الحلوه دى

الحلوه دى


الحلوه دى قامت صلت فى الفجريه

والصبح شقشق فى سماها شويه شويه

فردت شباكها على المالح .. زى امبارح

طلع الشبك بالخير طارح فى العصريه



الحلوه فردت ملايتها فى القيَّاله

وسط الإيدين الشقيانه والشغاله

سمِّت معاهم واتقاسموا .. رزق وقسَمُه

رب النعم سمُّوا بإسمه ورِضْيوا الحاله



الحلوه فردت منديلها هناك ع المينا

شراع يقابل ويودع كل سفينه

رسمت على المنديل رسمَه .. دمعه وبسمه

أصل الفراق والُّلقا قِسمهْ ووعد علينا



الحلوه نزلت فى المغرب تمشى شويه

وتْبل رجليها وتحضن قلب الميَّه

الموج يعاكس خطوتها .. ْلغاية بيتها

والشمس تغرب وساعتها بتشرق هىَّ



الليل يطل على عيونها ويرمى تحيه

يفرد نسيمه على الساحل يملا الدنيا

يحضن غناوى البحاره .. يْلف الحاره

يشفى النفوس الأمَّاره تْبات مرضيَّه



الحلوه مش بحر ومينا وليل بحاره

دى تاريخ وفن وميت مدفع وقت الغاره

ومناره للعلم ورايه .. وشوف ويايا

فى المكتبه ألف حكايه وألف أماره



مرسى وبوصيرى وقبارى وشاطبى وجابر

وياقوت وبشر وابو الدرداء نورهم طاير

يحضن سماها وميتها .. يبوس رملتها

يملا القلوب بمحبتها بقدرة قادر



ينده كُريِّم مِ القلعه يلم جنوده

حالف مايرحم كل اللى يعدى حدوده

هب النديم من بين الناس .. صحَّى الإحساس

قال عمرنا ما نوطِّى الراس سِلْوْ جدوده



درويش يمسِّى على الصحبه ويمسك عوده

وسلامه يعزف ألحانه ويرمى وروده

بيرم يلم الناس حواليه ..يبدر حكاويه

وكلامه دايما له معانيه وليه مردوده



القلب أبيض لون بحرك وعيونك نور

والروح خفيفه وبترفرف زى العصفور

برد الشتا فْ حضنك دافى .. وْصيفك صافى

وخريف سنينك متشافى بربيع مسحور



يا حبيبه قالوا كتير عنك وكتير إتقال

قالوا ماريا وصبيه ومليون موال

وهبوكى للبحر عروسه .. وْمَهرك بوسه

على ثغر مصر المحروسه بتزيده جمال



فؤاد66 ( من موقع الدي في دي العربي )