الآن دورة CCNA من الألف إلى الياء حصرياً وفقط في منتدى هندسة أسوان

تذكير بمساهمة فاتح الموضوع :

السلام عليكم ورحمة الله وبركاته
بعد التحية
أولا وقبل كل شيء هناك موضوعين قد كتبتهما من قبل مثبتين في قسم الشبكات أحدهما بعنوان
أكبر موضوع عن الشبكات
والآخر بعنوان : إعتذار ويجب إصلاح الخطأ
أرجو من الإدارة أن يتم حذف هذين الموضوعين وتثبيت هذا الموضوع لأنه إن شاء الله سيكون من الأهمية بمكان أن يتم شرحه
وسوف اذكر مجموعة نقاط لأوضح فيها كل شيء :
1- لما وضعت موضوع الشبكات كنت وضعته بسبب اني بحب المجال ده جدا وكنت مطلع على حاجات كتير فيه وكنت عارفه بشكل عام فكانت نيتي في الشرح اني هذاكر حتة حتة وأبدأ أشرح لكن نظرا لظروف قهرية مقدرتش أكمل الموضوع لأني مكنش عندي وقت اني أكمله بسبب الظروف دي وحتى لما وضعت الموضوع التاني واللي وعدت فيه بأني هكمل الموضوع كانت على ماأفتكر في أجازة نصف العام وبغض النظر عن الوقت لكن فعلا كنت في ظروف مايعلم بيها إلا ربنا لكن فعلا والله أنا بحمد ربنا جدا إني مشرحتش حاجة لأني كنت هاخد وقت طويل جدا في حاجات يمكن كان مش هيكون ليها لازمة .

2- في الدراسة طبعا مكنتش قادر أكيد اني أكمل الموضوع نظرا لضغط شغل الدراسة وزنقة الكلية ومكنتش بلاقي وقت أقعد على الجهاز علشان أكتب مواضيع مجرد اني ببقى فاتحه قدامي علشان ابحث في النت عن حاجة معينة وأنا بذاكر

3- في أجازات آخر السنة كنت الفترة الأخيرة يمكن من ساعة لما كتبت الموضوع وأنا في سفر مستمر فبرضه مكنتش بلاقي وقت أقعد ع الجهاز

وبعد ال 3 نقاط اللي فاتوا فأنا بعيد الكلام اللي قولته في أول نقطة الحمد لله ان ده حصل علشان أنا بجد ممكن مكنتش هقدر أفيد قوي في الموضوع ده زي دلوقتي ولعل الأسباب تتضح فيما بعد لكن في حاجات كتير جدا هتتغير في اسلوب الشرح وفي طريقة تناول المادة بالإضافة لأني أنا لوقتي أفكاري مرتبة كتير جدا في الموضوع ده عن زمان نظرا لأني والحمد لله وزي مااتحط موضوع قبل كدة في المنتدى واللي حطه صاحبي وحبيبي يحيى ممتاز اني الحمد لله خلصت أول شهادة من شهادات سيسكو واللي أنا بصدد شرحها تفصيليا في موضوعي ده إن شاء الله

لكن أرجو من الإدارة استبدال الموضوعين المثبتين بهذا الموضوع كما أشرت من قبل وبإذن الله يكون ده الموضوع المتكامل وتستفيدوا منه لأني بجد ملاحظ انه يمكن الشغل في الجانب ده قليل جدا في المنتدى ومحدش يزعل مني أنا بقول حقيقة في ناس كتير ولعل أغلب الناس في المنتدى بتبقى مواضيعها منقولة من منتديات تانية وأنا مبقولش ان ده غلط لكن في وجهة نظري المتواضعة إن تقبلتوها يعني انه لازم يكون صاحب الموضوع على دراية كاملة بتفاصيل موضوعه
دي حاجة الحاجة التانية بقى لاحظت ان كل اللي بيدخل علشان يشرح حاجة في المنتدى فهو بيقتطع جزء من موضوع كبير ويشرحه من وسط الموضوع ولعل نادر لما حد تناول موضوع من أوله لآخره بالشرح

