أكاديمية الدور السادس !!

السلام عليكم ورحمة الله وبركاتة

بالطبع فيه حاجات كتيرة مش بنختارها فى حياتنا زى جنسنا وجنسيتنا وبابا

وماما وأخواتنا وقرايبنا حتى أصدقائنا اللى بنحبهم ساعات بنحس إنهم إتولدوا

معانا وشىء لا بد منه ومينفعش نعيش من غيرهم أساسا حتى ساعات بيبقوا

غلسين ورخمين بس برضو بنحب غلاستهم ورخامتهم ولو لقيت صاحبك فى يوم

مش بيغلس تستغرب ليه مش بيغلس ، إيه اللى جرا فى الدنيا معاه وأبو لسان طويل

ليه مطولهوش النهاردة وأبو ضحكة جميلة برضو ليه مضحكهاش النهاردة.

وساعات إحنا اللى بنختار وبنحدد بس للآسف بنخطأ الإختيار زى ما يكون إختيارنا

هو سبب إخفاقنا وبيبقى عقاب لينا وعدم إختيارنا هوه سبب سعادتنا ونجاحنا فى كتير

من الأمور اللى مينفعش فيها الإختيار.

للآسف المرة دى أنا لم أختار وللآسف برضو طلع الإختيار زى الزفت وللآسف

"كده تلاتة للآسف" أنا ساكن فى الدور السادس !!!

أكاديمية الدور السادس !!

الموضوع مش سهل زى ما حضراتكم فاكرين لأن أساسا مفيش سكن عدل فى

أبو الريش بجوار كليتنا يعنى ومفيش سكن رخيص ونضيف وأساسا كلمة رخيص

دى بطلوها من زماااان كل حاجة دلوقتى غالية وخصوصا فى أبو الريش حتى السكن

الزبالة غالى بس لما يبقى سكن زبالة وفى ابو الريش وغالى وكمان دور سادس !!

ده شىء لا يصدكه عكل !!!

لو قولنا أول دور ميضرش ، تانى دور لا يضر ، تالت دور يضر بشروط ، رابع دور

يضر بدون شروط ، خامس دور بقى يضر جدا ، أما سادس دور فده ضار جدا بالصحة

ويسبب العقم لدى الرجال !!

شوف أنت لو شغال عبد أحمق عند واحد من كفار قريش لن تفعل ما نفعله يوميا !

تطلع من الشقة مفيش فتفوتة تنساها علشان لا سبيل للرجوع وممكن تاخد معاك

بطانية وزمزمية ومهلبية وكل أدواتك الهندسية علشان رجوعك تانى سيمثل خطر

على الناتج القومى فى هذا البلد ، وتدلف على السلالم دلفا وتخرج من العمارة خروجا

وتهبط فى المزلقان هبوطا وتصعد فى المصعدان صعودا وتركب فى السلالم ركوبا

وتجلس فى البنشات جلوسا !!

القصة فائحة الرائحة دى هى الجدول الدورى بتاعك كل يوم اللى بتمشى وبتعفص

عليه وطبعا الجدول ينفع من قدام ولورا إنما يتعكس وفى أول ساعة من النهار

مينفعش طبعا لازم تخلص كل حاجة فى الدنيا وتتصل بالناس اللى معاك فى الشقة

علشان يعرفوا إنك جاى فى السكة مش علشان يعلقوا كهارب ويزغردوا ويلبسوا

ترتر ويحطوا روج ولا النايم يتعدل لأ طبعا حاشا وكلا ده علشان اللى عاوز حاجة

يطلبها بالمرة بقى ما أهو نظام إستعباد يا معلم !!

وليكن جميع ما سبق لا يمثل أدنى مشكلة بالنسبالى بالعكس دنا هفترى وهقول لو

ساكن فى الدور التسعين وكليتى فى أفغانستان وقافلين الباب اللى فى أفغانستان

وفاتحين الباب اللى فى طاجكستان هروح بتاع طاجكستان المركز ورغما عن أنفى

وحنجرتى هذهب زاحفا على أسنانى وعنيا وودانى لأنى بحب كليتى حب محدش

حبه لحد مفيش !!

أيضا وجودك لوحدك فوق فى السما أو بالظبط بين السما والأرض وإنعزالك عن

العالم الآخر لأن مفيش حد يجرؤ من أساسة إنه يزورك !!

طيب ده مين اللى داعية عليه أمه وخالته وعمته ونفر من الأمة هيطلع العدد ده من

السلالم والأدوار وهينزلة تانى !!

