مفيش حاجة

مفيش حاجة
------------ --------- -------

مانيش عايز خلاص حاجة ولا محتاج انا لـ حاجة ولو عايز صحيح حاجة مخليتوليش ولا حاجة
.. عموماً بصوا فيه حاجة ...... هقولها بس محتاج لعقول تفهم
.. ولو حاجة مهيش مفهومة او حاجة ....نفسرها بكام حاجة
نوضحها بكام حاجة وأهى حاجة مع حاجة هتظهر وتبان لنا حاجة
وانا ما بخفش من حاجة مانيش مسنود ولا حاجة
لكن ما بخفش من حاجة لكن فرضاً لو هقول حاجة هيحصل إيه ... ولا حاجة
هيعملوا إية.... ولا حاجة ولو بعد الشر .. بعد الشر لو واحد من القاعدين من السامعين فِهِم حاجة هَيعملوا إيه ؟؟؟؟

اكيد برضُه ولا حاجة ....فنتوكل على الستار لوجه الله نقول حاجة

فيه ناس بتعيش عشان حاجة وناس بتموت عشان حاجة وناس بتموت على حاجة
وناس تديلك حاجة وهى ليها محتاجه وناس تديلك حاجة و تاخد قصادها ميت حاجة
وناس تكبر تكون حاجة و ناس تصغر عشان حاجة
وناس منظر ومش حاجة وتلقاه كبير حرس ونفير عليه منظر
... وهو جبان وشيخ منصر
ولا يبـنش عليه حاجة
...كلامى يا خلق فيه حاجة ؟؟؟؟
لحد دلوقتى فيه حاجة ؟
كلام عادى وبسيط جداً .. ولا فِهشِ ولا حاجة

ما انا ما أقدرش أقول حاجة صحيح نفسى أقول حاجة وميت حاجة لكن مش قادر اقول حاجة
لأنى لو هقول حاجة ..هييجى ناس بتوع حاجة وياخدونى ورا حاجة وهو لو سمع حاجة هيعملوهالى ميت حاجة
عموما ... بصو لو حد من القاعدين عايزنى أبلغه بــ حاجة يقول مايخفش من حاجة
نعم
...فيه إيه؟

لالالالالأ مافيش سرقه ولا تهليب ولا تهريب ولا حاجة
...وبتقول إيه...مصمصوا إيه.... وخصخصوا إيه....ده كله كلام مفيش حاجة

قضية إيه ... ياشيخ روح خلاص مافيش حاجة

حرامى إيه ... ولَكّح إيه ... وهرّب إيه؟ شــفـافـيـه مافيش حاجة

وبتقول إيه ... لالالآلأ عـــيب لافيه تدليس ولاترقيص ولا تدبيس ولا حاجة

سمع مع هووووس انا حاسس انه فيه حاجة دقيقة سكات لَتبقى حداد انا حاسس انه فيه حاجة
زمنكوا ياخلق فيه حاجه ولازموا كام وميت حاجة ده لو يعنى إذا كان فيه حاجة انا عن نفسى مش حاسس ولا حاجة ولا متضايق ولا حاجة
سعادتك برضه مش زَيـىِ مافيش حاجة ؟ ..... أهـه بيقول مافيش حاجة جنابك برضه مش زَيـىِ وعلشان زَيـىِ مافيش حاجة .. أهـه بيضحك بيقول مافيش حاجة
ما أنا قولتلكوا من الأول مافيش حاجة

عليا النعمه يا اخوانّا مافيه حاجة

ورحمة ابويا ويّا أبوك على إللّى جابوك ما فيه حاجة

وعهد الله . وعهد الله. وعهد الله ما خللولنا ولا حاجة

بقولك إيه خـــلاص خلّص وفركش يا اخوانا

إيمان بكرى