الحاجة التالتة والأخيرة انه لعل يكون في نقص في المادة العلمية شوية ويمكن أنا بقول كدة لأني دايما بحب ان الحاجة يتم تناولها من بدايتها لنهايتها بشكل كويس ويمكن من أكتر المواضيع اللي عجبتني في المنتدى هو موضوع عمله البشمهندس محمد عبد الحميد في اسئلة مادة الفيلد وهي المواضيع اللي زي كدة هي اللي بتزود المادةالعلمية عند الطلاب بشكل كبير وبيبقى فيه تفاعل بين الطلاب والمعيدين ونشاط في المنتدى

وقبل أما أقول آخر حاجة وأنا ليه اخترت الموضوع ده بالذات علشان أشرحه فمش عاوز الإدارة تضايق من الكلام اللي قولته ده لأنها مجرد وجهة نظري من خلال اللي شايفه في المنتدى وهذذا لايقلل أبدا من شأن هذا المنتدى أنا روحت القاهرة السنة اللي فات ومكثت فيها فترة كبيرة جدا وكانت ال 3 شهور بتاعة أجازة الصيف السنة اللي فات من أفضل أيام حياتي رغم انها كان فيها تعب كتير جدا ويمكن خلال الفترة دي فعلا اكتشفت ان هندسة أسوان تقريبا ملهاش مكان على خارطة مصر وفي ناس كتير جدا متعرفش اساسا ان في حاجة اسمها هندسة أسوان ويمكن في ناس كتير جدا ممكن تعارضني في الموضوع ده لكن الأماكن اللي أنا كنت فيها واللي سمعت منها الكلام ده مهما حد عارضني في ده فلا يمكن أبدا اني أصدق أي حد يقوللي ان هندسة أسوان معروفة في مصر
لكن رغم كل اللي قولته فوق كنت في مرة في سيمينار في شركة فسألني البشمهندس انت في هندسة ايه قولتله في هندسة أسوان فلقيت ناس كتير كانوا معايا من جامعات مختلفة عارفة الكلية من المنتدى وقالولي بجد احنا مشوفناش منتدى هندسة زي المنتدى بتاعكم والكلية بتاعتكم معرفنهاش إلا من المنتدى وأثنوا جدا على الشغل المعمول في المنتدى فكنت سعيد جدا بالكلام ده علشان كدة انتوا لازم تسعوا في انكم تخلوا المنتدى ده صرح علمي بجد علشان يبقى أحد العوامل اللي تتعرف بيها الكلية ويبقى ليها صوت في مصر

الحاجة اللي عاوزأوضحها بقى هي أنا ليه اخترت الموضوع ده بالذات والأسباب اني أنا زي ماقولت فوق أنا بحب جدا المجال ده فأكيد إن شاء الله هبقى في شرحه أفضل من أي مجال تاني والحاجة التانية اني بجد حبيت اني أوري الناس وأحسسهم الفرق بين المجال العملي والنظري وإزاي بيتربطوا ببعض وعلشان أقدر أوضح للناس اللي بتقول ان مفيش علاقة بين العملي والنظري . لا أكيد طبعا فيه علاقة يمكن متكونش واضحة قوي بس هي موجودة وربنا يوفقني وأوضحها

أما بقى آخر حاجة فهي أنا عاوزأوضح الموضوع سياقة هيمشي إزاي وهرتبه إزاي
إن شاء الله هيكون الموضوع على هيئة دروس اسبوعية مرتين في الأسبوع علشان أدي فرصة للناس اللي مهتمة أنها تذاكر واللي عنده أسئلة يبدأ يسأل وعلى قدر ماربنا يوفقني هجاوب وإن شاء الله هبدأ شرح من الأسبوع اللي جاي من يوم السبت القادم بإذن الله .
وهنا أنا هحط العناوين اللي هنتناولها بالشرح في الكورس علشان يبقى الكورس واضح قدامكم

