هل الغربه سبب انك تكرة اسوان ولا هناك سبب تاني؟؟؟؟؟؟؟؟؟؟؟؟؟؟

بسم الله الرحمن الرحيم
كل عام في اواخر الشتي
يووووووووووووووووووه قصدي في اواخر السنة تسمع( من بعض الناس )من يقول لك :
ياااااه امتي نخلص ونغور من البلد بنت ال (.....) دي..................
واللي يقول يخرب بيت التنسيق اللي حدفنا عالبلد دي.........
واللي واللي واللي ..................
ما علينا
طب اية السبب اللي يخليك تكرة او ماتحبش البلد كدة
هل عيب فالبلد نفسها
ام عيب فيك انت والاحساس دة طبيعي جدا وبيجيلك بدافع (((((((( الغربة ))))))))
الغربة شيء صعب جدا لانك صعب جدا تكون عايش ومتعايش مع ناس لمدة مثلا عقدين او اقل قليلا وتيجي مرة واحدة وتلاقي نفسك لوحدك
هو طبعا مش هتكون لوحدك اكيد هتكون في ناس حواليك بس قصدي هتحس بمشاعر كدة حزينة ودة بيكون معاك في اول سنة وممكن توصل توابعة معاك للسنة التانية وممكن للتالتة علي حسب قدرة الشخص نفسة علي التحمل
المهم
طب هتقول لأ انا راجل وبستحمل الغربة هقولك لا ياخويا مش بالرجولية
واحنا الحمد لله كلنا رجالة بس ف اول ايامنا كنا زعلانين
طب هتقول البلد
هقوك طب ممكن تسال نفسك سؤال
هوا انا لو كنت رحت اسيوط او المنيا او المنوفية او او او ؟؟...........
كنت هاحبها ولا كان هيبقي حالي هوا حالي....؟؟؟!!!!!!!!!!!!!!!
الاجابة :
كان هيبقي حالك هوا حالك
دة بالعكس انا عن نفسي كنت اعدادي فاسيوط وحولت هنا اسوان
بصراحة اسوان احسن
المهم
الواحد نفسة هوا الي بيوزن نفسة ويظبط نفسة مع جو الغربة
اولا :
تبقي مع ربنا وتلتزم بالصلاة فوقتها
لانه اهلك مش معاك
اصحابك مش معاك
مفيش غيرة ربنا هو اللي معانا ف كل حتة وهو اللي هيرعاك ان شاء الله
ثانيا:
اصحابك تختارهم كويس عشان العملية مش مستحملة اي مقالب فالغربة والموضوع دة اتكلمت علية
ثالثا:
تحاول تلائم نفسك مع الجو العام والمنطقة والسكان لان الجانب دة مهم والاهم تلائم نفسك مع الناس
واحد هيقولي مانتا كتبت وقولت ان فيى ناس سيئة جدا فابو الريش
هقول برضة في ناس كويسة
والناس السيئة ليها معاملة والناس الكويسة ليها معاملة
وانا لما كنت بتكلم كنت بدافع عالطلبة الغلبانة الطيبين اللي مش بيعرفو يتعاملو مع الاشكال دي
وبصراحة ماتعرفش تتعامل مع الناس السيئة ابتعد عنهم احسن وتلاشاهم
وربنا يبعد عنا اولاد الحرام
رابعا :
تبقي علي اتصال مع اهلك وتطمنهم عليك اول باول واهم حاجة تخليهم يدعولك
واوعي بقي تقعد تعيط وتنوح وتقلقهم عليك لان اكتر حاجة الواحد بيزعل عليها ان اهلة يقلقوا علية لانك بتبقي مثلا هنا فرحان وتلاقيهم هناك زعلانين عليك والحكاية مش ناقصة
عموما ربنا معاناكلنا ياجماعة واللة وربنا يكرمنا ويكرمكم ان شاء اللة
يبقي خلاص اوكية الواحد يسيبة بقي من الزعل وخليك فريش عشان تركز فالكلية عشان تفرح اهلك لانهم يستاهلو كل خير
متشكر جدا

بالنسبه لمحافظة قنا ........فيهى .
عايز أقولك ياهيما لما تكون ف سنه ثالثة أو رابعه حتحب البلد دى وتتمنى ان السنه كلها تكون دراسه وعلى فكره أسوان دى بلد روعه بناسها اللى زى العسل وجوها الحلو جدا (عدا شهر 7,8)
بس يمكن علشان احنا عايشين فيها كطلبه والطلبه ف اى مكان لازم يحسوا بالتعب والزل والقرف بسبب التعليم لكن لو جربت مثلا تقضى فيها اجازه نصف السنه حتعرف انها حلوه جدا

