حواااااااار مع النفس...!!!

أنا عارف أن ممكن يكون الموضوع تم عرضه مش في مكانه بس بجد أنا مش عارف أحط الموضوع فين....!!!

أنا عارف أنكم بعد ما هاتقروا الموضوع ده هاتقولوا ده واحد مجنون بيكلم نفسه أو عنده شيزوفرينيا (انفصام في الشخصية)
بس معلش استحملوني واقرو الموضوع للنهاية......وبعدين قرروا...!!!

حوار مع النفــس

نفسي : ايه يا عم انت..!! أنت مش عارف تعمل حاجه و قاعد بس قارفني كل شوية بالنضارة السودة بتاعتك دي ما تشيلها بقى و تريحني..؟؟

أنــا : وانت مالك ..!! هيا مضايقاك في حاجة و بعدين مين فينا اللي لابسها ..أنا وللا أنت ..؟؟؟

نفسي : مش قصدي ..بس الناس كده ممكن تتضايق لما تشوفك بيها ..و بعدين اللون الأسود ده لون كئيب...!!

أنــا : يا عم و انت شايف ايه ممكن يدخل الفرح على الواحد..!!! و أكيد الناس كلها عارفة كده بس هما بيحبوا يعيشوا في دنيا الخيال شوية....!!!

نفسي : الخيال..؟؟ يعني أنت قصدك أنك من كوكب تاني وللا ايه ؟ يا عم الناس فيها اللي مكفيها و زي مانت بتعاني هما أكيد بيعانو ويمكن أكتر منك ...!!

أنــا : ما هيا دي المشكلة ..من كتر ما الناس عايشة في همومها نسيت أن في ناس تانية عايشة معاها .. و أنا واحد منهم...أنا برضه فيا اللي مكفيني..!!

نفســي : برضه ماقولتليش أنت لابس النضارة السودة دي على طول ليه..!!!ما تشيلها بقى ...

أنــا : يا عم أنا حر طالما مش بأذي حد ..!! و بعدين أنا بحب اللون الأسود ..!!!

نفسي : يا ساتر يا رب .. أنت في حد ماتلك و كان عزيز عليك وللا أيه ..؟؟؟

أنــا : لأ الحمد لله ...و بعدين هو لازم يعني يكون في حد مات علشان أحب اللون الأسود ..ده غير كده اللي أنت ما تعرفهوش الحزن في القلب مش في الألوان...

نفسي : بس برضه ما قولتليش أنت ليه بتحب اللون الأسود ...؟؟

أنــا : علشان أنا حزين على نفسي و على الناس اللي حواليا ....

نفسي : حزين ليه بس يا عم الحاج ..؟؟

أنــا : علشان أنا ماعملتش حاجة وحشة لحد و مش بحب الأذية....بس الدنيا أذتني جامد جدا و بتكسر فيا على قد ما تقر و في كل فرصة تلاقيها.....

نفسي : ماهو دي حاجة كويسة علشان تطلع راجل و تقدر تتحمل المسؤولية و بعدين طالما أنت شفت الأذية في أول حياتك يبقى أكيد في خير جايللك بعدين وربنا عاوزك تحافظ عليه فعلشان كده بيمتحنك و يشوف هل أنت قد المسؤولية دي وللا لأ....

أنــا : يعني أنت شايف كده ..!! و بعدين أيه المسؤولية اللي جاية دي ..!! هابقى وزير مثلا وللا رئيس دولة وللا مدير وللا أيه يعني....؟؟؟ ده أنا حتى مش عارف أنا لما هاتخرج هاشتغل فين....و في أي مجال..!!!

نفسي: يا عم ما تفكرش في الي جاي فكر في المطلوب منك دلوقتي ...؟؟؟وبعدين ابقى فكر في اللي جاي ...