CCNA COURSE CONTENTS :
1-NETWORK INTRODUCTION
2-TCP/IP MODEL
3-DATALINK LAYER
4-INTERNET OR NETWORK LAYER -----> IP ADDRESSING & SUBNETTING , DHCP , DNS
5-TRANSPORT & APPLICATION LAYER
6-ROUTERS & SWITCHES ( S/W & H/W)
7-ROUTING PROTOCOLS
8-SECURITY ( ACCESS CONTROL LISTS)
9-SWITCHING
10-REMOTE ACCESS ( WAN TECHNOLOGIES : ISDN , FR, DSL)
11-WIRELESS LAN ( WIFI )
12-SECURITY ATTACS & SECURITY DEVICES
13-VPN ( VIRTUAL PRIVATE NETWORK )
14-IPv6 ( IP VERSION 6 )

بس كدة كدة تمام قوي يارب بس أقدر أخلص نصهم الكورس طويل ولذيذ وفيه بعض الحاجات الرخمة في الوسط بس لما تتعودوا عليها هتلاقوها من أفضل الحاجت في الكورس
بس أهم حاجة تدعولي أنجح السنة دي ونخلص بقى أنا مليت من المذاكرة كفاااااااااااية خلاص جابت جاااااااااااااااز

رابط الدرس الأول
[ندعوك للتسجيل في المنتدى أو التعريف بنفسك لمعاينة هذا الرابط]

خلاص نزل يا بشمهندس كل درس فى موضوع منفصل مع مراعاة وضع الرابط الخاص

بكل درس فى الموضوع ده وربنا يعينك ان شاء الله

والله الموفق

شكرا ليك يا بشمهندس و بالتوفيق ان شاء الله و على فكره انا أسمى كريم من أكاديمية الشروق شعبة علم حاسب

السلام عليكم ورحمه الله وبركاته

ازيك ياباشا
صراحه موضوع لزيز اوى وخفيف على الفهم

وبكل صراحه يابشمهدس حمستنى انى ادخل معاك فالمود

ربنا يوفقك وينفعنا وينفعك بعلمك وروحك الطيبه

السلام عليكم ورحمة الله وبركاته
قبل كل شيء أحب أقول للبشمهندس كريم أهلا وسهلا بيك في منتدى هندسة أسوان
وأهلا بأكاديمية الشروق كلها في منتدانا المتواضع
وإن شاء الله متندمش انك سجلت هنا وتحس فعلا انك استفدت
وجايز المنتدى يكون شوية لسة بيقوم على رجله لكن إن شاء عندي أمل كبير في ربنا انه يبقى من أفضل المنتديات العلمية في الشرق الأوسط إن شاء الله ومفيش حاجة بعيدة عن ربنا سبحانه وتعالى.

طيب دلوقتي بقى نرجع لموضوعنا واللي هيكون إن شاء الله ختام المقدمة الطويلة قوي دي اللي قدمت بيها للموضوع
وآخر جزئية في الموضوع ده أنا بصراحة مش عارف ابدأها منين لأني حاسس المعلومات في راسي غير مرتبة لكن هعمل زي مابعمل دايما اني هكون على طبيعتي وهقول أول حاجة تيجي على بالي وربنا إن شاء الله يساعدني في ان المعلومات تيجي ورا بعض

