قرر الكابتن سمير زاهر رئيس الاتحاد (العباسي) عقد اجتماع عاجل بمقر الاتحاد بالعباسية (الجبلاية سابقا) ودعا كل
الاعضاء في الدولة العباسية بعد لقاء الاهلي والزمالك والذى انتهي بفوز الاهلي (كالعادة) وهرول للاتحاد مذعورا
الكابتن احمد عبد العزيز ال شوبير والشاه احمد شاكر وكل اعضاء الاتحاد العباسي وزحف الي مكان الاجتماع ايضا
الكابتن حسن شحاتة مهندس صفقات الزمالك وابنه وولي العهد كريم المفوض من قبل الاتحاد بأنهاء الصفقات لناديه
وقد بدا علي الكل الذعر والخوف والارتباك وكان شوبير مدير الحملة الانتخابية للاستاذ ممدوح عباس الاكثر توترا
حتي يقال انه حضر الاجتماع بالبجامة من فرط التسرع ,وحضر للجلسة رئيس لجنة(الافتكاسات) النجم السياجي
وجلس الكل علي مائدة الاجتماع ينظرون الي بعضهم نظرات تملؤها اللوعة والحسرة والدموع تنهمر منهم في غزارة
وشق السكون سمير زاهر الذى ضرب بقبضته علي المائدة وصرخ (ايه المسخرة اللي حصلت دى النهاردة) فطأطا كلهم
رؤوسهم في انكسار ورد شوبير بصوت منخفض ممزوج بالدموع /واحنا في ايدنا ايه ياريس؟؟؟؟؟؟
رد زاهر/نعم ياخويا امال لزمتكم ايه ؟؟؟لزمة الفضائيات اللي مشغلكم فيها أيه؟ اقول ايه للخليفة العباسي ؟؟؟
تحدث شاكر وقال/بصراحة احنا غلب حمارنا مع الاهلي ده ياريس عملنا كل حاجة ومفيش فايدة
زاهر/يعني ايه مفيش فايدة ؟!يعني نغير النشاط؟؟ نبيع فشار؟؟؟
رد شوبير/ياريس ده احنا عملنا كل حاجة هاني سعيد وخليناه يروح الزمالك غصبا عنه ,عبد ربه نيمنا موضوعه ونمنا علي
البطاقة بتاعته وكل ماييجي فاكس نعمل نفسنا بنفك الخط ومش عارفين نقراه,الحضرى وهربناه ومخليناش الاهلي ياخد من
وراه لاحق ولاباطل
تدخل شحاتة في اللحظة دى/وانا عملت اللي عليا وزيادة الحضرى وهربته بضربة معلم ,معوض رميته بره المنتخب,
احمد دروجبا بعد مافقع الزمبة اياها حلفت ماهخليه يشمها ,وهاني فاوضته وهددته بأنه مش هيخطي عتبة المنتخب لو
راح الاهلي والحضرى بلاعبه كل ماتش للمنتخب علشان أكيد وأغيظ جمهورهم اعمل ايه تاني اولع في نفسي يازاهر
هنا تدخل كريم شحاته وانهمك في البكاء وردد بصوت منتحب/بابا بابا انا مستقبلي ضاع يابابا مش هنجح في الانتخابات
والعيال في النادى هيشمتوا فيه ويعايروني
تاثر شحاتة بالموقف واحتضن ابنه وقال/كيمو حبيبي اوعي تزعل وتعيط ياحبيبي انا بابا اللي بخاف عليك من الهوا انا بابا
اللي بدخلك المعسكر واجبلك عصير واخليك تفاوض اللعيبة انا بابا اللي جيبتلك هاني سعيد انا بابا اللي خليت المنتخب عزبة
علشان خاطر عيونك اوعي تعيط ياكيمو وتوجع قلبي عليك...اتصرفوا ياخونا الود هيضيع مني
هنا تدخل السياجي وقال/ايه ياخونا النكد ده هو مفيش كباب وكفتة زى كل مرة ولا ايه اخر مرة كانت ساعة الواد هاني سعيد
الخليفة العباسي بعتلنا أكلة كباب وكفتة بالسلطات عجب ولا الطواجن ............
هنا جن جنون زاهر وقال بصوت هادر/الله يخربيت بطنك دى اللي موديانا في داهية بقي احنا حارقين دمنا وانت همك علي
بطنك؟؟؟!!!