أنــا : وأيه المطلوب منى دلوقتي يعني أني أخلص البكالوريوس بتاعي علشان أقدر أساعد ابويا في الحمل اللي شايله..؟؟؟

نفسي : طبعا يا خويا ...أمال أنت جاي هنا ليه.....؟؟ و بعدين أنت ليه كل ما أسألك انت ليه لابس النضارة السودة تغير الموضوع و تسرح بعيد ...؟؟؟؟

أنــا : أصل أنا مش عاوز الناس تشوف الحزن اللي في عيني .... أو أحس في عيونهم بنظرة شفقة أو عطف أنا بحب الناس دايما تشوفني أني قوي و صلب قدام أي حاجة ممكن تعترض طريقي.....!!!

نفسي : يا عم خليها على الله و ما تخليش السواد ده ياخدك لمكان بعيد ممكن نا تعرفش ترجع منه ...!!!

أنــا : ايه يعني هاتوه مثلا ....على أساس أني عيل صغير ماما بتعديه الشارع علشان العربيات...!!

نفسي :ماشي يا عم الكبير أنت قلت أنك حزين على نفسك و على الناس ..!! على نفسك وعرفناها ..طب و على الناس ليه ..!!

أنــا : أصلي مش باقدر أساعدهم زي مانا عاوز و بعدين الناس بتصعب عليا من اللي بيحصلها و كمان في ناس مش فاهمة اللي بيحصل حواليها و كمان حالة الشباب اليومين دول لاتسر حبيب بس بتسر العدو و المشكلة أنهم مش فاهمين كده...و نفسي أنقذهم بس مش قادر....

نفسي : لا يكلف الله نفسا ألا وسعها ... ماتقساش على نفسك كده و بعدين ربنا كبير و مش بينسى حد من عباده..

أنــا : و نعم بالله و الحمد لله على كل حال...

نفسي : يعني من الآخر هاتشيل النضارة دي و لا آجي أكسرها علشان تستريح ....؟؟؟

أنــا : و انت فاكر أنك لما تكسرها هاتشيل السواد الي أنا شايفه..؟؟؟

نفسي : ده عناد ولا أيه بالظبط ..؟

أنــا : لأ مش عناد بس بجد أنا مجروح من جوايا جرح كبير جدا مافيش حد هايقدر يعالجه .... وأن شاء الله هابقى أشيلها لما أعالج نفسي ....

نفسي : يعني مش عاوز تشيلها ماشي أنا هاكسرهالك .....وسع كده..

أنــا : مالكش دعوة بيا أنا هاعمل اللي عاوزه

نفسي : بقوللك وسع ..

أنــا : لأ مش هاوسع ..

نفسي : وسع أحسن لك..

أنــا : ما تقدرش تعمل حاجه....

نفسي : أيوة أقدر..

أنــا : لأ..

نفسي : أيوة..

أنــا : لأ ..لأ... لأ.... لآآآآآآآآآآآآآآآآآه....
....
...
...
....
....
و في النهاية افوق بعد أن أغمى علي من هذا الحوار بيني و بين نفسي.....

أتمنى يكون الموضوع عاجبكم و ياريت تلتمسو ليا العذر لو الموضوع مش في مكانه.... Pudently

حوار جميل جدا يا بشمهندس فيه أفكار جميله
ولو تسمحلى ننقله فى قسم الروايات عند عبد الوهاب.

الحمد لله أن الحوار عجبك و ماقولتش عليا أني مجنون...
والله أنت المدير شوف الموضوع ده ينفع يطح في أي قسم .....
المهم عندي أن الناس تقراه و تشوفه....

بسم الله الرحمن الرحيم ،

أولاً : أعتقد إن الحوار ده يتضمن مستوى ضخم جداً من الشفافية ودرجة عالية من الاعتراف بالآخر ، بمعنى إن طرف الحوار Sad

أنا ) بيعترف بلآخرين كلهم ، وحتى بنفسه !!

ثانياً : درجة الشفافية في الموضوع عالية ، ومافيش حد بيوصل للمس المستويات العالية دي من الشفافية من البشر إلا نوعين : المفكرين بشدة ، أو (...) . وأنا متأكد إن الحوار بينتمي للخانة الأولى : المفكرين بشدة .....

ثالث نقطة : النضارة السودة رمز متعدد الدلالات : أول دلالة أكيدة : الحزن .
وصاحب النضارة السودة بيتسم بتناقض ، هو وجاهة المظر الخارجي ، ومهابة الهالة النفسية ، و قوة الإيحائية الخطرة ..

