عن التانية

و ربنا يوفق جودزيلا و زايد فى الندوة اللى هيعملوها و ان شاء الله تكون مفيدة

السلام عليكم ورحمة الله وبركاته

أنا بحب أجيب من الآخر أولا وبعيدا عن الرسميات !

أولا من ناحية تلقى العلم :

1/ كهرباء بأقسامها تحتوى على علوم صعبه نسبيا أو الأصعب نظرا لأنها شبه
غير موجوده إلا على الورق فقط والتطبيق ليس بالمجدى نفعا ويلجأ من لا يفهم
علومها على الحفظ والفئه دى جمهورها كبير جدا جدا ومذاكره بالهبل.

2/مدنى يقوم أساسا على الفهم ولا شىء غير الفهم لأن علومه كلها متربطه ببعضها
وذلك بشىء إسمه الإستركشر ولو مفهمتيش مش هتحلى حاجه غير كده مواده ينفع تتلم
بسرعه والمذاكره مش ضرورى تبقى كتيره زى كهرباء أو أقل منها والمواد تعتبر
شبه مرئيه أو واقعها ملموس قليلا.

3/عماره الأقل من ناحية الصعوبة والمذاكره فلا توجد مواد للحفظ أو مش هتشيلى
هم النجاح والرسوب لأن أعمال السنه تزيد عن نصف الدرجة والحياه بيس هناك
بس المشكله فى طولة البال على الرسم واللوحة والتصاميم كلها تعتبر ملموسه
زى مدنى.

ثانيا من ناحية الشغل:

1/يتقدم قسم مدنى عن جميع أقسام الهندسة بالجمهورية بفرص العمل والحمد لله
وسيتسمر ذلك إن شاء الله إلى أن يتم إستصلاح ال 95% من صحارى مصر
بالإضافه إلى رواتب محترمه وتعدد مجالات العمل"ممكن تشتغلى أى حاجه" زى
الرى أو التصميم أو الطرق أو المساحه أو الصرف الصحى ....إلخ.

2/كهرباء أيضا توجد فرص عمل لها بس أقل من مدنى ومعظمها بالمصانع
"وده بالنسبه لبور" أما إتصالات فمكانها معروف بس مجال عملها الأفضل
بيبقى بحرى "يعنى إغتراب " وأخيرا حاسبات ممكن تشتغلى فى أى شركه
فمجالها كبير ومجالها مكيف أيضا بس دراستها بتبقى صعبه شويتين تلاته.

3/ عماره طبعا فى التصميم ومجالهم كبير فى المكاتب الهندسية بس الأغلبيه
تصميم فقط ومن داخل المكتب فقط.

ثالثا ملائمة الشغل بعد ذلك لطبيعتك الأنثويه:

1/ المدنى للبنات بيبقى صعب أو الأصعب لأنه شغل إنتحار ومسؤليه كبيره ولازم
الواحد يبقى شديد ومش مؤدب قوى عشان يعرف يعيش ويتعايش معاه!!!

بس البنات بيشتغلوا فيه الأعمال المناسبه ليهم مثل التصميم والرى والأعمال التى
تعتبر خفيفه وبرضو رواتبها محترمه.

2/ كهرباء شغلها بيبقى مش صعب زى مدنى بل أسهل بكتير يعنى إتصالات وحاسبات
دول لازم بيئة مكيفه ومفيش مسؤليه جامده والدنيا تمام فيها بس المشكله فى بور
شغل مصانع وصحيان بدرى وتعب شويتين بس برضو مش زى مدنى.

3/ عماره طبعا ملائم جدا لأنه تصميم فقط وملكيش دعوه بالتنفيذ ولا أى بأى حاجه
"إن شالله الدنيا تولع حتى" أنتى بعيده عن ذلك خالص وأفكارك بتطبق وخلاص.

رابعا بالنسبه للمنصب وإنى حد يرأسك :

1/ مدنى أو ما بيبتدى بيمسك موقع بالكامل بجميع الفئات وإن حد كتر فى الكلام معاه
يسيب الشغل ويشوف غيره ولو معجبهوش يشتغل ممكن مع مقاول بمعنى إن مفيش
إيد توجعه ممكن يتمسك منها وممكن يفتح مكتب إستشارى يعنى الحياه حلوه خالص
ومحدش يقدر يقولك تلت التلاته كام.

