الخطوبة

الموضوع: نصائح للاكل بعد الخطوبة طبعا للبنات , والشباب يدخل
أختي العزيزة لو ربنا فك عقدتك واتخطبتي
فإليك نصائحي حتى تأخذي بخطيبك من مركب الخطوبة إلى مثوااااه الأخير في قفص النسانيس
قصدي قفص الزوجية السعيد

أجمل ما في الخطوبة العزومات الرومانسية على أحلى محلات أكل فى البلد
واللي عمرك ماهاتشويفها بعد الجواز
المهم نصائحي لك عند أي عزومة مع خطيبك

الشوكه والسكينة

الأول لازم تعرفي إن الشوكة والسكينة بيتمسكوا من إيديهم
من الطرف يعني مش من الوسط ولا من البوز زي الخنجر ولا من فوق طبعًا

العيش

العيش أوعي تفضحينا وتقطعيه بسنانك ولا الرغيف نصين بأيدك وكل نص لقمة وتحشري أوعي
العيش بيتقطع بالسكينة فى الطبق وبعدين تاخدي لقمة
لقمة بالعافية قال يعني نفسك مسدودة
اضغطي على أعصابك جدااا
وبعدين لما تروَّحي إبقي حِفِّي زي مانتِ عايزه

الشوووربة

بند الشوربة ده مهم جدًاااا
أبوس رجلك الشوربة تتشرب من غير صوت خالص ومن غير ماتقعدي تنفخي فيها زى القهوجى اللى بينفخ فى حجر للزبون
وطبعــاً عايزك تنسى تمامًاالسلطانية اللي بتقيميها على بقك ف البيت وتدلقي على روحك
بالمعلقه وبدون صوت
سخنة ولعة برضه بدون صوت
وتسيبي تلت الطبق ع الأقل مش تميليه عشان تلهطيها لآخر نقطة

الرز

طبعاً بيتاكل بالشوكة أوعي إيدك تتمد ع المعلقة وتغرفي من طبق الرز وتعبي
إوعي
الرز بالشوكة وكأنك بتبوسيه مش بتاكليه

المكرونة

الاسباكتي برضه بالشوكة تتلف على طرف الشوكة
لحد ما تخلص وبعدين تحطيها فى بؤك من سكات
مش تشفطي المكرونة عود عود

الجمبري

إذا كنتي عارفاه
أول ماطبق الجمبري ينزل.. بصيله بقرف واحتقار شديدين
آل يعني زهقانة من كتر أكل الجمبري الجامبو ف بيت بابـا
وأتنهدي جامد وقولي.. برضه؟؟؟
وتروحي قاطعة راس الجمبرياية بالشوكة
أنا فى عرضك إنسي المصمصة دلوقتى

البطاطس
سواء مسلوقة أو محمرة
أوعي تهرسيها وتدبيها على الرز وتدي
لا..لآ...لآ
بالشوكة حتة حتة وإنتى زي ما تكوني هاتعيطي من كتر ما البطاطس صعبانة عليكي

الفاكهة

لو الفاكهة فيها بذر.. طلعيه من بؤك بالراحة وحطيه فى إيدك وهي مقفولة
وبعدين فى طفاية السجاير اللي على الترابيزه
أوعي ياحبيبتي من نظام التفتفة للبذر
إنسي

<لما تخلصي>

ولما تخلصي أكل تحطي إيدك على بطنك
اللي عصافيرها بتصوصو من العينات اللي كلتيها.. وتقولي له مش ممكن
أنا عمري ما اتفجعت كدة
أنا قدامي أسبوع هابطل أكل فيه
وبعدين تمسكي الفوطة اللي دايمًا موجودة على التربيزة من غير لازمة
وتبوسيها
آل يعني بتمسحي بؤك
وبعدين تستأذني منه لدخول التوليت لإصلاح ماكياجك
وتخشي التواليت وتطلعي من شنطة إيديك
لفة الفول والطعمية اللي جايباها معاكي
وبالهنا والشفـــاء

الخطوبة 751592

السلام عليكم

طبعا الموضوع جميل جدا من الجانب الكوميدي علشان كده انا ضحكت بما فيه الكفايه هههههههههههههههههه

لكن بصراحه وبوضح الكلام ده كله ما ينفعش هي فتره الخطوبه دي عملوه مش علشان انا نافق وهي تنافق

وبعد كده المؤذن اللي كتب الكتاب يسترزق مرتين

مره في زواجي منها ومره من طلاقي منها

فتره الخطوبه مرحله مكشوفه علشان كل واحد منهم بعرف اي عيوب التاني

علشان لو لاقيتها مليانه عيوب الحق وطير وافلت بسرعه هي زواجه واحده في العمر في الزمن المهبب ده

بس بصراحه انا معترض جدا علي الخروج مع خطيبتك في فتره الخطوبه كفايه تقابلها في بيت والدها

طبعا كلامك مظبوط يا باشمهندس ومش محتاج اى نقاش

وأنا لما نشرت الموضوع ده نشرتو بس بغرض الضحك يعنى...... ومش أكتر

ومش قصدى طبعا إن البنات فى فترة الخطوبة يظهرو على غير حقيقتهم

بس للأسف فى الغالب الأيام دى هو ده فعلا اللى بيحصل وتلاقى البنت فى فترة الخطوبة زى النسمة الرقيقة
وبعد كده بتكون حاجة تانية خاااااااالص

بس ربنا يسهل الأول والبنات تنفك عقدتها وتتخطب.....هاهاهاهاهاهاهاها

لا موضوع جامد والله
بس انا ممكن قبل ما اكل اقولة يا حبيبى
انا هاكل بس علشان انت معايا وبتفتح نفسى
وادخل على الاكل اخلصة دا بفلوس
هههههههههههههههههههههههههه
طبعا هتقولى انى بعمل كدة
لا والله انا غلبانة وباكل شندوتش صغنون بس
وممكن اشبع لما اشوفة بس

ياساتر عليكو...
دانتوا مصايب يابنات

» الخطوبة
» ممكن تباركولى على الخطوبة ؟؟؟؟
» 10 أسئلة يجب ان تسأل اثناء الخطوبة ....
» تهنئة من القلب للمهندسة إيمان بمناسبة الخطوبة السعيدة
» أجمل التهانى للمهندس الحسين صابر على الخطوبة السعيدة