ميدان الجيزة...

ميدان الجيزة

كتب على سلامة

ضيعت شوية سنين

بحب من بعيد لبعيد..

والحكاية مقضيانى

ومبسوط وراضى وسعيد..

أفرح بأى حاجة

وأستنى هدوم العيد..

وبعدين ضيعت شوية سنين

نفسى أبقى أشطر واحد فى الكيميا

مع إنى مش فاهم ميدان الجيزة..

والحياة رغم قسوتها

شايفها لذيذة

وضيعت شوية سنين..

نفسى أعدى اختبارات الكورة

فى النادى الأهلى

وأشتغل فى وكالة ناسا

وأبقى واحد م العلماء المهمين..

وبعدين ضيعت شوية سنين..

منتهى أملى كرسى فاضى

فى أتوبيس تلات خمسات

عين الصيرة أم المصريين..

وبعدين ضيعت شوية سنين

عايز أفهم الفرق

بين النكسة والهزيمة..

والاحترام وقلة القيمة..

وأبقى نجم سيما

م المشهورين..

وبعدين ضيعت شوية سنين

واقف عند نظرية المؤامرة..

لا عارف أعيش ف الزمالك

ولا راضى أعيش ف غمرة..

ومش عارف ليه

الحشيش ممنوع

مادام مصرحين بالخمرة..

ويا ترى بقى أتجوز

واحدة بيضا وللا سمرة

وللا أسأل فيها

رجال الفتوى والدين

وضيعت شوية سنين

مركز ف السيراميك

والبيبان والشبابيك

ولون الحيطان

ده بيج وده سن فيل..

والموضة الأصفر

قشرة الموزة..

وضيعت شوية سنين

لا أنا بحر ولا نيل..

حاجة كده بعيد عنك

ملهاش عوزة..

ولما بقيت كام خمسين

لاقيتنى لسه

بحب من بعيد لبعيد

وبرضه مش فاهم

ميدان الجيزة..

ولا عمرنا هنفهم!!
طول ما همنا علي القرش وعلي ازاي نعيش وخايفين من بكرة
ومالناش هدف كبير نركز عليه

شكرا!!!

» اهرامات الجيزة (من عجائب الدنيا السبع)
» اللجنة الاقتصادية" بالشعب تطلب مستندات بيع أرض ميدان التحرير
» «الجيزة» تستقبل «أوباما» فى جامعة القاهرة بزراعة الورود ورصف الشوارع وغسل التماثيل
» طلعت السادات يطالب بوضع تمثال لعمه فى ميدان التحرير.. وإقالة وزير الداخلية