2/ كهرباء بتفضل حد يرأسك لغاية ما تموت وتوجيهات وتعليمات وبتاع ومينفعش
الواحد "يفلفص " بعدين عشان العيال وبتاع والمصاريف وممكن متلقاش شغل على
عكس مدنى.

3/ عماره شغالين تصميم مع أى حد ومش ضرورى مناصب لأنه شغال بدماغه ولازم
هيشتغل برضو.

أخيرا

حاولى تشوفى نفسك فى الكلام ده وتشوفى أنتى عاوزه إيه وبتميلى لإيه وإعملى صلاة
إستخاره برضو وممكن تحضرى مثلا محاضره فى أولى كهربا أو مدنى تشوفى الجو إيه
ومتبصيش لشىء الناس شايفاه حلو بمعنى لازم الشىء ده يبقى حلو ومناسب فى عنيكى أنتى
وبلاش تاخدى بالسمعه يعنى بمعنى إنك تدخلى القسم اللى حاباه أو اللى ليكى ميول ليه
حتى لو ملهوش شغل أو متعب لأنك عدم حبك لمجال آخر هيخليكى تتعبى ويمكن
تتغير الدنيا مسافة السنوات الخمس لذلك إدخلى اللى بتميلى ليه وممكن تلاقى نفسك
فيه وحاولى تفهمى الكلام السابق كويس ولو عاوزه تستفسرى عن شىء آخر أنا
موجود إن شاء الله.

على فكرة ده رأيى الشخصى المتواضع

والله الموفق

مثلما اشار الاخ زايد نحن بصدد تنظيم ندوة على مستوى عالى من التنسيق والمستوى العلمي يشارك بها باذن لله دكاترة ومعيدين وطلبة ليعرض كل منهم مايحتويه قسمه لينقل خبرات ومعلومات دقيقة عن قسمه حتى يتسنى للطالب بالفرقة الاعداديه بتحديد مسار مستقبله عن وعى وقناعه ورضي نفسي ادعو لنا بالتوفيق

شكر ا ليكم يا بشمهندسين على ردكم على موضوعى و محاولتكم المساعدة

و حابة أقول للبشمهندس زايد و البشمهندس جودزيلا ان فكرة الندوة فكرة جميلة جدا

و ياريت تتنفذ بجد فى أول الترم الثانى

ومعلش أنا عندى استفسار آخر

هو ايه الفرق بين خريج هندسة حاسبات و بين خريج حاسبات و معلومات

و هل هما بيتساو فى الآخر

كمان أنا لما دخلت هندسة كان القسم الى نفسى أخشو هو قسم حاسبات

لكن مفيش حد مشجعنى و بيقولولى ان كل الناس بقيت بتفهم فى الكمبيوتر و ان هندسة حاسبات ملهاش لزمة

