احب اولا اعرفكم بنفسي
انا اسمي يامن محمد عبد الموجود مصطفى دفعه 2002 مدني
حاليا انا في السعودية مهندس استشاري
كان المفروض اكون خريج 2001 لكن النصيب الحمد لله
المهم لا اطول عليكم اهم شيء في سوق العمل مع ان خبرتي مش كتيرة بس 6 سنين لاني مدخلتش جيش
- ان الواحد يكون صبور ومواظب على العمل
- يمكن تقابلك شوية مشاكل في الاول زي المرتب وخلافه لكن اعرف بعدين ان كل سنه بتعدي عليك السعر بتاعك بيرتفع مهما كنت في اي قسم( الخبرة بتفرق كتير اوي )
- حاول تستغل كل اللي حواليك. عمال ,فنيين, مهنيين كلو ( انتا تقدر تستخلص اي معلومة من اللي حواليك من غير ما تعرفه انك متعرفش )زي مثلا مصطلحات الشغل - مشاكل سابقة ليهم - حلول لها - في اسلوب حكايه او تجارب سابقة ليهم ( يعني بشطارتك ) ومش عيب انك تقول ما تعرفش - على فكرة المديرين والفنيين والعمال بلغه السوق الصنايعية عارفين انك خريج جديد ومتعرفش حاجه مش قصدي بس الشغل حاجه واللي اتعلمناه حاجه تاني خالص يعني هما مش هبل.
انا ايام ما كنت في شركة مختار ابراهيم كنت بدخل ورشة الصيانة بتاعت المعدات وصدقوني اتعلمت كتير اوي
لدرجة اني اتعلمت اسوق لودر
اهم حاجه واكتر نصيحه لاخواني انكم تحببوا الناس فيكم وبالزات العمال صدقوني مش عشان انتا مهندس يبقا تتكبر على الناس
انا مقلتلكش تبقا سايبها اوي
خلي في حدود لكن برضوا صدقوني لو العمال والفنيين ورؤسائك كانوا بيحبوك والله لو طلبت منهم اي حاجه هيعملوها ولو على حسابهم وبدون مقابل كمان. ( حب الناس تحبك )
- اللي اتعلمته برضوا لما شفت اكبر مني عادي لو في معلومة ميعرفهاش بيقول معرفش مش عشان انتا مهندس يبقا تعرف كل حاجة . الكمال لله يا بشمهندسين .
والاهم في دا كله ان التوفيق من عند ربنا اكيد لو مش هتشتغل دلوقتي ربنا شايفلك حاجه احسن ويا ريت تحبوا الشغل بتاعكم عشان تدوه كل ما عندكم وهوا هيديكم كمان وربنا هيجازيكم والله . وربنا يوفق الجميع
واسف لو اتكلمت بالعامية - اعزروني . واتمنالكم التوفيق واشوفكم على خير
موضوع: قدم إلينا خبرتك فى سوق العمل 
الأحد 17 فبراير - 20:05
