من أطلق الرصاص على محسن بتاع الفول؟؟

من أطلق الرصاص على محسن بتاع الفول؟؟

أنا عايز أعرف بقى فيه كام واحد غَنِى فى مصر؟؟
لا حضرتك.. مش الغِنَى العادى بتاع شغلة محترمة وعربية فيات وشقة تمليك بطلوع الروح.. أنا اقصد الغِنَى الفاحش بتاع القصور والعربيات 4*4=16 وحمامات السباحة والبودى جاردز اللى الواحد فيهم عضلة دِراعُه أتخَن من بطنى لما آكل مَحشى
كام واحد غَنِى فى مصر بقى؟؟
حضرتك السؤال ده منطقى جدا بعد الوجبة الدسمة من شلل الاطفال اللى شفناها فى مسلسلات رمضان.. والحمد لله كلنا ختمناها وشدِّينا حيلنا كمان فى العشر الأواخر
أنا ماشفتش ولا مسلسل بصراحة إلا أول يوم رمضان عشان كنت فى بيتنا.. المهم خير اللهم اجعله خير المسلسلات كلها عبارة عن عربيات شيروكى وبودى جاردز وحمامات سباحة ومجوهرات ودهب وياقوت واحمدك يارب
والخلافات كلها ازاى الملياردير ده زعَّل الملياردير التانى.. فالملياردير التانى خسَّر الأولانى كام مليار.. وبعدين اتصالحوا فى الآخر وكل ملياردير باس الملياردير التانى من بُقُّه والمسلسل خلص زى الفل
والأخت نادية الجندى.. أخت إيه؟؟؟ نينة نادية الجندى صحفية شريفة أى وعهد الله وبتدافع عن الأخلاق وبتجرى ورا الخبر والمستندات والصحف كلها واقفة على رِجْل
أيوة حضرتك فين الكلام ده بقى؟؟ صحفية إيه اللى بتلفّ وتتعب وتتنكَّر وتتقتَل وتتخطَف عشان خبر وللا قضية فساد؟؟؟
كنتوا اكتبوا فى تِتْر المسلسل بقى هذه الأحداث لا تمت للواقع بصلة وأى تشابه فى أرض الواقع يبقى انتوا اللى هُبْل
كلنا عارفين ان الصحافة كلها سبُّوبَة.. من أتخَن مؤيِّد لأتخَن مُعارِض..وعدوّ النهاردة حبيب بُكرة..مادام مرتب رئيس التحرير المعارض بيعَدِّى 35 ألف جنيه شهرياً ده غير نِسْبته من الإعلانات تبقى الحياة زى الفل ومفيش مشاكل ولا فساد
فكَّرونى برضُه بأفلام خالد يوسف الأخيرة.. الأبطال كلهم أغنيا بالصلا ع النبى.. حتى البواب عنده هيونداى على قَدُّه.. ورايحين يتفسحوا فى شاليه أى واحد فيهم ما كلهم عندهم شاليهات صلوا ع النبى وبعدين مالقوش حاجة يعملوها ولا يفكروا فيها قالوا يللا نلعب ويجا..طب بالله عليكم حدّ كِدَه يقعد جنب موظف راجع من شغله فى المترو .. ويقول له:لو سمحت ممكن نلعب ويجا مع بعضينا؟؟؟ الاحتمال الوحيد انه هيلعب صلَّح على قفاك
وللا العلاقات بين الجنسين.. دى بقى عايزة بلوج كامل..أى حد مذكر بيروح بيت أى حد مؤنث..والحد المؤنث عايش فى بيت أى حد مذكر..وطلع بالشيفروليه واحنا قاعدين.. وحَمِّل ع الشيفروليه واحنا قاعدين
فى فيلم وسط البلد محمد نجاتى بيقول لهند صبرى تعالى معايا الشقة.. هند صبرى بكل براءة وطُهْر قالت له:مفيش مشكلة..أنا اعرف ان الواحدة تروح شقة الواحد تشرب شاى ..تقعد تتكلم شوية..بس المشكلة ان الناس ممكن يفهموها غلط
طبْ حدّ يجيب كوباية عصير قصب بقى للراجل اللى اتجنَّن ده يااخوانا اللى هوَّه أنا