وحتى جميع الزيارات متشابهة كل اللى جاى مش بيقول غير ما تركبوا أسانسير

يا دموع الندم إنه جه والمعرفة الطين دى يا بيسكت خالص لأنه بيروح فى غيبوبة

خصوصا المدخنين ونفضل نحكى أكتر من عشر دقايق فى الأدوار العالية وأنت تجاوب

نفس الإجابات وبتضطر تهزر وتضحك وترفه عن الضيف ليموت فى إيدك والكلام مكرر

كله ينفع يتسجل على شريط والكل بينسى أهل الدار اللى طالعين نازلين رايحين جايين

قاعدين واقفين طايرين زاحفين سكستين سفنتين من الدور الظريف ده أينعم فيه بعد

إقتصادى فى الموضوع وهو وفر عام فى الشاى والسكر والحاجة الساقعة لأنه محدش

بيجيلك بس اللى هتوفره هيروح فى اللى هيركب الأنبوبة لفوق ده لو رضى اساسا أو

فى العلاج والبقشيش علشان الناس ترضى تجبلك حاجات معاها !!

المية مش بتوصل للدور السادس غير بموتور رفع وقراء العدادات مش بييجوا غير

بعد تلات أو أربع شهور يكون الفواتيرأتكومت ودخلنا فى الشريحة الأعلى ونكع بقى

فى الفلوس ولا المتجوزين ومعاهم عنبر عيال ده حتى النت يا مؤمن ساعات مش بيوصل

أو بتبقى سرعته ضعيفة الظاهر بيتعب فى الطلوع عاوزلة موتور رفع يرفعه ويرفعنا إحنا كمان !!

شوفوا كل اللى عدى وليكن ملهوش لزمة ممكن تنسوه أو تحشوه ، وليكن نحن نعيش

فى أزهى العصور وعايشين ببلاش سفلقة على قفا الدولة وريسنا اللى بيخر عسل وطحينة

بيطلعنا بنفسه للدور السادس كل يوم وبنروح الكلية طايرين على على بساط الريح وبيوصلك

البساط لغاية مقر الكنيست ذاته أو مبنى المدرجات يعنى وكمان من عرقنا بنينا سد مش عارف

إزاى بنوه بالعرق مش بالركام بس أهو أغنية وفايزين ونعديها بس جميع ما سبق عادى ولكن

كله إلا الريحة !!

قانون نيوتن السابع كما تعلمون ولا تعلمون بيقول الرائحة بتطلع إلى الأعلى يعنى سيادتك

تكون ساكن تحت مش هتشم الناس اللى فوق طابخين إيه إنما لما تكون ساكن فى الدور

السادس وبتطل شقتك على مطابخ تلاتة وعشرين شقة بيتباروا طول الشهر فى طبخ اللحمة

والفرخ والرز والتقلية والمحمرات والمشمرات وإحنا قاعدين فوق وكأننا مصنوعين من حديد

نشم الريحة وبكل كبرياء نقول يععع وأقفز فوق السرير وأقولها من كل قلبى لم تتلغب المرأة

على الرجل فى أى مجال حتى الطبيخ والكل يتنهد وأنا أسبقهم ونردد بس الأكل ريحته حلوه

يبقى إزيك بقى ؟؟!

فى بلاهة منقطعة النظير ولما نكون طابخين نفتح جميع الشبابيك وخلاص شوية وهنبعت

على زمارة وميكرفون وننادى فى معشر البنى آدمين جيرانا أيها القوم نحن نحمر البصل الآن

فإسمعوا وعوا أو شموا وأعوا بس بصلة مقابل تلاتة وعشرين بصلة على فص توم وممكن

تضرب فى تلاتة فى أكياس الرز واللحم والفراخ والأسماك وهكذا تشعر بأنك تحارب التتار

فلا شفقة ولا هوادة ولا إستسلام حتى وأنت بتحاول تطلع ريحة الأكل بإيدك وعاوز تجيب

شفاط علشان ميحصلش فقد فى الريحة ونقيسه بالجول بعد كده ولكن لا مفر من طبق بيض

وقطعة جبنة ولانشون مع إختلاف الترتيب وإتفاق المحتوى بقية الشهر !!

ده حتى زميلك لما تكون عاوزه يشرحلك حاجة من فلسفة ابن رشد اللى بناخدها مسافة ما

يوصلك يقولك نسيت الكلام أو نسى ورقة صغيرة قال إيه فيها كل حاجة وتضطر تضرب

مشوار وتروح معاه وهكذا دواليك ومشاوير وبواسير إلخ إلخ.