وبينما في الوقت نفسه يكون الداخل ( النفس ) كسيرة حزينة ، فيها نوع من الرقة ، ونوع من الحساسية .
والحوار بينتمي للمجموعة دي ككل ( بالأنا وبالنفس ) ...

لإن في مجموعة بتلبس النضارة السودة ( وهيا هبلة من بره هبلة من جوا ( عبارة عن كتلة من الهبل تمشي على قدمين ) ) ودي الدلالة التانية : الهبل ..

لكن من الواضح من خلال الحوار إن في رغبة في تغيير الواقع اللي بتعيشه ( أنا ) من قبل ( النفس ) ..

قد يكون عن عدم رضا ( النفس ) عن( أنا) ، أو قد تكون الحكاية نوع من الملل ، أو ممكن يكون الموضوع صراع قديم ، مستعر ناري كبير مخيف شديد .....

إستدراك من محب : لازم يعود السلام بين النفس والأنا !

لازم يكون في هدنة سريعة ما بين النفس والأنا ، لأن تطور منحنى الصراع إلى الزيادة والاطراد حيخلق حالة من التنافر الشديد وبالتالي : انفصال كلي ! ( وبلاش نوصل المواضيع إلى الطلاق) !

أو ممكن نكون قاسيين لغرض العلمية في تناول الموضوع : ( فصام ) ! ( سكيزوفرينيا ) !

حتى ممكن ده يأثر على كميات التفكير ، ( اللي هيا ضخمة عند صاحب الموضوع ) ، يأثر بالزيادة عند حدوث الحرب ، وبالنقصان غير الأكيد عند حدوث السلام والزوج بين ( الأنا ) و( النفس ) .

وألت النقصان غير الأكيد علشان في حالة السلام كل حاجة بتبأى طبيعية ، وبالتالي حيرجع التفكير يخضع لمتغيرات الحياة وعوامل العالم الخارجي ..

عاوز أقول إن الحرب اللي إنت فيها دي حتخدم ذكاءك وكمية تفكيرك وقوة العقلية اللي بتسكنك ، بس من ناحية تانية إحتمال ( غير معروف النسبة بالتحديد ) إن الأمور تبئى سيئة : أنا شخصياً رأيي الكلي : حيرة وقلق وخوف شديد .....

أكيد يمكن علشان الموضوع يهم صاحب التحليل ده اللي هوا : أنا ...

أرجو من الله إن حد من اللي ليهم رأي كويس يشارك معانا يمكن نستفيد بأي حاجة !!!!!

طبعاً المشاركة دي هيا نتاج الحيرة مش أكتر !!

والسلام عليكم .

صراع الانسان مع نفسه ينم عن رغبه هذا الانسان في تغير حياته واحب احيك يا بشمهندس الحقيقه الحوار رائع وواقعي الي درجه كبيره واتمني ان يتم التصالح بينك وبين نفسك حين تكون راضياً عن كل افعالك

هذا الحوار هو تقريباً يشبه الحوار اللي بعمله بيني وبين نفسي
بجد حوار جميل جداً وعجبتني فكرته وربنا يبعد عنك كل الاحزان والهموم
بس بعد اذنك حنقله لقسم ابداعات الاعضاء

بصراحه انا لولا انى اعرفك شخصيا كنت قلت كلام تانى .

اقتباس :: أنــا : و انت فاكر أنك لما تكسرها هاتشيل السواد الي أنا شايفه..؟؟؟

ربنا يشيل عنك السواد ويوفقك ونشوفك مهندس قد الدنيا.

من حسن حظى انى اتعرفت عليك شخصيا النهاردة يا بشمهندس قبل قراءة الموضوع

بس انت ما شاء الله عليك بشوش الوجه مبتسم
عكس ما بداخلك
و ده معناه انك بتحاول تضيف سعادة للاخرين قبل نفسك
بس احييك على صراحتك مع نفسك اكثر من اى شئ اخر

» حب النفس!!!
» النفس و الروح
» حوار مع النفس
» جهـــــاد النفس
» وقفة مع النفس