و الصراحة أنا مش مقتنعة بالكلام ده

فياريت حد يجاوبنى و أعرف رأيكم فى الكلام ده

بسم الله

هو اولا انا هسيب نقطة الفرق دى لمهندسي حاسبات يوضحوها افضل منى لانه تخصصهم
بالنسبة للنقطة التانية ان ناس كتير بتفهم في الكمبيوتر من وجهة نظري انه قول العامين ياعنى اللى مايعرفش يقول عدس مجال الكمبيوتر واسع بس انزل مجال الشركات الكبرى وانتو تشوفوا الناس اللى فاكره نفسها تعرف في الكمبيوتر دى ماتعرفش حاجة الكمبيوتر ياجماعه انواع احنا فاكرين ان الكمبيوتر ده اللى قدمنا في البيت بس لا ده في اناع عديدة من الكمبيوتر واللى شوفتها بنفسي زي كمبيوتر الPLCواللى عاوز يشوفه موجود في المعمل في الكلية اللى بيقول فاهم في الكمبيوتر ده هاتوهولي ولو هو جدع يورينى هو هيعرف يشغله اصل كل اللى عرف ينزل نسخة ويندوز ويعملوا حبة حركات ويعرفلوا كام برنامج هبل لو اديته لعيل فى ابتدائي يشغله يروح يفتح له شركة ويقول اه انا بفهم في الكمبيوتر ده غير التأليف اللى بسمعه وكل واحد يفتى كان ابوه بيل جيتس عاوزين تعرفوا بحق الفرق بين اللى بيفهم في الكمبيوتر واللى فااااااكر نفسه بيفهم يدخل مركز المعامل التخيليه ويشوف جزء من للى عامله دكتور احمد ابوبكر هقولكم حاجه ممك تشوفوها بعينكم لو فتحتتوا كمبيوتر المعمل هتلاقوا باسورد واللى فهمتة ان الدكتور احمد خلى الاجهزة بباسورد لكل مستخدم الباسود الخاص بيه عشان يشتغل له لكمبيوتر بالخصائص التى تتاح له فقط ياعنى مثلا الطلبة لها باسورد تاخد خصائص غير الخصائص لبسورد اللى يدخله المعيد طبعا غير الباسورد للخصائص المتاحة للمدير المسئول اتحدى واحد من اللى عاملين شركات الكمبيوتر يقدر يعمل كده طب اتحدى واحد يقدر يغير خلفية سطح المكتب على الجهاز بلاش دى حجم الشريط task barاستحالة تقدر تتحكم فيه ده مجرد مثال ده غير لغات البرمجة اللى تميز واحد للتانى في مجال كمبيوتر وهي مدى اتقانه للغات البرمجه يبقي مش اي حد يفهم في الكمبيوتر وانا واحد منهم بقول انا مش بفهم في الكمبيوتر زي طلبة حاسبات واسف على الاطالة

shimz كتب:: لكن مفيش حد مشجعنى و بيقولولى ان كل الناس بقيت بتفهم فى الكمبيوتر و ان هندسة حاسبات ملهاش لزمة

و الصراحة أنا مش مقتنعة بالكلام ده

فياريت حد يجاوبنى و أعرف رأيكم فى الكلام ده

اولا انا موافقة علي رد جودزيلا جدا
وثانيا احب اقولك ان تقريبا الناس كلها
بتقول نفس الكلام لكل واحد بيفكر يدخل قسم حاسبات
وانا عن نفسي سمعته كتيييييير
بس ما كنتش بقتنع خااااااالص
وانا عن نفسي وعن تجربتي بعد ما دخلت قسم حاسبات
اني متأكدة ان ده المكان اللي كنت دايما نفسي اكون فيه
ودي الدراسة اللي كان نفسي دايما ادرسها
انا كنت قبل ما ادخل قسم حاسبات .. بحب الكمبيوتر
وبحب افهم كل حاجة تتعلق بيه
والحمد لله كان مستوايا نوعا ما كويس
وبعد ما دخلت الكلية حبيت الدراسة دي اكتر
بعد ما درست منهج الترم التاني في اعدادي هندسة "فجوال بيزك"
وحبيت دراسة الحاسبات اكتر بعد السي ++ "الترم التاني من أولي كهربا"
بس بعد ما دخلت القسم .. حسيت نفسي ما كنتش اعرف حاجة
أو بمعني أصح اللي كنت اعرفه ما يجيش حاجة
جنب اللي عرفته في الترم الأول بس من تالتة حاسبات

عموما سؤالك عن الفرق بين خريج قسم حاسبات من كلية هندسة
وبين خريج حاسبات ومعلومات
انا رأيي ان الطالب قسم حاسبات في كلية الهندسة
بيدرس مناهج أشمل من مناهج حاسبات ومعلومات
لان مناهج حاسبات ومعلومات بتعتمد علي دراسة السوفت وير أكتر
انما قسم حاسبات في هندسة .. بتدرسي فيه كل حاجة
سوفت وير وهارد وير ومش معني الهاردوير هنا انك تعرفي مكونات الجهاز
ولا ازاي تركبيها ..
احنا بندرس تركيب الجهاز في سكشن واحد بس
انما ازاي بيشتغل كل جزء منه وازاي متوصلين ببعض
وازاي كل جزء بيحس ببقية الأجزاء .. دي مناهج بحالها
ده غير ان دراسة الحاسبات بتهتم مثلا بدراسة الشبكات
وقواعد البيانات وكل ده طبعا غير عالم السوفت وير

عموما خلاصة الكلام
لو انتي بتحبي دراسة الحاسبات حتتميزي فيها
واحنا في بلدنا حاليا محتاجين ان كل واحد يكون متميز في مجاله
واكييييد لما تدخلي القسم حتستمتعي بالدراسة فيه