طب نجع حمادي تبع محافظة قنا ........... فيهي....؟؟؟
شاوري باشا اشكرك عالرد
بس انا واللة ياشاوري مش بتكلم عن نفسي انا بتكلم علي ناس تانية
انا عن نفسي مكنتش عاوز اجي من اسوان واللة بس هعمل اية
انا علي فكرة حبيت اسوان خالص
متشكر شاوري وقنا فيها ماتقلقش بس شرفنا انتا كدة
ابراهيم الاسد

طيب بالنسبه للمخادمه فيهى...

فيها ياباشا شرفنا
بجد ياخوانا بالزات دفعة اعدادي ادخلو وشوفوا الموضوع هايعجبكم وربنا معاكو
ابراهيم الاسد

لا حلوة اواخر الشتا دي
اولا احب اشكرك يابشمهندس ابراهيم علي اثارتك للموضوع دة لاننا بصراحة وبجد بسسب الغربة يعني الا حد ما بقينا مابنحبش اسوان او بمعني اصح بنحب بلدنا اكتر بكتير خاصة اننا بنات غيركم انتو ممكن تستحملوا فرد فعل لده اننا مش نكرة اسوان لأ بنكون متضايقين هنا بصراحة
بس مش شرط يابشمهندس السن
بالعكس انا تالت سنة بس برضة لسة بزعل علي اني بسيب بيتنا
عموما شكرا انك برضة نصحتنا علي الرغم انك لسة جديد فالبلد دي
ربنا يحفظك ويحفظ امثالك ويحفظ الطلاب اخواتنا كلهم

بصراحه لنا مش بكره اسوان بس باكره ابو الريش اللى احنا عايشين فيها وده

بسبب الظروف المعيشيه الصعبه هناك
والقمه اللى بنتسلقها كل يوم علشان نوصل للكليه
غير انه ابو الريش دى جبل يعنى صحره
بصراحه لو حد سألنى على امنيتى
الجواب نقل كلية هندسة اسوان لمدينة اسوان

ياعم حجازي ابو الريش عامرة بطلابها اللي زي العسل واللي بيظبطوا اي جو ويطروا اي صحرا
شكرا للرد حجازي باشا

انا في البدايه كنت متحمسه جدا وكنت حابه البلد بطريقه غير معقوله وده بسبب الكليه اللي كنت بحلم بيها

ومازلت

بس

اكتر المواقف الوحشه حصلت لي في اسوان
واكبر المشاكل حصلت لي في اسوان
ده غير اني كنت بعيده جدا عن اهلي من اسوان للجيزة فكان مشوار طويل وبعيد
ومكنتش بشوف اهلي الا في المناسبات زي العيد كده وبس
ناس كتير ماتت واتولدت في السنه دي وانا برضو لسه في اسوان ومش عارفه اتحرك
كنت حاسه اني في منفى

عشان كده كنت حاسه ان البلد دي وخداني من اهلي ومن بلدي ومن اصحابي ومن كل حاجه حلوة

وصلت بيا اني كنت متغاظه منها ومن اي حد يقول انها حلوة

وكمان في فئه من الناس اللي كنت بتعامل معاهم مش كويسين وكرهوني في البلد دي

لغايه ما جي موعد سفري
حسيت ان مش من المفروض اني اسيب اسوان
كنت زعلانه جدا

وقلت في نفسي

يمكن بحبها

وشكرا يا باشمهندس لطرحك للموضوع

شكرا لردك يابشمهندسة
بصراحة ظروفك اصعب مني شوية لاني ولد وغير كدة من قنا يعني ممكن اروح فاي وقت بس برضة ماكنتش بحب اروح كتير لاني مالاخر حبيت البلد واللي حببني فيها بعض الناس الكويسة جدا معانا كطلبة كلنا والحمد لله الكويس ف ابو الريش غطي عالسيء
والناس دي زعلت جدا لما مشيت عليهم
وبصراحة والله ومن غير كدب نفسي ارجع دلوقتي اسوان لان الناس دي وحشتني واصحابي كمان وحشوني