تدخل احمد شاكر وهدأ من روع الكابتن سمير زاهر وقال /معلش ياريس ان شاء الله هنفكر مع بعض ونلقي حل
قال زاهر بصوت واهن /حل ايه ده الخليفة العباسي بعد اللي حصل النهاردة حالف يوديني ورا الشمس ده هيمرمطني
هنا تدخل شوبير وابتسم ابتسامة ماكرة وقال في نفسه /ياريت يااخي علشان انط علي الكرسي بقي وابقي الكل في الكل
واخلص منك برقابتك الكبيرة دى
نظر زاهر لشوبير وقال باستجداء /دبرني ياشوبير ولاانت فالح بس تنطط في الفضائيات ومجلس الشعب وبس
قال شوبير /لازم قرارات رادعة وحاسمة علشان نخلص من الموضوع ده ننهي الموضوع من جذوره
قال زاهر/عندك افكار او قرارات معينة ؟؟؟
رد شوبير بسرعة والنظرة الماكرة تعلو شفتيه /طبعا ياريس
قال زاهر بلوعة وكأنه غريق وجد شاطيء النجاة /قول ياشوبير وحياة ابوك
قال شوبير/لابد من ايقاف ابو تريكة واحمد حسن وجيلبرتو وتوقيع غرامة كبيرة علي الاهلي ولعب السوبر
بدون جمهور
رد زاهر /نعم يااخويا؟؟انت عايز تهيج الدنيا تاني المرة دى مش بعيد الاهلوية يدغدغوا الاتحاد وعلاء صادق مش هيرحمنا
شوبير/ياريس كل حاجة وليها تفسير بس المهم لجنة المسابقات والاعضاء بتوع الاتحاد يحبوكوها وان شاء الله هنقضي
عليهم المرة دى
تهللت اسارير السياجي وهتف/الله عليك ياسيادة النائب خلينا بقي نشتغل وايام الكباب ترجع تاني بس وحياة ابوك ياريت
الخليفة مينساش الريش والنيفة المرة دى
ابتسم شوبير وقال /متخافش ياسيدى هتاكل كباب ونيفة للصبح لما تشبع هاتوا ودنكوا واسمعوا
واستمر الاجتماع قرابة الثلاثة ساعات وخرج الاتحاد ببيان صدر رسميا عنه وكان نصه كالتالي..
(تابعنا نحن اعضاء اتحاد الكرة مباراة القمة الماضية واسفنا كثيرا لما حدث من جانب النادى الاهلي وجماهيره في اللقاء
وقيامهم بتجاوزات عديدة تتنافي تماما مع الروح الرياضية والقيم والمبادىء مما حتم علينا اتخاذ العديد من القرارات الحاسمة
-اولا ايقاف اللاعب ابوتريكة محليا ودوليا لغيابه عن المباراة رغم جاهزيته الفنية والطبية لان هذا يعتبر استهتار بالخصم
وتقليلا من شأنه واهانة لاتغتفر للزمالك وجمهوره
-ثانيا ترحيل اللاعب جيلبرتو لبلاده بعد الحركة الاخلاقية التي قام بها الليلة واستغلاله لضعف المسكين محمد عبدالله مما
يتنافي مع الحكمة الشهيرة (ارحموا عزيزقوم ذل) وللعلم هذه الحكمة تنص عليها لوائح الفيفا الجديدة والمعمول بها
ثالثا-اعتبار اللاعب احمد حسن رسميا من حق نادى الزمالك وذلك بعد ان تأكد لنا انه قد سبق وان اتفق مع الزمالك ولكنه
أخلف وعده ووقع للاهلي وهذا يعد لوى للحقائق وضد كل مواثيق الشرف والاعراف واذا لم يمتثل اللاعب للقرار ويوقع
للزمالك سيتم ايقافه من ستة اشهر لسنة ميلادية وربما احالة اوراقه للمفتي لما ارتكبه من جريمة شنعاء باللعب للاهلي
رابعا-منع جمهور الاهلي من حضور مباراة السوبر نظرا لانه زحف الي الاستاد ومليء المدرجات بالكامل في حين ان
مدرجات الزمالك كانت خاوية مما مثل عدم تكافؤ للفرص واصاب جمهور الابيض بحالة نفسية سيئة هذا اضافة الي هتاف
الجمهور لهاني سعيد لاعب الزمالك مما أثر علي أداؤه وشكل ضغطا كبيرا علي اعصابه وهذا يتنافي مع ابسط قواعد الروح
الرياضية
خامسا-غرامة مليون جنيه علي الاهلي بسبب فوزه المتكرر للزمالك والذى اصاب جمهور الكرة المصرية بالملل واثر علي
مبيعات الدورى للفضائيات مما شكل ضررا بالغا بالدخل القومي)
وفي النهاية يناشد الاتحاد العباسي لكرة القدم الجميع الالتزام بالروح الرياضية خاصة وان الاتحاد يكن كل احترام وتقدير للجميع
وبعد اعلان البيان انفض الاجتماع مع اتفاق علي اجتماع عاجل بعد السوبر في حالة اذا ماتجرأ الاهلي وفاز مرة اخرى
واغضب الخليفة العباسي
موضوع: اجتماع عاجل لاتحاد الكرة وعقوبات قاسية في انتظار الاهلي 
الثلاثاء 22 يوليو - 0:21