أول حاجة هتكلم عن الفرق بين سيسكو وميكروسوفت لكن أحب أقول ان الموضوع ده هرجعله تاني إن شاء الله خلال الشرح فأقدر أقولكم اني مش هقدر أوضح كل حاجة دلوقتي لأن فعلا في حاجات بتبقى متعلقة بالشرح في الموضوع ده لكن بشكل عام نقدر نقول انه طبعا سيسكو لاتعد أبدا من منافسي ميكروسوفت في السوق لأن زي ماقولت قبل كدة ان كل واحدة بتشتغل في مجال بمعنى ان ميكروسوفت مثلا شغلها كله في مجال النتوورك سوفتوير مثلا بتعرفك إزاي تقدر تشغل سيرفر إزاي تقدر تتعامل مع أنظمة التشغيل المختلفة زي اليونيكس واللينكس والويندوز بتعلمك كل تفاصيلهم وإزاي تقدر في كل واحد منهم تظبط الشبكة بتاعتك بالإضافة لأنها بتعلمك كل أسرار الحاجات دي . جايز أنا مكنش عارف كل حاجة عن شهادات ميكروسوفت واللي عاوز يستزيد في الموضوع ده يدور فيه ع النت لكن كل اللي قولته فوق بخصوص الشهادة الخاصة بمجال الشبكات بتاعة ميكروسوفت واللي اسمها MCSE واللي هي اختصار MICROSOFT CERTIFIED SYSTEMS ENGINEER وعلى حد علمي انها عبارة عن 7 تراكات كل تراك بتتعلم فيه حاجة وكل تراك ليه امتحانه الخاص بيه لو انت خلصت أول 4 تراكات فبتبقى معاك شهادة اسمها MCSA أو MICROSOFT CERTIFIED SYSTEMS ADMINISTRATOR وأول لما تخلص ال 4 الباقيين بيبقى معاك MCSE
ومجملا يعني ان شغل ميكروسوفت بيبقى كله من خلال جهاز الحاسب الآلي بتاعك بس والتطبيقات بتاعته اللي هي البرامج .
أما بقى بخصوص سيسكو فسيسكو كل شغلها هاردوير ولما أقول هاردوير يعني هاردوير نتوورك مش المقصود بيه هاردوير كمبيوتر بمعنى آخر ان سيسكو بتعرفك إزاي تقدر تتعامل مع راوتر مع سويتش مع HUB أو بردج أو مع آكسيس بوينت أو حاجة اسمها CALL MANAGER بمعنى انك مبتتعاملش مع جهازالحاسب انت بتتعامل مع المكونات الصلبة للشبكة نفسها إزاي تقدر تعمل كونفجريشن على راوتر وتعمل عليه سيكيوريتي وإزاي تقدر تهيئه علشان يشتغل على فويس وينقل فويس إزاي تقدر تعمل كونفجريشن لبروتوكول معين عليه وهكذا وعلشان كدة هنلاقي ان الإتنين سيسكو وميكروسوفت بيكملوا بعض مش منافسين لبعض .