وأخيرا يكفي اني اقولك
ان العيب الوحيد لقسم حاسبات عندنا
هو اننا بنتذل في أولي وتانية كهربا عشان ندخله بيبكى

طبعا الموضوع ده محير فعلا
عشان القسم اللى الواحد هيدخله بيعتبر مستقبله وانا كنت نزلت موضوع
فى قسم مدنى
اتمنى من حضرتك انك تشوفيه على اللينك ده

تعرف على كل شئ عن قسم مدنى فى هندسه اسوان( موضوع شااااااامل عن قسم مدنى )

شكر خالص للبشمهندس جودزيلا و البشمهندسة أميرة لردهم الجميل

وبجد أفدتونى و جزاكم الله خيرا

كمان شكرا للبشمهندس flying baby على رده و على الموضوع الجميل

عن قسم مدنى والى بجد زودنى بمعلومات كتيرة أول مرة أعرفها عن القسم ده

عندى استفسار آخر

والمرة دى متعلق بقسم مدنى

هل من اللازم ان الواحد يكون ممتاز فى الرسم عشان يخش القسم ده

يعنى الواحد مستواه فى الرسم جيد نوعا ما مش وحش و لا ممتاز

فهل ده يؤهله انه يخش مدنى

كمان أنا شفت طلبة أولى مدنى بيرسمه كتير فهل ده بيستمر لبكالريوس

ولا ده بيكون عشان هما فى أول سنة فبيدربوهم كتير

شكر وتقدير

العفو يا shmiz
انا هرد عليكي فى موضوع الرسم
طبعا الرسم مهم جدا خاصه لمهندس مدنى او بمعنى اصح مفيش مهندس مدنى
مش بيعرف يرسم ده لازم يكون بيرسم بس الموضوع ابسط مما تتخليه
الرسم اللى فى اولي مدنى ده يعتبر تمهيد للرسم لباقى السنين وعلى فكره ماده الرسم شيقه جدا وسهله اوي على العكس ماكنت انا شخصيا اتصور خاصه انا مش محترف بالرسم
والمواد اللى بيكون فيها رسم زي ماده الري وماده الخرسانه دول المادتين اللى بيكون فيهم رسم وطبعا بيستمر لغايه بكالوريوس عشان المادتين دول موجودين لغايه بكالوريوس
الكلام ده كله فى الجامعه بس او فى مرحله الدراسه
اما بعد التخرج وفى الحياه العمليه موضوع الرسم والمسطره واللوحه دي خلاص تكاد تكون انقرضت دلوقتى برامج الكمبيوتر هى اللى بتقوم بكل شئ
وعلى راسهم برنامج الاوتوكاد اللى تقريبا مينفعش اي مهندس يشتغل من غيره
سواء هيكون مهندس مصمم او تنفيذى والبرنامج ده ابسط مما تتخيله وموجود عندنا فى كليه الهندسه دورات وفى المعمل التخيلي
واي استفسار تانى انا فى الخدمه

shimz كتب:

ومعلش أنا عندى استفسار آخر

هو ايه الفرق بين خريج هندسة حاسبات و بين خريج حاسبات و معلومات

و هل هما بيتساو فى الآخر

كمان أنا لما دخلت هندسة كان القسم الى نفسى أخشو هو قسم حاسبات

لكن مفيش حد مشجعنى و بيقولولى ان كل الناس بقيت بتفهم فى الكمبيوتر و ان هندسة حاسبات ملهاش لزمة

و الصراحة أنا مش مقتنعة بالكلام ده

فياريت حد يجاوبنى و أعرف رأيكم فى الكلام ده

معلهش انا إتاخرت في الرد عن حاسبات لحد ما دورى خلص
ويمكن اجابة اميرة شاملة برده وكويسة
_ بس صراحةً انا برده سمعت بلاوى انى مادخلش حاسبات ودى مالهاش شغل
والناس كلها بقت شغالة بالكمبيوتر
هما كانوا قاصدين اللى بيكتبوا ع الكمبيوتر في المكتبات والسيبر هما دول اللى زادوا قوى يعنى

بس الحمد لله سبت كل دة ورايا واتجهت لحاسبات والحمد لله انى دخلتها ومسمعتش كلام حد

