تخيل !!?

***********

تخيل فى دمك جينات الأسود

وفاقت شجاعتك جميع الحدود

وقابل تقابل

مئات
القنابل

وتهلك مُقابل

ترابك يعود

تخيل ولادك بتصرخ بأأأه

بتصرخ فى كل القلوب العُصاه

تخيل معانا

ولادك جعانا

ولادك حزانا

ولادك عُراه

تخيل يوماتى بتنزل دماك

ودخان قنابل عدوك عماك

وغيرك متابع

نيران المدافع

ورافض يدافع

دقايق معاك

تخيل بإنك هـ تفضل تعانى

ودايق آلامك بكل المعانى

طالما اللى شايف

مغمض وخايف

مكبر وهايف

مطاطى وأنانى

تخيل قضية سعادتك فشنك

عشان الضمير اللى نايم فى بنج

عشان العدالة

فى إيد العِمالة

وأصل العِمالة

يا ريس ! يا كنج

تخيل أنينك بيملا الوجود

وجرحك معدى المدى والحدود

لكنك مثابر

مسالم وصابر

لـ ذُل المعابر

وقفل الحدود

تخيل حياتك خريطة
طريق

بتقصر وتصغر وتفضل
تضييق

لغاية جَنابك

ما خدت فـ جِنابك

وأصبح منابك

فى أرضك لا شيء

تخيل بلادك خدوها اليهود

وعايشين حياتهم عليها بهدوء

وسارقين هويتك

وأرضك وبيتك

وحاطين فى إيدك

كمان القيود

تخيل حقوقك خدوها بهدوء

ولا ليك فى سوق المحاكم حقوق

وتصرخ تنادى

يا عالم بِلادى

يا عالم بنادى

فى سوق الفسوق

تخيل همومك فى يومك تلال

وعايش مشاكل تهد الجبال

بطالة وإعانة

عِمالة
وخيانة

ده غير الإهانة

من الإحتلال

تخيل بإنك فى ضل إنكسار

وعايش فى عُزلة وأزمة وحصار

وأبسط حاجاتك

فاقدها فى حياتك

ودايما حالاتك

فى أسوأ مسار

تخيل بإنك أساساً عزيز

ومُجبر تطاطي لـ حبة معيز

وتفضل تدادى

وتفضل مهادى

وطيب
وهادى

وسهل ولذيذ

تخيل دموع العيال الصغار

بتنزل بتنزف بتحكى اللى صار

بتنده نيجيلهم

ناخد بالنا منهم

عشان دول يومينهم

أساساً قُصار

تخيل بيتهد بيتك عليك

وأهلك بتهلك وقدام عنيك

وحالك ومالك

بينهار أوبالك

وأشلاء عيالك

شايلها بإيديك

تخيل حياتك فى عتمة وضلام

وقايد شموعك فى قلب الحطام

وبرد الليالى

وناسة وتسالى

وفيروس مثالى

لـ هد العضام

حسبنا الله ونعم الوكيل

حسبنا الله ونعم الوكيل
شكراً بشمهندس اسماعيل علي ايقاظ الألام

تخيل!!!!!!!!!!!!!!!

موضوع قيم شكرا م. جوست.