طيب إيه رأيكم برضو كل ده ولا حاجة ومفيش حاجة أثرت فينا وإحنا لا مؤاخذة مش بناكل

مقضينها مراهم من اللى بتتاخد فى الفضاء ما إحنا برضو رواد فضاء الدور السادس وكل

وسائل الترفية متاحة لينا من تكييفات ومياه معدنية كاملة النقاء والموتوسيكل بتاع كنتاكى

ربنا يديله الصحة بيوصل لغاية باب الشقة والمذاكرة بندوبها فى كوبايات ونشربها عالريق

ونجيب فى الإمتيازات بقى والمصحح يحتار يطلع فينا غلطة بس كون إن جيرانك يبقوا

مذكر سالم ميضرش إنما يبقى مؤنث سالم غانم ده بقى اللى مينفعش !!

اللهم أكفنا شر البنات الحلوين الأمامير فئة المزز "اليومين دول بس يعنى" وخصوصا

لما يبقوا جيران للطلبة لأن توافر بنت جميله فى سنين التعليم بيؤدى إلى مد غير مباشر

ومط فى السنين فسنتك تبقى زايدة شهر ودراع كمان !!

طيب جارتك ماشى وقفلنا الشباك وأى ضيف تاخده تحت السرير علشان ميبصش ويجبلك

الكلام والشيطان طبعا إن سابك أنت هيمسك فى اللى جمبك المهم برضو هيبقى فيه نوع من

أنا عاوزة من ده يا حزنبل أنا عاوزة من ده !!

طيب جيران وعدناها إنما فى الكلية مثلا لأ يبقى كده إستقصاد ولو فى دفعتك ونفس سكشنك

لأ يبقى كده تلم هدومك وتروح عندك ماما وتقولها "cover me and cry" ما أهو

خلاص مخك هيتلحس وربنا يعوض عليك فى اللى هيروح من كل حاجة وأنذر بالفشل وحكاية

إنى الحب بيساعد على التفوق والنجاح ده فيلم عربى أم الأجنبى ملناش فيه خالص فتعمل

إيه بقى !!

لا لا إنسوا إحنا برضو مش بنتأثر وقلوبنا لا مؤخذة فى إيدينا وإيدينا تحت رجلينا ولابسين

شرابات وجزم مش بتعدى الهوا وأتخن مزة فيكى يا أسوان ولا بتاكل معانا عيش ولا فول

ونبصلها من فوق لتحت وممكن تسد مناخيرك كمان ولا يهمنا حد لأن المشاعر ماتت من زمان!!

شكلى ببالغ هاه !!

ساعات كتيرة الواحد يتطرق إليه شعور غريب كده إنه عاله على المجتمع وأعماله بلا فائدة

بس الإحساس ده يمكن إلى زوال وده إحساس مش هنختاره لو أتيح لينا الإختيار وإحساس

مينفعش الواحد يستمر بيه أو عليه وأستطيع القول بأن إختيار ما لا نريد أفضل بكثير من

أن نجبر على ما نريد !!

أخيرا فى الدور السادس إحنا مرتاحين آخر راحة محدش يفتكر إننا تاعبنين خالص

أو بنعانى بالعكس يمكن راحتنا لقيناها فى التعب والشقى والعرق فى إنك تحس

بمجهود وتبذل أقصى ما عندك لتواكب المرتاحين والقريبين واللى مش بيتعبوا

وأكيد إحنا مش هنتعب ولا هنشقى ولا هنيأس لأننا بنتعلم كل يوم دروس كبيرة

وكتيرة من أكاديمية الدور السادس.

والله الموفق

انا دوخت فى الادوار العليا اللى طلعتهالنا دى
كنت نسيت خلاص ما مضى
ربنا يكون ف عونكم وتخلصوا الهم ده

اقتباس :: بتطلع إلى الأعلى يعنى سيادتك

تكون ساكن تحت مش هتشم الناس اللى فوق طابخين إيه إنما لما تكون ساكن فى الدور

السادس وبتطل شقتك على مطابخ تلاتة وعشرين شقة بيتباروا طول الشهر فى طبخ اللحمة

والفرخ والرز والتقلية والمحمرات والمشمرات وإحنا قاعدين فوق وكأننا مصنوعين من حديد

نشم الريحة وبكل كبرياء نقول يععع وأقفز فوق السرير وأقولها من كل قلبى لم تتلغب المرأة

على الرجل فى أى مجال حتى الطبيخ والكل يتنهد وأنا أسبقهم ونردد بس الأكل ريحته حلوه

يبقى إزيك بقى ؟؟!

