اول ضربة جوية

زمان وأنا صغير
يجى 3-4 سنين لقيت ماما بتعيط كل ما أغنية أم البطل بتاعت شريفة فاضل بتتذاع
ولما أسألها ليه تقولى علشان الناس اللى ماتت فى الحرب
ولما كبرت عرفت أنى أتولدت فى السويس سنة 1970 أيام الأستنزاف علشان أسرتى ما رضيتش تسيب البلد وتهاجر زى كل أهالى مدن القناة
وفوق كل ده أنها قدمت خالى شهيد فى المقاومة الشعبية أثناء الحصار ومحاولة أحتلال السويس من إسرائيل فى أحداث الثغرة فى 24 أكتوبر 73
كبرت و ذكرى أكتوبر كأنها يوم عيد ميلاد حد فينا
ليها أحساس تانى
حرب أكتوبر رجعتنا تانى لبلدنا ورجعت بلدنا تانى لينا ............ .بلدنا دى بالنسبة لينا هى السويس اللى بحبها جداً
وياما وأنا فى ثانوى ما رحت أشترك فى العرض العسكرى بتاع يوم السويس القومى 24 أكتوبر وأنا حاسس أنى أحق واحد باليوم ده
وفاكر مرة منعونى أنى أشترك فى العرض أصريت ومشيت ورا الطابور غصب عن القائد بتاع المدرسة الثانوى
بس يا جماعة فى حاجة موتت الأحساس ده عندى
تعرفوا أيه
أول طلعة جوية
النظام سطا على الأنتصار الشعبى اللى الشعب بعرقه ودمه ودموعه حققه ودفع فيه الغالى قبل الرخيص وحول الموضوع لسبوبة كل سنة يعملوا شوية كلام فارغ ويسموه أوبريت نصر أكتوبر ويصرفوا عليه شئ وشويات
وكل ده أتحول لنفاق رخيص أستغلوا فى دماء الشهدا اللى راحت علشان شوية أفنديات يقعدوا على الكراسى يسقفوا لما يقولوا أول طلعة جوية
كأن حرب أكتوبر أتحولت أن سعادته خد الطيارة بتاعته وراح طالع طلعة راح اليهود خدوا ديلهم فى سنانهم وجريوا
مافيش مدفعية ضربت ولا مشاة عبروا ولا مهندسين عملوا كبارى ولا دبابات حاربت ولا أى حاجة خالص
هو بس الطلعة اللى جابت الديب من ديله
أحب أقتبس كلمتين من الأستاذ محمد حسنين هيكل لما قال أن موضوع الطلعة الجوية كان عمل وظيفى بحت
دلوقت كل حاجة فى الحرب بقت الطلعة الجوية

تعرفوا
لما جم يفتتحوا بانوراما حرب أكتوبر سنة 90
كانوا راسمين لوحة جدارية بيظهر فيها السادات واقف مع حسنى مبارك بيشاوروا على خريطة على ترابيزة وواقف وراهم الجمسى وأحمد أسماعيل ومحمد على فهمى على الترتيب وطبعاً الكلام غير منطقى أن حسنى مبارك يكون واقف قدام أحمد أسماعيل حتى ولو بيشرح حاجة _ فيه حاجة أسمها أقدمية_ وبعدين فين الراجل اللى نفذ المعركة اللى حسنى مبارك سجنه وما أدهوش حقه فى التكريم
يمكن ما حدش عارفه
بس هو سعد الدين الشاذلى رئيس أركان القوات المسلحة فى الحرب
والنكتة أن كان وزير الدفاع فى وقت الأفتتاح يوسف صبرى أبوطالب راحوا راسمينه فى آخر اللوحة بالرغم من أنه كان تقريباً ما لوش دور حيوى فى الحرب لأنه كان مساعد مدير المدفعية مش يتحط فى لوحة واحدة مع قادة الحرب

ده كان مثال على النفاق مع اللى حاربوا
أمال لما نيجى على الجنود المجهولين فى الحرب ، ح يعملوا فيهم أيه تفتكروا
والله أعرف ناس منهم وواخدين أنواط كمان مش لاقيين ياكلوا أصلهم كانوا ما بيعرفوش يطيروا
ونروح بعيد ليه
قائد حركة المقاومة الشعبية فى السويس واللى قدر يرتب السويس كمدينة أثناء حصار الثغرة أسمه الشيخ حافظ سلامة_ حد يعرفه قبل كدة_ أعتقل أكتر من مرة بالرغم من كبر سنه ومعمول عليه حصار ربنا يعينه عليه

المشكلة أننا بقينا نخلط بين اللى وطنى باللى حكومى باللى تبع حزب الريس وما بقاش عندنا حاجة بنحترمها وبقت أكتوبر من ضمن التراث الحكومى اللى ممكن نتريق عليه بدل ما نجل الذكرى ونفتكر شهدائنا ومقاتلينا اللى جابولنا النصر بدمائهم
وبقت أكتوبر شوية أغانى عبيطة وأفلام أعبط وشوية كلام على عظمةالضربة الجوية اللى هى زى عظمة الست

منقووووووووووووووول

» مصر تغلق معبر رفح تحسبا لضربة جوية إسرائيلية للشريط الحدودي
» ضربة الجزاء تنقذ ارسنال من فخ التعادل
» شوف أحداث ضربة الجزاء بتاعت ماتش الزمالك حصررررررررررررررررى
» إصابة ابو تريكه وبركات ضربة قوية فى صدر المنتخب المصرى قبل لقاء روندا
» صحيفة التايمز: الرياض قد تسمح لاسرائيل بالتحليق فوق اراضيها في حال توجيه ضربة الى ايران