مصر

أخاف عليكى يامصر
بلدى ومليش غيرك
أبكى عليكى بدل الدموع دم
أشكيلك همى واحكيلك
أمشى فى شوارعك أقول الله
وألاقى فى ترابك لجرحى دواه
أزعل منك أبقى بدلع عليكى
بس مارضاش أشوف دمع فى عينيكى
بنادى بأعلى صوتى
حتى لو كان فيه موتى
أصرخ من قلبى وأقول آه
على كل جرح ليكى جرحناه
أقول يامصرى....إصحا وفوق
فتح عينيك وبص لفوق
الوقت مابقاش وقت النوم
إحنا نزلنا بحر
والناجى اللى بيعرف يعوم
أوعى يامصرى تسيب بلدك حد يسرقها
وبإيدك انتا يشعلل نار ويحرقها
ويبيع ترابها اللى بدمنا رويناه
ويقسم أرضها ويفرقها
لوصحيح يا مصرى بتحب
إرفع إديك للسما وقول يارب
احرس بلدى من أعداءها
ونجيها من الحساد
وعلمنى أخفف داءها
وأرجع عظمة الأجداد
وحياتك يا بلدى.....
لأكون جندى عشان ترابك أحارب
وأكون عامل أبنيكى قالب فوق قالب
وأكون فلاح أزرعك يا بلدى حبات
لأجل ما ياكل طيرك
مانتى بلدى ومليش غيرك