لان زى ما قلت لك القسم الى تحبيه حتعرفى ازاى تمشي فيه

تانى حاجة بالنسبة للفرق بين حاسبات ومعلومات وهندسة حاسبات

حتلاقى ان حاسبات ومعلومات ال 4 سنين بيدرسوا مواد حاسب معظمها خاص بالسوفت وير
بس برده فيه مواد هارد وير _ والهارد وير زى ما قالت اميرة مش مكونات الجهاز
لا _ انتى ازااى تعملى كمبيوتر من لا شئ _
حتلاقيهم في السوفت وير أى البرمجة يمممكن أعلى منك لو انتى مافهمتيش اللى بتاخديه كويس
ومازودتيش عليه مع نفسك ودة عشان هما بياخدوا الكورس بتاعك على كورسين او يمكن 3
يعنى احنا مثلاً خدنا كورس داتا بيز _ حاسبات ومعلومات خدوا 2 كورس داتا بيز او 3
بس الغريبة انك حتلاقى نفسك تعرفى 90 % من اللى هما خدوه ولو قريتى مع نفسك حتعرفى اكتر منهم
150 %
لكن في جزء الهاردوير حتلاقيهم اخرهم في حاسبات ومعلومات عارفين الديجيتال ديزاين
اللى حتاخديه في 2 كهربا ولو اتطراوا عن هاردوير الكمبيوتر حيبقى على بسيط
لكن انتى حتاخدى مادتين في حاسبات
Computer Organization+Computer Architecture
بجد حتحسي انك قبل كدة عمرك ما اشتغلتى ع كمبيوتر والناس الى بتبيع كمبيوترات
في المحلات وعاملين نفسهم متخصصين كمبيوتر حتبصى لهم من تحت لفوق
ولو الكمبيوتر هنج معاكى حيصعب عليكى البروسيسور وحتسيبيه لحد ما يشتغل وحده
:bounce:
يبقى هما حيكونوا أحسن مننا في ان كورساتهم مش مركزة زينا بس انتى عندك الفكر الكهربى
لانك انتى مهندسة كهربا قسم حاسب _ يعنى تعرفى مجال اتصالات ومجال باور
وعارفة حتربطى ال 3 دول ازااى مع بعض
وعشان كدة دحل مجال التحكم في هندسة حاسبات
واسم القسم عندنا
قسم الحاسبات والنظم
والنظم يقصد بها التحكم ، اتفتح لك مجال شغل جديد يربط كل كهربا ببعض عن طريق التحكم
ازاى تتحكمى في الأجهزة في المصانع _ الجهاز دة يشتغل وبعدين دة يشتغل ولما دة يشتغل
دة يقفل
ازااى تعملى عوامل الأمان في المصانع لحماية العمال _ ازاى تخلى شخص يتحكم في السد العالى مثلاً
كله وهو قاعد قدام جهاز كمبيوتر او لوحة كنترول
وازاى تشتغلى على ال PLC
ويبقى لك مجال شغل جديد في أكثر مجالات التحكم تطويراً مش كدة وبس
لكن انك تفهمى منظمة التحكم ماشية ازاى ودى كورسات د - عبد المجيد _ ودى مش سهلة اطلاقاًاااااااااااااا

وهما اه ممكن ياخدوا مادتين او 3 اكنر مننا ودة الصراحة اللى قارفنى
زى ال ذكاء الإصطناعى و برمجة الموبايل _
بس اهو الحمد لله ع كل شئ ونقدر المجالين دول تشوفهم مع نفسنا
او اللايحة هنا تتغير عشان في حاجات مالهاش لازمة

ودى لايحة مواد حاسبات ومعلومات اكاديمية طيبة الخاصة والشبيهة جداً بالحاسبات والنظم
لائحة هندسة الحاسبات والنظم أكاديمية طيبة

