افندينا لـ احمد فؤاد نجم

افندينا أنعم علينا بعلاوة
تجيب كيلو جبنة وعلبة حلاوة
آتاري العلاوة مجرد أتاوة
و احنا علينا الكلام اختلط
*****
عشان في البداية حسبناها خير
و قلنا نواية حتسند يا زير
و حسنة حتمنع بلاوي كتير
و كنا حقيقي في غاية العبط
*****
في لحظة افتكرنا ان لينا حقوق
و نمنا و صحينا لقينا الخازوق
و قبل اما ! حتى يا عالم نفوق
لقينا اللي لسه حناخده اتشفط
*****
أفندينا يعني في لحظة تجلي
تعطف تلطف و قرر يخللي
مساحة الغلابة تزيد ستة مللي
وياكلو بدال التراب الزلط
*****
أفندينا أعلن صدور القرار
و قبل اما ينجح في أي اختبار
فوجئنا بزفة و مولد و زار
قصايد.. جرايد.. برامج.. يفط
*****
تؤكد بأن الحكومة.... بذكاء
و من حزمة واحدة قضت ع الغلاء
و لابد يبقى لدينا... انتماء
و ناكل و نشرب و نلبس خطط
*****
عبال النمو اللي قالوا عليه
و حايشينه عنا مانعرفش ليه
ماتلمح مكانه في مراية عيني
هو نقدر ندوق منه... حتى نقط
*****
مادام كل حاجة تمام ع الورق
مفيش أي داعي عشان القلق
و لو مش مصدق خلاص اتفلق
ورقـنا اللي صح وكلامك غلط
*****
قاللي مواطن عليم بالخبايا
أفندينا قرر تزيد الجباية
عشان شعبه جاحد قليل الرباية
بياكل و ينكر زي القطط!
*****
اذا الشعب صدى بفعل البارومة
حاتعمل حسابه ف ايه الحكومة
وهي اللي جاهزة بكرباج وشومة
عشان لوفي واحد في عقله اتخبط
*****
تعيش مصر دايما في عز و جمال
يعيش المواطن شـديد الاحتمال
و آمن تماما من الاشــــتعالو أقصى ما عنده.
... ينكت فقط

اقتباس :: تعيش مصر دايما في عز و جمال
يعيش المواطن شـديد الاحتمال
و آمن تماما من الاشــــتعال و أقصى ما عنده.
... ينكت فقط

ENG_GODZELA كتب:: لقينا اللي لسه حناخده اتشفط
*****

فعلا كل متيجى زيادة او علاوة للمرتبات تلاقى الزيادة مثلا 30% تلاقى كل حاجة زادت 100%

ENG_GODZELA كتب:: مادام كل حاجة تمام ع الورق
مفيش أي داعي عشان القلق
و لو مش مصدق خلاص اتفلق
ورقـنا اللي صح وكلامك غلط

فى مشكلة فى مصر و مضيقانى فعلا وهى الورق كل حاجة بقيت ورق فى ورق .....انت نفسك بقيت ورق ....لازم تمشى بورق بطاقتك و موقف من التجنيد و كرنيهك .....كله ورق .

تقدم فى حاجة لازم تجيب ورق .. شهادة ميلادك صورة البطاقة .....كله ورق فى ورق.
حتى فى التعليم .....الانشطة كلها على ورق

» عيب بقي سيب القصيدة أحمد فؤاد نجم
» احمد فؤاد نجم
» احمد فؤاد نجم (انا مصرى.........)
» أحمد فؤاد نجم يغني لـ(غزة)
» أنا مصري - أحمد فؤاد نجم