ودلوقتي بقى نيجي للموضوع التاني وهما منافسين سيسكو في السوق هما مين بالضبط مادام ميكروسوفت طلعت مش أحد المنافسين . إلى عهد قريب لم يكن لسيسكو أي منافسين في السوق على الإطلاق كلها كانت شركات صغيرة لحد أما طلعت من حوالي 4 أو 5 سنوات شركتين بدأوا صغيرين جدا وسيسكو فكرت في انهم زيهم زي أي شركة تانية مش هيبقى ليها اي مقارنة بجوارها لكن تفاجأ سيسكو في فترة قصيرة جدا ان الشركتين دول بدأوا يكبروا جدا في السوق وهتلاقوا اسم الشركتين دول بجانب شركة سيسكو حاططهم في توقيعي
الشركة الأولى اسمها جونيبر JUNIPER والشركة دي أحد أكبر عوامل نجاحها انها تمتلك عقول غير عادية بدأوا يفكروا صح وبدأوا يشوفوا ايه نقاط الضعف عند سيسكو اللي يقدروا يطوروا فيها قوي ويكون التطور فيها متاح , فبدأوا ينظروا لمجال الوايرلس والفويس ووجدوا ان المجالين دول لسة يدوب بيبدأوا وموصلوش لحاجة تقدر تخليهم متميزين في المجالين دول فبدأوا ينظروا لمجال الرواتينج والسويتشينج ووجدوا ان المجالين دول سيسكو برعت فيهم بشكل كبير جدا بدليل وزي ماهتشوفوا في الشرح ان سيسكو عملت أذكى راوتينج بروتوكول مخترع حتى الآن ومحدش قدر يطور في البروتوكول ده لحد دلوقتي ولا يجيب حاجة افضل منه فنظرت بقى شركة جونيبر لآخر أمل ليها وهو السيكيوريتي وبدأت تدور فيه كويس ومعروف ان السيكيوريتي دايما قبة الهرم في مجال النتوورك لأنك متقدرش تشتغل فيه غلا إذا كنت عندك أساسيات نتوورك كويسة فبدأت تدرس كل حاجة تخص السيكيوريتي بالنسبة لسيسكو وبدأت تلاحظ ان في بعض الحاجات سيسكو مقدرتش تغطيها في مجال السيكيوريتي فبدأوا يلعبوا على الوتر ده وفي خلال قترة قصيرة جدا بدأوا يخترعوا بروتوكولات جديدة في السيكيوريتي وبقي السيكيوريتي بتاعهم أفضل من سيسكو وتبعا لذلك بدأوا يفكروا انهم يعملوا شهادات زيهم زي سيسكو فطلعوا شهادات فعلا في الرواتينج والسويتشينج والسيكيوريتي والفويس والوايرلس لكن كات أفضل حاجة عندهم هي السيكيورتي . ويمكن تبين ليا لما نزلت الكتاب بتاع جونيبر في الراوتينج انه اللي يدرس الراوتينج بتاع سيسكو بيبقى بالنسباله الراوتينج الخاص بجونيبر تقريبا ولا حاجة كانه بيراجع معلوماته . أما بقى عن أجهزة الشبكة اللي جونيبر بتصنعها فثبت أنها أفضل من أجهزة سيسكو في حاجات كتير ودلعلى كدة ان شركة موبينيل كان غيرت أجهزة الشبكة المركزية CORE NETWORK كلها وخلتها جونيبر وكذلك فودافون .
أما بقى الشركة التانية المنافسة لسيسكو وجونيبر في السوق فهي شركة اسمها هواوي HWAWI وهي شركة صينية وأكيد طبعا الصين لازم تاخد نصيبها في الموضوع لكن هواوي جايز ليها شهادات انما نادرا ماحد بيسمع عنها وكمان أجهزتها مفيش أي مقارنة بينها وبين اجهزة سيسكو وجونيبر في السوق لكن بشكل عام هي شركة اشتهرت في وقت قليل وبقت بتنافس في السوق الشركتين السابقتين ويمكن ده لأنها بتعرف إزاي تعمل دعايا لنفسها .

بكدة نكون خلصنا المقدمة لكن معلومة أحب أقولها يعني عرفتها قريب ان شركة سيسكو لقت انها أجهزتها محدش بيشتريها غير الشركات الكبيرة لأنها أجهزة غالية جدا فحبت أنها تدخل البيوت فبادرت بشراء شركة من أشهر الشركات في العالم وهي شركة لينكسيسLINKSYS واللي هتلاقوا ان كل راوترات لينكسيس اليومين دول عليها شعار سيسكو وكمان اسعارها ارتفعت في السوق بشكل ملحوظ وده لأن سيسكو عاوزة تنتشر اكتر في السوق العالمية .

أرجو ان المقدمة دي تكون عجبتكم واللي عنده أي إستفسار يتفضل وأنا تحت أمره وكمان الموضوع مش قاصر عليا لوحدي اللي عنده معلومة وعاوز يضيفها أهلا وسهلا بيه

وإن شاء الله غدا نبدأ أول الدروس
والسلام عليكم ورحمة الله وبركاته

شكرا على المجهود دة وربنا معاك

شكرا على المجهود وربنا معاك

شكرا يا اخى

بارك الله فيك وجزاك الله خير على المجهود دة

جزاكم الله خيرا""