ايه بقى المواد اللى حتدرسيها في حاسبات ونظم
؟؟

1- كورس قواعد بيانات
2- كورس شبكات
3- كورس التعامل مع البروسيسور ولغة الأسمبلى
4- اخر كورس في البرمجة وهى الجافا
5- كورس متقدم جداً ف ال سي ++ وهو ال data structure
6-كورس دوائر الكترونية _ وحيعتبر اخر كورس في مجال الإلكترونيات والإتصالات
7- كورسين لأعلى تقدم في جهاز الكمبيوتر وازاى تطلعيه من الصفر Computer organization +
computer architecture
8- كورس التعامل مع البورتات الخارجية للكيسة ( أكيد التعامل البرمجى ) زى بورتات البرنتر وال USB ....
9- كورس ال Operating System أى الوندوز يعنى _ وهو ازاى تفهمى تعامل الوندوز مع مكونات الهاردوير
الصماء وازاى تنبض بالحياة عن طريق السوفت وير

10 خمس كورسات تحكم وانظمة التحكم وبما فيها كورس PLC

ياريت ماكونش نسيت حاجة
دة غير طبعاً تجارب التيست
والبرامج اللى ممكن تتسللى فيها كدة ع الماشىىى
زى مثلاً لغة ال VHDL
اللى تخليكى تصنعى هاردوير متكامل وانتى قاعدة قدام برنامج كمبيوتر ولغة
بسسس

حاسبات ونظم حلوة قوووى بس مايدخلهاش غير اللى حاببها بجد حيتعب فيها
ومايفترهاش سهلة _ مفيش اى شعبة في كهربا سهلة _

وللأسف الناس اللى بتدخل اولى و 2 كهربا حياخدوا برمجة بسسسسس
حيفتكروا ان حاسبات ونظم كلها برمجةةةةة
حيصيبوا بالنكسة الكبرى حيلاقوا مادة واحدة بس برمجةةة

ايه مجال شغلك بره
1- مجالات الشبكات _ في اكبر مراكز الشبكات في مصر والعالمى
مراكز سيسكو وجميع الشركات المتخصصة في الشبكات لان الشبكات مفيدة جداً في المصانع
وشركات قواعد البيانات وغيرهاا
2 مجال الهاردوير _ وهو التصميم الداخلى للحاسب وتطوير البروسيسور
بس الشركات دى مجالها مش واسع في مصر قوى
3- مجال قواعد البيانات _
ودة داخل معاه البرمجة وصميم قواعد بيانات ودة أفضل صورة له الأن
الحكومة الإلكترونية - حكومة بلا ورق او دفاتر
4- مجال الميكرو كنترولر وال Embedded system
ودة خاص بمحترفى الأسمبلى وعمل دوائر صفيرة او أجهزة كبيرة بالبرمجة
زى الغسالة الفول اوتوماتيك لو مفيهاش كمبيوتر حتبقى غسالة عادية
انتى اللى بتبرمجى الكمبيوتر اللى جواها
5- مجال تصنيع وتطوير أجهزة التحكم _
يعنى مش تشتغلى على جهاز PLC
لا انتى تصنعى جهاز بنفسك في شركة وتبيعيه
6- مجالات التحكم بكامل انواعهاااااااااا
في المصانع وفي السد العالى وفي ،،،،،،،،،،،،،
دى المجالات الأساسية انما فيه مجالات فرعية كتيييييييير وانتى ممكن تدخلى حاجات من نفسك

زى تطوير المواقع ع النت والويب جرافيكس والرسوم المتحركة دى تنميها مع نفسك في سهولة وتدخلى
مجال التصاميم _

بس أهم حاجة ان حالياً شركات الحاسبات المتخصصة كلها خاصة بمعنى

انها مش حتاخد حد غير بالكفاءة يعنى الاولوية أولاً لمهندسيى حاسبات ونظم
لكن لو مش كفاءة يبقى الأولوية لحد تانى _ وكمان التطوير المستمر للأفكار والتعليم _ لان
مجال الكمبيوتر بيمشى اول بأول بخطا سريعة جداااااااااااااا

وتوكلى على الله واختارى اللى يناسبك واحنا ما علينا غير اننا نقول لك
هو القسم دة يقدى يحقق لك ايه
وكمان لازم تبدى احترامك لجميع الأقسام الاخرى
زى ما انا بعمل كدة _ وعمرى ما قارنت قسمى بقسم حد تانى لان اكيييييييييد هو حيحتاجك
واحنا حنحتاجه ودة اللى بيحصل مع كل شعب كهربا