ربنا يصبرنا على ابو الريش ياااااااااااارب

ده لولا الطلبه اللى فى ابو الريش مش عارف كنا هنعمل ايه

بس احنا نوقف مع بعض وكل حاجة تتسهل ان شاء الله

يمكن الموضوع ده مش يخصني بشكل مباشر
لأني مش مغتربة زي كل الناس اللي ردوا قبلي
لكن انا لو مكانكم كانت الغربة اكيد هتأثر عليا برده
وأكيد الواحد لما هيكون مضايق من حاجة .. هيضايق من كل الجو اللي بيحيط بيها

بس مع مرور الوقت ان شاء الله الكل يعرف يتأقلم علي العيشة في الغربة
عشان الكام سنة بتوع الكلية يعدوا بسهولة
وأسهل طريقة هي الاندماج مع الاصحاب الثقة وان الواحد ما يفكرش كتير ويشيل هم كل حاجة

بس انا كان ليا وجهة نظر في منطقة أبو الريش
انا مش هقدر احكم هي كويسة ولا لأ .. لأني مش عايشة فيها
بس لما بعمل مقارنة بين سكن الطلبة في أبو الريش
وبين الطلبة اللي كلياتهم في صحاري ومضطرين يسكنوا في مدينة صحاري اللي في الجامعة
بحس ان احنا في نعمة كبيييييرة في أبو الريش
كفاية ان فيها ناس وحياة ومحلات ومكتبات
انما الجامعة .. بجد نفسي يتعمل فيها حاجات كتييييييير
والحمد لله ان معظم الدفعات اترحمت من المشوار ده
وربنا يخلص اعدادي منه علي خير وكليتنا تلاقيلهم حل

شكرا يابشمهندسة علي مرورك وردك

فعلا زي ما قال الشاوري..كل ما تطول مدتك فالكليه..كل ماتحبها..

دا الواحد والله وهوا فالبيت بيقول امتي تيجي الكليه عشان نروح هناك..

علي الرغم اللي بتعمله فينا الكليه...

بس برضه..عشان صحابنا تهون كل حاجه..

الله يسامحكم . بتتكلموا في موضوع حساس بالنسبة ليا .

عامة وباختصار شديد انا من قنا , وعشان كده بكره اسوان جدا . فعلا لو حد قاللي ادفع فلوس الدنيا وانقلك منها هدفع لو معايا . طبعا حد هيقلي طيب قاعد فيها ليه ؟ هقله عشان شغلي بس فيها مش اكتر .

واحب اقول للناس اللي بتتكلم علي انها في اخر سنة هتحبها وتبقي مش عايزة تمشي منها هقلهم ده لانكم عارفين نفسكم هتمشوا منها وهتشتغلوا في بلد تانية خالص وهتحنوا اكيد لاسوان .

بس اديني انا اهو خلصت دراسة وقعدت فيها وبعد كده وهعيش فيها وعشان كده كارهها لاني افضل اعيش جنب اهلي . ياجماعة معلش انتوا بتفكروا بعواطفكم . ابسط حاجة لسه من اسبوعين كان فيه حالة وفاة في العيلة . طبعا لا لحقت الجنازة ولا يحزنون . وبلاش نروح بعيد . هوه اهالينا بيعملوا بينا ايه ؟ فايدتنا ليهم ايه ؟ تخيل لو اعز ناس ليك في الدنيا والدك او والدتك جرالهم حاجة لا قدر الله ....... لغاية ماتوصل بلدك وتروحلهم يكون اللي حصل حصل . يبقي بقي اللي بيقلي بحب اسوان خليها تنفعه . بعيدا عن اسوان والسيرة اللي تحرق دم الواحد وتخليه يكبر مليون سنة . كل واحد يحب بلده لو سمحتوا . فلسفة مالهاش لازمة في الموضوع ده .

وعامة اللي حاببها خالص يجيلي ويبقي واثق اني هبدل مكاني بمكانه ببلاش من غير فلوس , وهديله فلوس كمان .

ايه ده كله يابشمهندس محمد........؟؟؟

انا اولا اسف انه الموضوع ضايقك كده...

بس والله الموضوع ده قديييييييييييييم جدا فتره اما كنت داخل جديد فالمنتدي...

بس انا قلت ارجعه تاني عشان برضه نشوف اراء الناس الباقيه...

بس واضح اوي انه السبب انك تكون كاره اسوان..هوا الغربه مش اكتر..

بس هتعمل ايه يابشمهندس....

ده نصيبك..

وان شاء الله طول ما انتا بتضحي بحاجات كده زي مانتا بتقول..عشان طبيعه شغلك وكده..

