كفايه بجد كفايه اوي لحد كده .....

ما اجمل ان تشعر بعناء العمل بعد يوم شاق وعصيب شعور لذيذ جدا لمن يعرف معنى هذه السعاده بالذات ولكن ياسلام لو اختلسنا بعض الوقت فى هذا اليوم الشاق لكى نستريح قليلا ونعدل الطاسه زى ما بيقولوا ونرجع نواصل تانى العمل تشعر وقتها بنوع غريب من الراحه النفسيه وهدوء البال .....

طب انا عاوز ارتاح شويه لان اليوم شاق اوى وانا حاسس انى فرهدت واحنا لسه فى نص اليوم فقلت وعليك من دا بايه ياعمى روح على اى مكان استريح فيه شويه واشرب شويه شاى خمسينه وعيش حياتك شويه وانسى الدنيا والشغل والهموم وارمى كل حاجه فى البحر وخليك بس فى كبايه الشاى ......

طيب علشان الليله تحلى بقى متيجى اعمل زى بتوع الافلام كدا واجيب جرنال وامسكه منها امارس عادتى اليوميه فى قراءة الجرائد ومنها ابص على حاجه بدل منا قاعد ابص على اللى رايح واللى جاى .....

جبت جرنال الحزب والوطنى اللى لازم اقراء كل يوم مهو الجرنال دا ملوش حل لازم لما الواحد يشوفه يضرب نفسه ميت جزمه قديمه لان البلد زى الفل واحنا ولاد ..... مش راضين وعاوزين احسن من اللى احنا فيه كمان بعيد عنكم اصل الواحد بطبعه طماع واحنا عاوزين نعيش فى القمر .....

طبعا مفيش وقت انى اقراء تفاصيل انا بشرب الشاى بسرعه ولما حيخلص حقوم على طول فقلت ابص على العناوين ونخلى التفاصيل بليل بقى .....

عادى ياجماعه مفيش جديد اخبار النهارده بايته كالعاده الريس مموت نفسه علشنا ونظيف اهم حاجه عنده مصلحه البلد وفى انتخابات بتحصل فى امريكا ومنتخبنا بيستعد لامم افرقيا وكام خبر فى الحوادث عن قتل بدافع السرقه مفيش جديد فى الجرنال عادى خالص ..............

حااااااااااااااااااااااسب ايه دا بسم الله ماشاء الله اعلان ضخم جدا اخد صفحتين بحالهم فى الجرنال ياااااااااااااه يعنى بالميت حركه 60 الف جنيه ثمن الاعلان دا اذ مكنش اكتر علشان الورق غلى والحبر .........
الاعلان ايه بقى :
حديد عز بيعلن ان اسعار الحديد مغلتش بس فى مصر لواحدها بالعكس دى غلت فى جميع البلاد العربيه وقاعد الراجل يجيب صور لجرايد عربيه من جميع البلاد تعلن عن ارتفاس اسعار الحديد لا وايه بارقام خياليه .....

طب كويس الحمد الله مصر احسن من غيرها اهو ......

خد بقى عندك تفاصيل الاعلان كلام كله عن ان المواد الخام ارتفع ثمنها بشكل ملحوظ وان مصانع حديد عز بتوفرها ومازالت بنفس الجوده والشروط المطلوب توفرها فى الحديد وشويه كلام حشو كدا ملهمش لازمه .....

فى نص الكلام مكتوب ايه بقى ولكن رغم كل هذا مازال حديد عز هو الارخص فى الشرق الاوسط ومازلنا نعطى ارخص الاسعار فرغم كل هذا فان ثمن الطن : 3619 ج وكمل بعدها شويه كلام حشو ملهمش لازمه ....

يعنى حتى الفتش مش عارفين تعملوه وحتى العمه مش عارفين تلبسوهنا
ياعمى مش كدا احنا مش شعب اهطل اوى للدرجه دى
والله فينا ناس بتفهم وانتوا بردوا مصرين انكم تعاملوا كل على انهم بهايم
ياناس فينا والله ناس بتفكر ناس بتهم مش كدا والله

ياراجل انت بتكلم هنود ياعم حديد ايه اللى بالثمن دا ياعمى احنا فى الكار دا وعارفين الحديد الوقتى ب4120 ج ومش موجود واللى عنده مش راضى يبيع والتجار هنا مش عاوزه تجيب ولا تبيع
البلد حلها بيقف
والله روحنا لتاجر كبير اوى وعارفين ان ممكن نشترى بخساره بس محتاجينه فعلا قال والله ماعندى سيخ حديد واحد فى المخزن ومش حشترى لان المصنع مش عاوز يبيع للتجار ومش عارفين ليه ....

