الصندوق الأسود لوطن
بقلم جلال عامر
أعطنى قلبك أزرع فيه الأمل أو أبنى فيه منتجعاً، ومعظم من تقرأ لهم أناس محترمون يتبعون مؤسسات ونقابات وأحزاباً، لكننى صعلوك عابر سبيل، ابن الحارة المصرية، ليس لى صاحب، لذلك كما ظهرت فجأة سوف أختفى فجأة، فحاول تفتكرنى وإن رُحت مرة تزور عش الهوى المهجور سلم على قلبى، لذلك أنصحك بأن تقرأ ما كتبه الصديق «بلال فضل» هذا الأسبوع وأن تستمع إلى تفريغ الصندوق الأسود لوطن يطارد المخلصين ويحتفظ بالمنافقين.. (أصوات متداخلة - البلد بتغرق يا ريس - ما تخافوش هات يمين شوية يمين كمان - نزل دراع قانون الطوارئ - إلحق دارى على الفساد من عندك - البلد بتغرق يا ريس- خلاص عرفنا هات فتحى هنا على المنصة- لأ لأ صفوت الناحية التانية - البلد مالت يا ريس - هات الأمن المركزى يقف قدام - إوعى حد يغير مكانه- ثبتوا الاحتكارات فى مكانها - هاتوا البورصة فى النص - البلد بتغرق يا ريس - هات وشها ناحية شرم الشيخ -
يا صفوت سيب المجلس الأعلى للصحافة اللى فى إيدك يقع واضغط على زرار الشورى - البلد بتغرق يا ناس - مش عايز دوشة احبس لى الصحفيين دول تحت فى الكابينة - عايزين نخفف الحمولة، دول ضيوف مش ركاب، أرميهم – الأفضل نحرق الأقباط - صوت مذياع: ريسنا ملاح ومعدينا، عامل وفلاح من أهالينا - خلاص ارموا البنك ده فى الميه وخلصونا من الشركات - فيه تسرب من الأجناب - التسرب موجود فى العالم كله وماحدش بيموت ناقص عمر واحنا أقل نسبة تسرب - نعمل وقفة احتجاجية على سلالم المركب - المركب بتغرق يا ريس - لكل أجل كتاب -
فعلاً يا ريس اللى يغرق يغرق احنا مش مغسلين وضامنين جنة - كتفوا الفضائيات تكتيفة حلوة - الناس بتسرق الحاجة من المركب وتهرب - سيبوهم دى أرزاق مقسمها الرزاق - أنا باقول نستغيث - الاستغاثة مرفوضة لأنها تدخل فى شؤوننا - الجماعة اللى بيصرخوا ورا سكتوهم بعلاوة - إيه دى؟ - دى صناديق انتخابات متستفة - ارمى ارمى خلصنا، مش عايز اشوف قاضى قدامى - اسحل لى الجماعة دول ومش عايز تصوير - صوت هامس: المركب غرقت يا ريس والقارب بتاعنا جاهز - وح نعمل إيه فى البلد دى؟ - تتنيل تغرق إحنا ربنا يرزقنا ببلد تانى نكمل فيه البرنامج - المركب بتغرق يا ريس - بالعكس يا ريس دى فى منتهى الاستقرار - أمال بتتطوح ليه؟ - فرحانة بالإنجازات.. صوت راكب يغنى: «فاصوليا بيضا ومنين اجيبها»).
موضوع: الصندوق الأسود لوطن 
الجمعة 19 نوفمبر - 13:55