اكيد ربنا هيجازيك خير عن كده....

وانا ياعغم موافق نبدل......

ايه رأيك بقي..........؟؟؟

بس سؤال بعد ازنك..قبل التبديل....

القبض....تمام ..ولاااااااااا.........؟؟؟

هل الغربه سبب انك تكرة اسوان ولا هناك سبب تاني؟؟؟؟؟؟؟؟؟؟؟؟؟؟ 788300

هل الغربه سبب انك تكرة اسوان ولا هناك سبب تاني؟؟؟؟؟؟؟؟؟؟؟؟؟؟ 788300

بهزر معااااااااااااك طبعا يابشمهندس..

وربنا يقدرك عاللي انتا فيه ده ان شاء الله

هو المشكلة

ان اسوان فيها الكليه
ولا ان
الكلية في اسوان
افتكر التانيه

ah10 كتب:: هو المشكلة

ان اسوان فيها الكليه
ولا ان
الكلية في اسوان
افتكر التانيه

تفتكر التانيه...!!!!!!!!!!

اممممممممممم..

يعني المشكله ياريس حربي...في اسوان....

مش عارف بصراحه..

احترم رأيك علي الرغم اني مش موافقك...

ده اللي فهمته من كلامك..

لو انتا قصدك حاجه تانيه قول ياحربي

والله بعد تفكير مش طويل قوي

المشكلة في الكلية يا اسد لان كتير اللي زارو اسوان
وانبهروا بيها ولا ايه؟؟؟؟

بصراحه عندك حق يا حربي....

هيا تبهر بصراحه.....

ههههههههههه

بسم الله الرحمن الرحيم

اما بالنسبة للغربة فهى مشكلة كبيرة طبعا لانك صعب تلاقى شخص يحس بيك ويفهمك
الا اذا كان من اهلك طبعا ده غير الماقف التى بتحصل بين الاصحاب وبصراحة الجو نار من وجهة نظرى ان المشكلة ان الكلية فى اسوان والواحد مبقاش مستحمل الحر والمذاكرة وحرق الدم فى الكلية

daisy كتب:: بسم الله الرحمن الرحيم

اما بالنسبة للغربة فهى مشكلة كبيرة طبعا لانك صعب تلاقى شخص يحس بيك ويفهمك
الا اذا كان من اهلك طبعا ده غير الماقف التى بتحصل بين الاصحاب وبصراحة الجو نار من وجهة نظرى ان المشكلة ان الكلية فى اسوان والواحد مبقاش مستحمل الحر والمذاكرة وحرق الدم فى الكلية

ماهو بصراحه فعلا اسوان جوها لا يطاق..

بس هنعمل ايه يابشمهندسه..؟؟

نصيبنا وقدرنا...

اما حكايه الصحاب دي وكده...ف دي فعلا اكبر مشكله بتقابل الواحد فالغربه بالزات....

ودي ممكن تتغلبي عليها...بالاحتراس في اختيار الصديق ده...

ولو انهم بيبانوا كويسين فالاول...

وشكرا يابشمهندسه لتنويرك الموضوع

بحييك يابراهيم ع الموضوع الحلو ده بس دايما زي مابيقولوا ان الغربه مره ممكن تكون فيه ناس كارهه اسوان عشان بيكون ليه علاقة بالمرارة ده بس صراحة العيشه في الصينين وابو الريش صراحة حياة غير ادمية بالمرررررررررة وتخلي الواحد يكره نفسه مش يكره اشوان واضف الى ذلك ان البلد امكانياتها مقارنة ببحري شبه معدومه وتحس اننا هنا عايشين في كوكب اخر وانا اما بروح القاهره او اسكندرية بصراحة بقول ومن غير زعل على اسوان كفر اسوان و ده نتيجة الامكانيات والخدمات وكمان العقليات الشغاله هناك ومش شايف منها الا حاجات بسيطه وابسط مثال للامكانيات الغاز الطبيعي اللي يااااااااااادوب لسه واصل وحمد لله ع السلامه

» السوبر في منتدي هندسة اسوان حاجة تاني!!!
» ...الاقسام الهندسيه..هل من مشارك...؟؟؟.....هل يتحول منتدي هندسه اسوان...الي منتدي..( فرفشه ) اسوان...؟؟؟؟..يللا كلنا نشارك بالرأي..
» قصيدة بنت تكرة الاسكول
» كلام في الحب بشكل تاني
» هناك فرق بين الولاد والبنات