س : هو احنا شعب وحش ؟؟

مش عارف ابتدي منين الموضوع .

بس بصراحة انا نفسي اتكلم فيه من زمان ...موضوع غريب حبتين مش قادر اكون فيه رأي معين ...لكن مش عارف برده ليه قررت اني اتخذ الجانب الآخر وانا بتكلم فيه .

يمكن علشان كلنا دايما بنتكلم على الجانب الحلو ..ومحدش فكر يتكلم في الجانب الوحش ...اهم حاجة في الموضوع ده انه لن يكون موضوع مكتمل إلا بتعليقاتكم ...انتظر تعليقاتكم على الموضوع .اللي حيكون موضوع متجدد اضيف اليه التعليقات كل فترة واشارك معكم في التعليق .

ندخل في الموضوع ...هو شعب مصر شعب وحش ؟؟؟ سؤال مباغت صح ... اكيد هو شعب طيب ومسالم وغلبان لكن مش عارف ليه فيه مشاهد بتخليني أحس في اوقات كتير ان شعبنا مش شعب طيب وبحس ساعات إن احنا بنهجص على بعض لما نقول اننا شعب طيب استنى ما تردش دلوقتي خليني اقول حبة مشاهد وبعدين نرد سوا .

المشهد الأول :

هو ليه كل ما تحصل ازمة في البلد نلاقي الكل بيحاول يتربح من هذه الأزمة ...يعني مثلا لما انفلوانزا الطيور ظهرت ..ليه تجار اللحمة والسمك غلوا الأسعار ؟؟ واحد حيقولي العرض والطلب ...اقوله رغم اني مش شايف ان للعرض والطلب دور في الموضوع ده المسألة مسألة جشع وطمع لكن ما دمت مصر على رأيك ادخل على مشهد 2

المشهد الثاني :

سعر السكر غلى ..اكيد كل تاجر عنده مخزون شاريه بالسعر الرخيص ...طيب ليه محدش فكر يبيع اللي شاريه بالسعر الرخيص بتمن رخيص ولما يشتري البضاعة الغالية يبيعها بالغالي ...مش ده استغلال ...واحد حيقولي حالات فردية ..يا عم اتنين مليون بقال وتقولي حالة فردية ...طيب ادخل على مشهد تلاتة .

المشهد الثالث :

ليه في كل مصلحة وفي كل هيئة لازم علشان تحرك نفسك لازم تدفع فلوس ..؟؟ انا عمري فعلا ما دخلت مصلحة حكومية إلا ولقيت اللي بيطلب فلوس . ... انا مرة رحت اعمل فيش وتشبيه لقيت كل واحد بيطلع بعد ما يستلم الفيش جنيه ويديه للصول ..قلت يا واد صدر الطرشة خدت الفيش وما ادتهوش حاجة قام بصلي حتة بصة وقالي مفيش جنيه ولا ايه ...السؤال من بين آلاف المصالح الحكومية مفيش يا عالم مصلحة نظيفة .

المشهد الرابع :

عمليات النصب اللي اصبحت شيء شبه يومي في حياتنا ..كل دي عمليات نصب ...تقريبا عشرات أللآلاف من عمليات النصب حدثت في الفترة الأخيرة .

المشهد الخامس :

واحد راكب مشروع وبعدين يقع منه الموبايل ...يتصل يلاقي اللي لقى الموبايل طمع فيه وخده ورمى الشريحة ...ما تتصوروش انا ازاي اتخنقت من كتر تكرار هذا المشهد .

المشهد السادس :

مشهد لصوص الأحذية المنتشرين في المساجد بطريقة بشعة ..لدرجة انه اصبح من النصائح المتكررة لو معاك جذمة جديدة لازم تحطها قدامك في الجامع يا إما حتتسرق ....في رمضان الماضي في مسجد القائد ابراهيم في زحام صلاة التراويح العام الماضي كان يوميا يتم القبض على حرامي او اتنين .

المشهد السابع :

مشهد الناس اللي عندها صناديق القمامة منتشرة في كل مكان في الشارع ومع كده بيرموا زبالتهم في الأرض كل ما اشيل قشرة موز من الشارع افضل اسأل نفسي يعني ال ( ......) اللي رمى الموزة دي مش عارف انها ممكن تكسر رجل بني آدم لو داس عليها ؟؟؟ اكيد عارف طيب بيرميها ليه في نص الشارع ..حاجة تخنق .

المشهد الثامن :

مشهد الأعمى اللي ماشي في الشارع وعمال يتخبط في السكة وما حدش بيفكر يمسك ايده يوصله .

المشهد التاسع :

سواقين المشاريع اللي بيرفعوا سعر الأجرة وقت الضغط ويقسموا الخط اجزاء علشان ياخد الأجرة الضعف ..ما حدش بقى يقولي دول قلة ...انا اعتقد ان مصر فيها مالا يقل عن ربع مليون سواق مشروع ..متهيألي اللي ما بيعملش فيهم كده ممكن يكون اتنين .