اولا احب اشكرك جدا على المجهود الهايل ده وان شاء الله يجعله فى ميزان حسناتك فقد وعدت واوفيت وربنا يعينك تكمل الدورة
ثانيا اسلوب الموضوع ممتاز ياريت يستمر على هذا الحال
يعنى التنوع مطلوب من عامي او فصحى او فرانكو اراب
المهم يكون مفهوم (وبالفعل هو كذلك بارك الله فيك )
وانا ان شاء الله متابعة للنهاية
ربنا يوفقك والى الاماااااااااااااااااااااام دوما

طيب بداية كدة إن شاء الله هيكون كل الشرح على مواضيع منفصلة على المنتدى وهحط رابط الموضوع هنا ودي أنا شايفها أفضل حاجة بمعنى ان كل عنوان من اللي أنا كاتبه إن شاء الله هشرحه في موضوع منفصل وأضع الرابط بتاعه هنا إن شاء الله
وشكرا لكل اللي تابعوا واللي هيتابعوا الموضوع معايا

دي اول حاجة
الحاجة التانية قبل أن أبدأ في الشرح فأنا أود ذكر حديثين للنبي صلى الله عليه وسلم
الحديث الأول هو أنزلوا الناس منازلهم
والحديث الثاني من لم يشكر الناس لم يشكر الله
وبناءا على هذين الحديثين فأنا طبعا لازم قبل الشرح أعطي الحق لصاحب الحق والفضل الكبير عليا وأنا يمكن لما أذكره محدش يعرفه لكن هو الشخص اللي علمني هذا الكلام ومندمتش ابدا أني درست الكورس عنده
اسمه البشمهندس أحمد نبيل
جايز هو ميكونش معروف في أسوان
لكنه معروف جدا لدى كل مهتم بالشبكات على نطاق واسع جدا في القاهرة
إنسان أمين جدا جدا وكل كلمة قالهالنا سواء في الشرح أو نصايح عامة استفدت منه فيها جدا حتى في الإمتحان وأنا بمتحن حسيت فعلا بمدى أمانة وصدق هذا الرجل
فأنا بشكره من أعماق قلبي لتبسيطه للمادة العلمية لهذا الكورس تبسيط لا أعتقد أبدا ان ممكن حد في مصر كلها ممكن يبسطه أكثر منه
بارك الله له في أهله وماله وعمله ورزقه الله الفضل العالي في الدنيا والآخرة
وإن شاء الله انتظروا أولى الدروس في المساء إن شاء الله
والسلام

مشكور على المعلومات القيمه والله العظيم انه مجهود اكتر من رائع وانشاء الله ربنا يوفقك

ممكن يا اخي لو تنزل المقدمه بملف

جزاك الله خير ياباشمهندس ماقصرت كلنا انتظار للدورة اسلوب رائع وان شاء الله نستفيد وتكمل الموضوع في انتظارك الآن دورة CCNA من الألف إلى الياء حصرياً وفقط في منتدى هندسة أسوان - صفحة 2 360126

الآن دورة CCNA من الألف إلى الياء حصرياً وفقط في منتدى هندسة أسوان - صفحة 2 360126

اليم هو السبت طيب وفين المحاضره انا منتظرها من بعد صلاة المغرب الى 11 مساء بفارق الصبر

السلام عليكم

معلش يا بشمهندس ناصر أكيد البشمهندس محمد معاه ظروف أو تكملة الدرس أخدت منه وقت

بإذن الله يوافينا فى أقرب وقت بعمله إن شاء الله.

ويا ريت يا بشمهندس محمد تضع فى الحسبان ملحوظة الأخ اللى قال تضع الدرس فى

ملف وورد أو بى دى أف ويا ريت كمان ترفعه على كذا سيرفر ويفضل إنك ترفعه

من خلال الموقع [ندعوك للتسجيل في المنتدى أو التعريف بنفسك لمعاينة هذا الرابط] لأنه بيرفع على كذا سيرفر برفعة

واحدة وأتمنى التوفيق للجميع وفى إنتظار درسك الأول إن شاء الله.