يعنى الواحدة تروح شقَّة الواحد تشرب شاى..اتمَنَع الشاى من البلد ما عدا فى شقة المحروس؟؟ وانا اللى عامل فيها مابحبِّش الشاى وعُمرى ما شربتُه.. دا انا من بكرة هاشترى مخزون شهر من الشاى من جميع الأنواع
أيوة الغرض من ده كله حاجة واحدة..فين المسلسلات بتاعتنا احنا؟؟
احنا مش بنشوف الحاجات اللى بتحصل دى ياجدعان..حد منكم شاف قصور وبودى جاردز وعربيات زى اللى بيحصل مع ابطال المسلسلات دى؟؟
وحدّ منكم شاف التحرُّر الرهيب ده بين أى بنت وولد فى الحياة..وان البنت تروح له البيت عادى؟؟ وبلاش نتكلم اكتر من كده عشان أنا حاطط وشِّى فى الأرض دلوقتى
ولو موجود يبقى كام فى المِيَّة من سكان مصر المحروسة؟؟
يعنى مش عيب تبقى كل مسلسلات وأفلام مصر عن ناس احنا منعرفهمش..أو حتى عن نسبة لا تتجاوز واحد فى المية من سكان بلدنا الحبيبة بتاعة مشربتش من نيلها؟؟
حد هيقول ده حسد؟؟ اقول له أيون حضرتك .. حسد وحقد وغلّ وكُرْه ومقت ونفسَنَة وما خَفِىَ كان أعظم
فين عربية الفول وساندوتش الكبدة اللى برُبْع جنيه وتذكرة المترو والأتوبيسات الخنقة والموظفين الغلابة اللى فيه فتاوى قالت ان يجوز عليهم الزكاة..والشباب اللى ع القهاوى
فين النت اللى عايزين يحدِّدوه زى النسل وفين مشاكل التأمينات والمعاشات
فين مشاكل الميَّة والزِّبالة اللى بقت على فواتير الكهربا ومش عارف إيه دخل الزبالة بالكهربا؟؟ جايز عشان اللى مايدفعش فاتورة الزبالة يكهربوه
فين مشكلة السَكَن والشباب اللى اتجوَّز على روحُه والبنات اللى بتشَمْشِم على عريس
مش هيَّه دى مصر؟؟؟
وللا مصر شوية صفقات وقصور وعربيات وبنات ستايل فى الجامعة بأحدث موبايلات؟؟
وللا يعنى ده عشان نفضل نقول ياريتنا زيهم.. ونفضفض عن نفسنا شوية
زى إعلانات السَمْنة.. الإعلان يجيب ألف صنف فراخ ولحمة وهُبَر هُبَر عشان يقنعك ان السَّمنة هيه السبب.. مع ان المشكلة مش فى جَوْدة السَّمنة حضرتك.. المشكلة مين اللى هيجيب لك الأصناف دى؟؟ دى الفرخة عندنا بتتقسم على أربع ليالى.. والشوربة بنشرب فيها أسبوع
وتلاقى الست الوالدة جايبة نفس نوع السَّمنة بس الفرخة مش زى اللى فى التليفزيون
الفرخة بتاعتنا م الآخر هيه فرخة لينا بتاعة مسرحية المتزوجون
دى مش حياتنا
يا جماعة يعنى واحد زى اللى قتل أمه من كام شهر عشان مش راضية تعطيه تلاتة جنيه ..لو شاف مسلسل زى بتاع نينة نادية الجندى والعيلة كلها عندها عربيات.. يعمل إيه؟؟؟
طب صحافة إيه وللا طبّ إيه وللا شغلانة إيه عموما اللى تجيب الفلوس دى كلها؟؟؟ طب حضرتك هما خرِّيجين آداب إنجليزى مش تبع الشغلانات دى يعنى؟؟؟
حتى فى الروايات البوليسية تلاقى كلمة السرّ دايما حاجة مش بتاعتنا..يقول لك مثلا
!!الثلوج تذوب دائما فى الصيف
يردّ عليه
!!ماعدا فى القطب الشمالى
وانا مال اهلى بالقطب الشمالى وللا الجنوبى؟؟
ليه مَتِبْقاش كلمة السر مثلا
موبينيل رخَّصِت كل كروت الشحن
يردّ عليه بفرحة: قُول وعَهد الله
فيغمِز له بعينه ويقول:بيقولوا الكارت بعَشْرة بس بيبيعُوه بِحْدَاشَر