بطلوا حقد بقى زمان الناس اتسموا

مش عارفة اقولك ايه يبشمهندس بس غير ان الموضوع ده اجمل موضوع قريته حتى الان

وده لانه ناتج عن تجربه شخصية كما هو واضح ومبين
بس انا عايزة اقولك ان ربنا مش بيضيع تعب حد
انا عشت تجربة مماثلة تماما لهذه التجربة ومتتخيلش كنت فى حالة يرثى لها
بس اهم حاجة انك كفاية انك وسط اصحابك بيحبوك ويخافوا عليك
ودعوات اهلك الدائمة ليك
وحضرتك كتبت الموضوع ده كفضفضة او تعبير عن ظروف الطلبة فى ابو الريش
لكن متتخيلش اثر ده على اللى قرا موضوعك
اشكرك لانك خليتنى اشكر ربنا واستغفره لانى نسيت النعمة الى انا فيها بعد ما كنت بعانى من كل انواع المشاكل اللى ممكن يواجها مغترب السنة اللى فاتت والحمد لله عدت ...
وان شاء الله حستقبل الترم التانى بنفسية افضل وحماس اكتر
ربنا يوفقك يبشمهندس وجزاك الله كل خير

بصـراحة مقالة أكثر من راااااائعة كعادتك دوماً

ولكن بمقدار ما هي مقالة مضحكة ولذيذة جداااً بمقدار ما هي مقالة حزينة لواقع مؤلم

عندما كنت بالصف الثانوي كنت أتمني أن أسافر لكلية خارج أسوان
كنت حابة جدااااا أن أجرب حياة الإغتراب وكنت أعتقد انها حياة ممتعة جداااااا
أحسد كل من يتمتع بها فأنه يتمتع بالحرية

ولكن كان كل من حولي يقولون لي انها ممتعة ظاهرياً فقط لمن لم يجربوها
ولكنك لن تستطيعي تحمل الحياة في الغربة لان الغربة صعبة جداااً بعيداً عن أهلك
تتصرفين وحدك تتحملين مسئولية نفسك

بجد لم أعي كلامهم هــذا إلا بعد أن دخلت الكلية ورأيت ما يعانونه زميلاتي
وكم يتمنون لو أنهم يعودون إلي بلدهم وكم من مشاكل يواجهونها
وكم من صعاب عليهم ان يتحملوها في سبيل هذا التعليم وقتها فقط فهمت الكلام
الذي قيل لي سابقاً وحمدت الله حمداً كثيراً علي اني موجودة في بلدي ووسط أهلي

من مقالتك هذه تجسد لي كل شئ وكأنني حاضرة في كل موقف وكأنني أنا التي تصعد
وتنزل من تلك السلالم لتتصارع مع الحياة الخارجية بكل ما فيها

وتصورت فعلاً لو انني نسيت شيئاً ما فكيف أصعد كل هذه السلالم مرة أخري ،،، يا الله !!!

ممكن تكون المشكلة مش في الدور السادس وبس ،،
المشكلة في الافتقاد لاشياء كثيرة والشعور بالوحدة والمسئولية والعزلة عن باقي العالم ،،،

يمكن انا عمري ما ححس بالموقف ده زي اللي هم فيه
فعلاً بجد ربنا يكون في عونكم وتخلصوا من الكلية دي علي خير

بجد مقالة جميلة جداااااااااً والأجمل انها بتحكي عن تجربة شخصية صادقة
ربنا يزيدك كمان وكمان ونفضل نقرأ مقالاتك للأبد

وأسفة جداااً علي الإطالــة

بجد يابشمهندس مش عارفه اقولك ايه غير ان المقاله غايه ف الروعه وجايبه من الاخر ف اللي بيحصل فينا ف اسوان

شوف أنت لو شغال عبد أحمق عند واحد من كفار قريش لن تفعل ما نفعله يوميا !

تطلع من الشقة مفيش فتفوتة تنساها علشان لا سبيل للرجوع وممكن تاخد معاك

بطانية وزمزمية ومهلبية وكل أدواتك الهندسية علشان رجوعك تانى سيمثل خطر

على الناتج القومى فى هذا البلد ، وتدلف على السلالم دلفا وتخرج من العمارة خروجا

وتهبط فى المزلقان هبوطا وتصعد فى المصعدان صعودا وتركب فى السلالم ركوبا

وتجلس فى البنشات جلوسا !!

