البقاء لله يا ريس ,,, !!!

البقاء لله يا ريس .. انا أم ابني مات وهو بيحاول يهج من البلد ويروح اليونان .. غرق هو واصحابه فيه منهم الي رجع ومنهم الي اكله السمك اصله مبيعرفش يعوم .. ومعرفوش أهله يلفوه بعلم مصر الحرير أصله ناكر للجميل ورمى بنفسه في التهلكه

البقاء لله يا ريس .. انا أم ابني الوحيد مات وهو واقف يستنى الترام .. وقعت على دماغه المحطه - رغم انها كانت جديده - ومات في الحال كان شايل في جيبه وقتها جواب ترشيحه لكلية الطب غلطته انه استنى التروماي

البقاء لله يا ريس .. انا أم ابني مات متكهرب وهو بيعوم في حمام سباحه غلطتي اني لبسته مايوه وملحقتش اسفره باريس ولا حتى يوصل المستشفى الميري .. لان صاعقة الكهربا كانت اسرع .. قدر ربنا وعطيته استردها

البقاء لله يا ريس .. انا أم ابني مات وهو بيدافع عن شباب البلد دي ضد تاجر مخدرات .. وكان يدوب عريس جديد ومطلعش حتى بزفة جنازه عسكريه بعد موته

البقاء لله يا ريس .. انا أم طفلي مات وهو بيتفرج على فرح من البلكونه برصاصه طايشه شقاوة عيال يا ريس

البقاء لله يا ريس .. أنا ابني كان عندكم في القسم خدوه من الشارع سليم رجعلي جثه .. واحتسبته عند الله شهيد .. مش هو كده شهيد يا ريس؟؟

البقاء لله يا ريس .. أنا ابني دكتور الجامعه مات وهو خارج من صلاة الفجر..عشان يسرقوا منه الموبايل .. غلطان حد قاله يخرج في ساعة متأخره كده وكمان يشيل موبايل

البقاء لله يا ريس .. أنا أم طفل بيموت كل يوم في المستشفى من سرطان وامراض الدم وعيوب خلقيه و .... لاني معيش تمن امبول الدواء .. و مستنيه نفقة الدوله .. قبل ما يموت زي الحيونات النافقه على سرير مستشفى حكومي

البقاء لله يا ريس .. انا اب ابني مات مولع في قطر الصعيد ومكنش حيلتنا غيره .. فات وسابلنا كوم لحم مراته وعياله وانا عاجز ومريض .. ياما قلتله بلاش تركب درجة تالته واطلع على السطح أو خليك في السبنسه

البقاء لله يا ريس .. انا ابني ومراته ماتوا في عمارة لوران في اسكندرية .. كانوا لسه عرسان مكملوش شهر العسل .. كان نفسي اشوفلي اي حفيد .. الا يعني ايه حفيد يا ريس ؟؟

البقاء لله يا ريس .. انا والد اسلام فاكره يا ريس ؟ ؟ اسلام اللى المدرس ضربه في قلبه موته رغم ان قلبه كان سليم وبكامل صحته .. كان من اشطر واهدى طلاب المدرسة .. ضربة قلبه حرقت قلبي عليه

البقاء لله يا ريس .. انا اب من الدويقة او كنت من الدويقة رجعت من شغلي لاقيت اطنان حجارة فوق اولادي ومراتي .. حاولت اغسّلهم معرفتش .. اصلهم طلعوا اشلاء بعد يومين وتلاته واسبوع .. كان نفسي صورهم تنزل في التليفزيون او حتى يتكتب اسمهم في جرنان اصفر يا ريس

البقاء لله يا ريس .. انا جد زيك مات ابني ومراته وعياله في عبارة السلام من البرد والغرق .. حد قالهم مياخدوش عوامات معاهم .. بس الحمد لله مماتوش لوحدهم اكتر من الف واحد مات معاهم .. وتخيل يا ريس ان التليفزيون مقطعش الارسال ولا ساعه واحده بالعكس ده سابلنا الماتش نتفرج عليه ونفرح بالفوز .. والاجمل ان صاحب العبارة طلع براءة من قتلهم .. اصلهم ماتوا موتة ربنا .. صحيح مش على فرشتهم ولا فرش خمس نجوم في مستشفى في باريس .. بس تعرف وحشوني اصل اعز الولد ولد الولد كان نفسي اشيل جثمانهم حتى يا ريس

البقاء لله يا ريس .. احنا شعب مصر كله الي مات واندفن من اكتر من 25 سنه من الفقر والجوع والمرض والتخلف والتعصب والقوانين وبلاش اكمل .. متزعلش يا ريس عمرحفيدك التاني ربنا يباركلك فيه

الموت مبينساش حد ..

ربك يصبرك ويصبرنا .. حاولت افتكر قد ما اقدر الناس الي ماتوا بس الذاكره مستحملتش من كترهم .. نهايته ..

البقاء لله يا ريس

**** تعليقي الشخصي ****

أنا بالتأكيد لما قريت البوست ده ,,, مش عارف ليه كده ترائي لي سؤال غريب

هل الموضوع موضوع أعلام ودعايه لطفل توفي الي رحمة الله ,, وهوه ده مثلا اللي مضايق الناس

ولا اللي مضايقهم فعلا ,, أن اللي حاصل في البلد ,,, حاجه ,, مش مجرد كلام ولا قصص تحكي عنها ,,, طب ما أحنا طووول عمرنا بنقول ان فيه ناس بتموت ,,, أشمعني كلامنا دلوقتي ,,, بقي ياجي عالجرح !!!

عموما ,, أنا بجد مش عارف أرد وأقول أيه ,,,!!!

,, أنا أكيد من قلبي بدعي لمحمد أن ربنا يغفرله هوه وباقي أبناء المسلمين

وصدقووووني ,,,, مافيش شماته في الموووووووووووووت ,, وربنا يرحم أمواتنا جميعا

وربنا يصلح الحااااااااااااااااااااااااااااال