شكرا للبشمهندس flying baby على رده على استفسلرى

و بجد أفادكم الله يا بشمهندس و جزالك الله خيرا

للبشمهندس يحيى
بجد بقول لحضرتك شكرا جدا على اجابتك الوافية على سؤالى بخصوص هندسة حاسبات و الفرق بينها و بين حاسبات ومعلومات

وعلى المعلومات القيمة عن قسم حاسبات ونظم و الكورسات الى بيدرسوها
و الى خلت عندى خلفية كويسة عن هذا القسم

و بجد أنا كان نفسى حد من القسم يجاوبنى عن استفساراتى و أعرف رأيه فى الكلام الى كل الناس بتردده والى اتضحلى انه مالوش أى صلة بالواقع عشان اذا قررت اخش القسم ده ان شاء الله
أعرف أرد على أى حد ممكن يقولى الكلام ده و أعرف أقنع أهلى ان حاسبات مجالها أوسع مما هما متخيلين
و الصراحة حضرتك أجبت بشكل جميل جدا على أستفسارى
فشكرا كتير و جزاك الله خيرا

shimz كتب:: للبشمهندس يحيى
بجد بقول لحضرتك شكرا جدا على اجابتك الوافية على سؤالى بخصوص هندسة حاسبات و الفرق بينها و بين حاسبات ومعلومات

وعلى المعلومات القيمة عن قسم حاسبات ونظم و الكورسات الى بيدرسوها
و الى خلت عندى خلفية كويسة عن هذا القسم

و بجد أنا كان نفسى حد من القسم يجاوبنى عن استفساراتى و أعرف رأيه فى الكلام الى كل الناس بتردده والى اتضحلى انه مالوش أى صلة بالواقع عشان اذا قررت اخش القسم ده ان شاء الله
أعرف أرد على أى حد ممكن يقولى الكلام ده و أعرف أقنع أهلى ان حاسبات مجالها أوسع مما هما متخيلين
و الصراحة حضرتك أجبت بشكل جميل جدا على أستفسارى
فشكرا كتير و جزاك الله خيرا

الحمد لله انا سعيد جداااااا

انى أقنعتك بدخول القسم اللى بتحبيه

وربنا يكرمك وتتفوقى فيه

بس شدى حيلك في أولى و 2 كهربا حتلاقي فيها
ما يلم بكل شعب كهربا
وازاى تقدرى تستفيدى منها في تخصص حاسبات ان شاء الله
وفيها البرمجة الى حتقدرى تمشى فيها في التخصص
وتلمى بأقوى لغات البرمجة الحالية
ان شالله وكمان تستفيدى كويس من مادة الديجيتال ديزاين في 2 كهربا
اللى حتكون لك سلم قوى من اجل تكوين هاردوير الكمبيوتر
وبالتوفيق ان شاء الله

وأى استفسار انا موجود ان شالله اقدر أساعدك

YeHi@$MmZ كتب:: بجد حتحسي انك قبل كدة عمرك ما اشتغلتى ع كمبيوتر والناس الى بتبيع كمبيوترات
في المحلات وعاملين نفسهم متخصصين كمبيوتر حتبصى لهم من تحت لفوق
ولو الكمبيوتر هنج معاكى حيصعب عليكى البروسيسور وحتسيبيه لحد ما يشتغل وحده
:bounce:

اه والله
وكمان خلاني ابطل عادة اني افتح 80 برنامج في نفس الوقت
رأفة بالبروسيسور ..

وأخيرا كنت عايزة أضيف حاجة
عجبتني في قسم حاسبات
وهي انه القسم متطور إلي حد كبير
يعني اللي بتاخديه حيفيدك في الشغل بعد كده ..
مش مناهج قديمة وعفا عليها الزمن زي مواد كتير كنا بناخدها في اولي وتانية كهربا
والعالم من حوالينا بياخد حاجات غيرها تماما
انما بصراحة في حاسبات .. معظم اللي بناخده لسة حاجات حديثة
او علي الاقل متطورة وتقدري بعد ما تفهميها تكملي لآخر التكنولوجيا لوحدك

» دليل طالب اعدادى هندسة اسوان
» دليل طالب اعدادى هندسة اسوان ...........عرض بوربوينت
» ممكن معلومات عن اعدادى هندسة
» الى جميع طلبة اللى رايحين اعدادى هندسة اسوان
» اعلان هام جدا لمهندسى اعدادى اسوان