اقتباس :: ليه مَتِبْقاش كلمة السر مثلا
موبينيل رخَّصِت كل كروت الشحن
يردّ عليه بفرحة: قُول وعَهد الله
فيغمِز له بعينه ويقول:بيقولوا الكارت بعَشْرة بس بيبيعُوه بِحْدَاشَر

اه والله يا ريت يتكلموا عن مصر شويه ويسيبوا الدولة الأجنبيه اللى بيتكلموا عليها
دى لأن المسلسلات بقت حاجه تقرف والأفلام كذلك وبخصوص موبينيل فدلوقتى
بقى الخمس دقايق بربع والمية دقيقه بخمسه جنيه زى اللمون يعنى بل أرخص!!!

شكرا على الموضوع اللى زى العسل والطحينه ده.

والله الموفق

اقتباس :: طب بالله عليكم حدّ كِدَه يقعد جنب موظف راجع من شغله فى المترو .. ويقول له:لو سمحت ممكن نلعب ويجا مع بعضينا؟؟؟ الاحتمال الوحيد انه هيلعب صلَّح على قفاك

ههههههههههههههههههههههههههه

ياريت تيجي علي كده بس

و الافلام و المسلسلات بقي كلها تهييييييييس ف تهييييييييييييييييييييييييس و حجات لا تمت للواقع بصله

بس المشكله ان الناس بتصدق كل حاجه

يعني انا راضي زمتكم

فيه ابن وزير ف بلدنا ممكن يتحبس عشان اغتصب نينه يسرا و صحباتها

و يتشنق كماااااااااااااااااان

ده لو ابن محافظ هيطلع منها زي الشعره من الضفيره

بس اهي حاجه يضحكوا بيها علي عقول الناس

والله ياحماعة انا مبحبش اسمع المسلسلات دي لأن انا عايش في مصر مش في دبي زي ما بتحسسنا المسلسلات دي وبعد كدة انا برشح يعملوا افلام وثائقية من الشارع وتبقى الناس ممثلين على الاقل مش هياخدوا فلوس مش زي اللي بيعملوا نفسهم بيمثلوا وبياخدوا مش لبفبوس بس لكن برده اذا لزم فراخ زي اللي في الاعلان ولا ايه برده
[ندعوك للتسجيل في المنتدى أو التعريف بنفسك لمعاينة هذا الرابط]

والله حاجة تحزن

زمان ايام ما كنت اسمع مسلسلات وافلام
كان تتكتب القصة بعدين يدوروا على الممثل المناسب
دلوقتى بيجيوا الممثل وبعدين يكتبولوا القصة المناسبة
وفى الاخر يطلعوا الممثلين دول ويقولوا
انا عملت المسلسل ده علشان اوصل رسالة للجمهور
وانا كل اللى يهمنى راى الجمهور مش النقاد
ههههههههههههههههه
هم يضحك و هم يبكى و هم يا جمل و همبورجر

» من أطلق النار على حبيبتي
» محسن
» موال الفول واللحمة لاحمد فؤاد نجم
» قلم الرصاص هو القلم الأكثر استخداماً
» الله يخرب بيتك يا محسن (نكته جامده)