المشهد العاشر :

مشهد المستغلين للسائح من اول البياع اللي بيبعله الحاجة باضعاف تمنها ..لغاية المتسول اللي يفضل قارفه في عيشته ...مرورا بسواق التاكسي وعامل الفندق الغتت والعيال الصيع اللي بيعاكسوا وبيتحرشوا ببناتهم . ..على فكرة الكتب اللي بتدي الأرشادات عن مصر للسياح بتحذرهم من المتحرشين جنسيا والبياعين المستغلين ...يا فضيحتنا .

المشهد الحادي عشر :

الحكايات المؤسفة والمحزنة للمقالب و النصب و الخدع والأسافين اللي بيعملها المصريين في بعض في الخارج وفي دول الخليج خاصة ...ما اظنش ان مفيش حد منا سمع عن الحكايات دي ...انا فاكر كان فيه صحفي مصري شغال في الأمارات كان بيحكي عن زميله المصري اللي كان بيجرجره لحوار يخليه يشتم رئيس التحرير وهو مخبي موبايل وبيتصل بيه على رئيس التحرير علشان يسمع .

المشهد الثاني عشر :

مشهد معدومي الشرف و الشهامة اللي بيعاكسوا البنات في الشوارع واللي بيتلزقوا في الأتوبيسات واللي بيتحرشوا في الشوارع انا اظن ان مفيش بنت ما عانتش من المصايب دي ...ده كفاية فضيحة اللي خرجوا يحتفلوا بكأس الأمم ...الجرايد رصدت اكثر من حالة تحرش بالفتيات خلال هذه المظاهرات التي كانت تهجم على أي سيارة فيها فتيات وتحاول التحرش جنسيا بهم ...ونشر عن الموضوع ده اكتر من جريدة مثل الدستور والمصري اليوم .

كفاية كده لكن انا عندي عشرات المشاهد من دي و اكتر ....مش عارف انا فعلا مش قادر اني اكون رأي في الموضوع ده ..هل احنا شعب وحش ؟؟؟ هل الكلام اللي بيتقال اننا شعب طيب وغلبان وفي حاله كلها عبارات أي كلام ومالهاش معنى ؟؟ وإن كل طيبتنا متمثلة في الطيبة مع ولي الأمر اللي ما نقدرش نقول بم عليه .

ولا دي حالات فردية وظواهر موجودة في أي مجتمع واني مزودها شوية وان الأصل في الشعب ده انه شعب طيب وغلبان بجد بس الظروف هي اللي فرضت عليه كده

انا مستني تعليقاتكم ...سواء بالنقد او بالتأيد ...

والله ياباشا كل مواقفك ده كلنا كل يووم بنتعرضلها وفعلا صدقك المقوله عندما سئل عمرو ابن العاص عندما كان في مصر فقال (هم شعب نساؤهم فتنه ورجالهم طرب وهم شعب إذا جاعوا حكموا ) انا معاك ان احن شعب هو الشعب المصري بس للأسف مش فالحيين غير في الهجص والنصب والتزويير والمعاكسات ده حته سمعت اليوميين دول بنصدر بناتنا للخليج يشتغلوا خداميين او بنبيعهم عبييد هناك و كمان يشتغلوا في الدعارة وللاسف طلعت صورتنا قدام باقي الشعوب العربيه مخجله للغايه ويا اسفاااااااه

اه بس مش معنى كده ان شعبنا شيطان والشعوب التانيه ملايكة الشعوب العربيه بردوه فيها نهب بس مش باين لان ثرواتهم مغطيه عليه ده غير ان اننا مهما كان تعدادنا كبير ومهما كان مصر ليها وضع بينهم والمصرى هوه بردوه اللى بنى الهرم وطرد الانجليز وقام بالثورة وغيره وغيره صحيح هوه الوقتى حالته بؤس بس بسبب الظروف وسياسة البلد لو بيقبض زى اللى بيقبض فى الخليج ولا بينام مرتاح من غير ما حرامى يا خد فلوسه ويهرب بيها برة البلد اكيد حاله ها يتغير صدقونى وخليكم متفاءلين ولو الوضع مش عاجبنا احنا اللى هانغيره ان شاء الله مهما كان دى بلدنا

أنا مش متفائل

صدقني بجد احنا شعب مش وحش وشعب طيب وغلبان جدا لكن كل مشكلته انه بيحب يقلد الوحش وممكن اوي نبقي كويسين لكن لما تبقي الدولة عايزانا كويسين ...يعني فيها ايه لو اللي سرق اتقطعت ايديه محدش هيفكر يسرق تاني وده طبعا مثال بسيط جدا المفروض اننا ننفذ اوامر ربنا في كل حاجة ونقلد الناس في الحاجة الكويسة بس وبكده ممكن نكون شعب كويس لكن لما ترضي عننا الدولة

شكرا على الردود الجميله.

» ليييييييييييييييييييييييه احنا لأ ؟؟؟؟؟؟؟؟؟
» عيب احنا مش ف اتوبيس يا.....
» احنا وهما
» احنا في سنة كام هجري.....!!!!!!!!؟
» احنا هنفضل مصريين