ومين بعدك هتبقالى ام

ومين بعدك هتبقالى ام

ولا قلبك رفضنى يوم ولا باعنى
ولا فاتنى وجوعنى
وكنت اعطش يرضعنى
حنان وحنين
اقول لمين؟
يافايتة الضحكة نشفانة على لسانى
على عيونى
على قلبى
على يومى
وعلى جرحى
ياوخده الضحك من فرحى
وكنتى انتى اللى زارعاهلى
وكنتى صُحبتى واهلى
ولما ابعد بتندهلى
ولاعمرك نسيتى الملح فى عجينك
ولابطل عرق ينزل على جبينك
ولانشفتى منديلك
تملى كنتى شقيانة
عشان خطرى
عشان خيرك يكفينى
ويرضينى
ويبقالى تراب عينى
وانا لاعمرى كنت اشبع
ولا ببلع رغيف قوتى
غير الا اما تناولينى
يانور عينى
جناين شمسك المبدورة ف عروقى
تدفينى ف شتا عمرى
ونبضة قلبك الوناسة ف العتمة
كما الختمة
بترقينى
وتحمينى
من اللى جاى لنا بكرة
بدرتى الحب حنيه
طرح فيا ندى مبدور ف صبحية
تشقشق ويا نبض الفجر
وعايزة تفوتى قلبى جريح لصد الريح
وانا لسه ف حياتى كسيح
وحلم قبيح
ولسه عاجزة رجليا
ماشيلانى
ولسة هزيلة جدرانى
وساقفى برد غطانى
بحتة من سما ضلمة
وانا ف الدنيا واحدانى
غرقان ف القهر لودانى
ولابيا
ولافيا
ولا ليا بدونك حد
انا فى دنيتى اوحد
ومن غيرك بتبقى دنيتى كاللحد
جداره من م الالم والغم
ومين بعدك هتبقالى ام
ومين بعدك هتبقالى ام

د. فوزي أبو دنيا

بنت مصر كتب:: ومين بعدك هتبقالى ام

ولاعمرك نسيتى الملح فى عجينك
ولابطل عرق ينزل على جبينك
ولانشفتى منديلك
تملى كنتى شقيانة
عشان خطرى
عشان خيرك يكفينى
ويرضينى
ويبقالى تراب عينى
وانا لاعمرى كنت اشبع
ولا ببلع رغيف قوتى
غير الا اما تناولينى
يانور عينى

الله الله الله ,,, فعلا بجد كأن حضرتك بتتكلمي عن أمي

بجد أختيار أكثر من رائع ,,, وذوق أكثر من راقي كما عودتنا دائما بنت مصر

يصفق

الف شكر بشمهندس اسماعيل علي المرور الكريم
والكلام بالفعل بيوصف كل أم مصرية مكافحة

موضوع جميل

وامتى بقى نخلص السنة دى ونرجع البيت

ميرسى ل بنت مصر ع ها الكلام الجميل والاكثر من رائع بس فيين الابناء ال تقدر الكلام ده و قيمة الام واحنا مابنعرف قيمة الشئ غير لما نفقده

شكراً بشمهندس زايد علي مرورك الكريم
واعادك الله الي امك سالماً غانماً
وحفظك لها وحفظها لك

شكراً بشمهندسة اهداء علي مرورك الكريم