ههههههههههههه

بالظبط اللي بيحصل وبيبقى يوم اسود لو حد نسي حاجه بس لاقينا حل رائع للموضوع الشحاااااااااااته من اي حد ف الكليه
وبالنسبه للزيارات فاحنا اللي بننزل للناس تحت بس احنا مش بنحقد على روايح حد لاننا تقريبا مش بنشم حاجه
والدنيا ماشيه والحياه بيس
ياللا ربنا يعدي اللي فاضلنا فيها على خير
بجد مقاله رائعه يابشمهندس

مقاله رائعه بالفعل وتجعل كل من يقرأها يستشعر مدي المعاناة التي يعانيها الطلبه المغتربين وعسي الله ان يكلل جهودكم ومعاناتكم بالنجاح والتفوق وغداً ستصبح كل هذه المعاناة ذكريات تبتسمون وربما تضحكون عندما تتذكرونها
سلم قلمك المبدع دوماً يابشمهندس

edbs كتب:

انا دوخت فى الادوار العليا اللى طلعتهالنا دى
كنت نسيت خلاص ما مضى
ربنا يكون ف عونكم وتخلصوا الهم ده

اقتباس :: بتطلع إلى الأعلى يعنى سيادتك

تكون ساكن تحت مش هتشم الناس اللى فوق طابخين إيه إنما لما تكون ساكن فى الدور

السادس وبتطل شقتك على مطابخ تلاتة وعشرين شقة بيتباروا طول الشهر فى طبخ اللحمة

والفرخ والرز والتقلية والمحمرات والمشمرات وإحنا قاعدين فوق وكأننا مصنوعين من حديد

نشم الريحة وبكل كبرياء نقول يععع وأقفز فوق السرير وأقولها من كل قلبى لم تتلغب المرأة

على الرجل فى أى مجال حتى الطبيخ والكل يتنهد وأنا أسبقهم ونردد بس الأكل ريحته حلوه

يبقى إزيك بقى ؟؟!

بطلوا حقد بقى زمان الناس اتسموا

شكرا لمرورك يا بشمهندسة دعاء وربنا يكون فى عونا جميعا إن شاء الله

ومش حقد والله بس أنا بقول مفيش تكافؤ فرص يعنى العمارة مش كلها طلبة فيه جيران وكده فتلقى

الإختلاف اللى حاصل ده فى الأكل العام للعمارة وربنا يزيدهم يا بشمهندسة وبلاش احنا !

شكرا مرة تانية

والله الموفق

eng_masrya كتب:: مش عارفة اقولك ايه يبشمهندس بس غير ان الموضوع ده اجمل موضوع قريته حتى الان

وده لانه ناتج عن تجربه شخصية كما هو واضح ومبين
بس انا عايزة اقولك ان ربنا مش بيضيع تعب حد
انا عشت تجربة مماثلة تماما لهذه التجربة ومتتخيلش كنت فى حالة يرثى لها
بس اهم حاجة انك كفاية انك وسط اصحابك بيحبوك ويخافوا عليك
ودعوات اهلك الدائمة ليك
وحضرتك كتبت الموضوع ده كفضفضة او تعبير عن ظروف الطلبة فى ابو الريش
لكن متتخيلش اثر ده على اللى قرا موضوعك
اشكرك لانك خليتنى اشكر ربنا واستغفره لانى نسيت النعمة الى انا فيها بعد ما كنت بعانى من كل انواع المشاكل اللى ممكن يواجها مغترب السنة اللى فاتت والحمد لله عدت ...
وان شاء الله حستقبل الترم التانى بنفسية افضل وحماس اكتر
ربنا يوفقك يبشمهندس وجزاك الله كل خير

أشكرك شكرا جزيلا لكلامك الجميل فى حق هذا الموضوع أختى المهندسة وطبعا فيه مثل بيقول اللى يشوف بلوة

غيره تهون عليه بلوته وطبعا الموضوع ده كتبته بالفعل فضفضة وأيضا تعبير لما يعانيه كل المغتربين من الطلبة

مع إختلاف المفردات وربنا يعين كل زملائى على ذلك وإحنا الحمد لله بنشكر ربنا على هذا الحال وسنعمل

فى هذه الظروف بإذن الله وربنا يوفقنا ويوفقك يا بشمهندسة وتكونى دائما فى أحسن حال

والله الموفق

» تعلن أكاديمية أفق عن عرض خاص لفترة محدودة
» لائحة هندسة الحاسبات والنظم أكاديمية طيبة
» افتتاح أكاديمية سيسكو بكلية الحاسبات و المعلومات – جامعة عين شمس
» ملخص اليوم السادس
» أكاديمية البحث العلمى: 8 ملايين مصري مصاب بمرض السكر