ياعمى اى واحد تانى اول ما حيشوف الاعلان دا حيطير ن الفرحه مع انه لو عرف الحقيقه حيولع فى الجرنال وى نفسه

ياعم أحمد عز

حرام اللى بتعمله فينا دا انت ماسك عصب مهم جدا فى حياتنا
محدش عارف يشترى شقه الوقتى واللى عنده مش راضى يبعها

الحديد فى العالى
وكل مواد البنا بتغلى معاه اشمعنى الحديد

النهارده طن الاسمنت بقى ب 435 ج
بعد ما كان ب360

حرام حرام اللى بيحصل دا

طب اى واحد كان داخل فى عمليه بناء من سنه اتخرب بيت ابوه والله من الاسعار دى
واللى متخربش حيخرب بيت ابونا احنا
الوقتى انا عاوز شقه
حد يقدر يجبلى شقه وانا معايا 100 الف جنيه اهم وفى حته نظيفه

مفيش مفيش مفيش

واللى عنده يجبهالى وانا حشتريها منه

الناس مش عارفه تتجوز والاسعار غلت وانا لسه متكلمتش عن الاكل انا بتكلم الاول عن حته انام فيها من غير اكل
ياجماعه سبنى بقى من الهلث اللى احنا فيه

وقعدين ندور على مين احسن مطرب للعام ومين احسن مش عارف ايه

خلونا فى مصيبتنا
فى ناس اكله البلد والعه وحطها فى كرشها

وناس بتموت واتخرب بيوتها
حرام اللى بيحصل دا
الحديد ولع الدنيا كلها وفى ناس كتير معزوره ملهاش فى الشغلانه دى فمتعرفش غير ان كل حاجه بتغلى وخلاص

كفايه اوى لحد كدا

كفايه

كفايه

لو فضلنا كدا صدقونى الناس حتموت بعض علشان تعرف تاكل
السرقه على ودنه وعلى عينك ياتاجر فى عز النهار ومحدش بيقولهم بتعملوا ايه
كفايه اوى لحد كدا
لو فضلنا كدا عليكم العوض فى كل حاجه
حتى كبايه الشاى اللى طلبتها عليا العوض فيها مشربتهاش وبردت خلاص لان الاعلان شدنى ونسيت الكبايه
وبدل ما كنت رايح استريح شويه وارجع على الشغل
الضغط ضرب عندى
ومستفدتش غير حرقه دم وبس

وللحديث بقيه مادام فى العمر بقيه .....

بقلم:

]صعب ترصيني!![/

عندك حق الشعب المصري عايش في معاناة كبيرة مش عارفين حتوصل لحد فين ربنا يفرجها علينا انشاء الله

كفايه بجد كفايه اوي لحد كده ..... 700120

بصراحه يا اختي منقدرش نقول الا ...

حسبي الله ونعم الوكيل...

ومش بأيدنا حاجه نعملها ....

الحمد لله أننا عايشين .... أنت هاتطمع وللا أيه ما هي الحكومة سايباك تعيش و مش بتحاسبك على العمر اللي بتقضيه....

حسبي الله و نعم الوكيل على كل ظالم جبار
كفايه بجد كفايه اوي لحد كده ..... 700120

اييييييه الكلام الكتييير اوي دة
امممم .... وبعديين ؟!!

بصراحة انت اللى غلطان رايح تستريح من عناء اليوم تقرا جريده وطنيه قصدى تبع الحزن الوطنى

ولا ياللا حتى لو قريت جريده معارضة بردوه هاتشوف البلد على حقيقتها والنتيجة واحده (دمك هايتحرق)
لذا نصيحة ابتعد عن الجرايد .......ع الاقل وانت فى وقت راحتك
وافتكر انك اكيد..اكيد فى مصر
وربنا مش بيسلط الحاكم على الرعيه الا لو كانوا يستحقوا ده
فالكلمة الاخيره والاولى للشعب الشعوب هى اللى بيتغير الحكومات بس للاسف احنا البلاد الوحيدة اللى الحكومات من حقها تغير الشعوب فاحمد ربنا ان الحكومة صابرة علينا ومن كرم اخلاقها سايبنا نعيش فى.......مصر