والله الموفق

أنا بعتذر جدا جدا عن تأخير الدرس لكن والله انهاردة كنت في مشاكل مايعلم بيها إلا ربنا ومعلش يابشمهندس صالح
أما بقى بالنسبة لوضوع اني أعمل الدرس في ملف وورد أو بي دي اف
فأنا والله في الوقت الحالي معنديش وقت خالص علشان اقدر أنسقه
فممكن أي حد يتبرع بالموضوع دهعنل ويساعدني فيه لحد أما ألاقي وقت بس
لأن مشروع التخرج واخد جزء كبير من وقتي
وده رابط الدرس الأول
[ندعوك للتسجيل في المنتدى أو التعريف بنفسك لمعاينة هذا الرابط]
ومستني أسئلتكم إن شاء الله

شكرا بجد على المجهود الرائع دة

مبدأيا شكرا كتيييييير علي المقدمة
وجزاك الله كل خير
وحتي الان مفيش اي اسئلة
يمكن كانت اسئلتي نفس اسئلة يحيي .. والحمد لله اجاباتك كانت واضحة جدا

بخصوص ترتيب المقدمة ووضعها في ملف بي دي اف
فأنا ممكن اعمل الحكاية دي
بس انا حاليا مش عندي البرنامج .. هادور علي طريقة وان شاء الله اجمع الشرح في ملف

شكرا على كل خدماتكم الرائعة

اسال الله ان يحل لك كل مشاكلك ومشكور على المقدمه الرائعه

السلام عليكم ورحمة الله وبركاته
أنا بعتذر جدا لكل الناس اللي متابعة موضوعي
مش هقدر أكمل الدرس الأسبوع ده ولا يوم السبت نظرا لظروف سفري
لكن إن شاء الله أوعدكم بالإنتظام بعد كدة
بس ادعولي انتوا ان السفرية دي تكون موفقة إن شاء الله
وبعتذر مرة تانية وياريت الناس متضايقش
بس الأجازة دي شكلها كدة متشقلبة مش عارف ليه
ربنا يستر بقى

ربنا معاك و مستنيينك تكمل الدرس ان شاء الله أما ترجع بالسلامة

مرحباً بك في القاهرة يا محمد
وسفرية موفقة ان شاء الله

بجد موضوووع مدهش _ واناا نرفزتك في الأول
وقلت لك على الله يكمل _ عشان تكمله

وانا استفدت كتيييييييييييييير قوووووى الصراحة _
وكنت بسمع عن شركات Juniper و هواوى دى

بس ماكنتش عارف هما بتوع ايه !!__ تسسسسسسسسسسسسسسسسلم

وبالتوفيق

وحقابلك النهاردة الساعة 5 أوكى ؟؟

الآن دورة CCNA من الألف إلى الياء حصرياً وفقط في منتدى هندسة أسوان - صفحة 2 Icon_wink

وشكراً للباشمهندس أحمد نبيل
جزاه الله كل خير
وياريت الناس كلها تبقى زيه

السلام وعليكم ورحمة الله وبركاته:
بصراحه شديده انا جدا سعيد بهّذا الشرح والله يعطيكم العافيه يارب ويبارك فيكم وتقديري لكم وشكرا

» !~¤§¦ممكلة حلول الكتب Solution Manuals ¦§¤~!~¤ô_ô¤~ لقسم كهرباء ~¤ô_ô¤~×÷·.·°¯`·)» ( حصرياً على منتدى هندسة أسوان ) «(·°¯`·.·÷×
» مهرجان تعليم الفيجوال بيزك O?°· (مع Amir وال Programming Team ) |][حصرياً على منتدى هندسة أسوان
» دورة الأورااكل سكوال _ الأن على منتدى هندسة أسوان SQL 4 orac
» أكبر موضوع عن الشبكات :حصريا على منتدى هندسة أسوان
» ¨¨¨°~*§¦§ مهرجان تعليم الفيجوال بيزك والسي شارب §¦§*~°¨¨¨O?°· (مع Amir وال Programming Team ) ·°O][||ioi||][حصرياً على منتدى هندسة أسوان][||ioi?