موضوع: حوار مع ماضى النجار لعلى سلامه الأربعاء 18 مارس - 16:40
حوار مع ماضى النجار
كتب على سلامة
صابون بريحة مع مشوار.. عم ماضى النجار.. دار هذا الحوار.. دى ورشتى.. ودى صنعتى.. ودى قصة كفاحى.. قاللى يا ابنى.. إحنا جيل الزبدة الفلاحى.. إحنا اللى قلنا لمصر خشى ارتاحى.. وآدينا سهرانين من ساعتها ومصر مش قادرة تقوم.. كان أياميها الحشيش رخيص وأصلى ومختوم.. فضلنا نضحك على الفاضى والمليان وصحينا الصبح نبكى ونجرى ف الشوارع نهتف للبطل المهزوم.. كان أياميها صابون الغسيل هو.. هو صابون الحموم عشان كده لو تلاحظ المصريين العاملين بالخارج وهمّ راجعين جابوا معاهم صابون بريحة.. طول عمرنا يا ابنى بناخد صفر كان لازمتها إيه بس الفضيحة.. إحنا اللى عملنا البطرمان الإزاز جوزة وحطينا مية النيل ف صفيحة.. عرفت ليه باب النجار مخلع..؟ فيه حاجات ما ينفعش فيها نهزر ولا ندلع.. وأول الحاجات دى مصر.. على فكرة.. الباب ده عايز يرتاح.. واللا أقولك الصباح رباح..
الحبار مدير عام المنتدى
عدد المساهمات : 12635 تاريخ التسجيل : 02/05/2007 العمر : 38 الموقع : فى غيابات الهندسة المدنية رقم العضوية : 3 Upload Photos : أهم مواضيعى :
موضوع: رد: حوار مع ماضى النجار لعلى سلامه الأربعاء 18 مارس - 16:42
(2)
يوم الخميس سكتت الحارة.. والدنيا يا ابني ساعات جميلة وساعات بخيلة بتدينا بالقطارة.. وحيلتهم إيه الغلابة غير الولد.. هو وأكله ومستقبله وخفة دمه هدية للبلد.. وده كان التمن.. لكن ف عرف الغلابة مادام معاك حق الكفن.. وبتدفع الإيجار ووصل النور تبقى مستور.. نصحى على صوت الغارة دى راح منها جدع ودى راح منها عريس.. والحزن واقف ورا ساتر الطوب مستنى يوم الخميس.. نسمع أم كلثوم ونصلى الجمعة ف السيدة نفيسة وندعى لسيادة الرئيس.. كان أياميها زيت الأكل بيجى ف براميل والشاى بيتعبى ف قراطيس.. مصر يا ابنى هتموت فطيس.. وإحنا لسه بنسأل ع العلاج فى دكاكين العطارة.. مش لو كان الدوا ده هايجيب نتيجة كانت بانت أمارة.. أما عن اهتزاز الثقة فاللى اتعوج يا ابنى ما تعدلوش الفارة.. على فكرة.. الباب ده عايز يرتاح واللا أقولك الصباح رباح
الحبار مدير عام المنتدى
عدد المساهمات : 12635 تاريخ التسجيل : 02/05/2007 العمر : 38 الموقع : فى غيابات الهندسة المدنية رقم العضوية : 3 Upload Photos : أهم مواضيعى :
موضوع: رد: حوار مع ماضى النجار لعلى سلامه الأربعاء 18 مارس - 16:44
(3)
صلطح ارفع راسك يا أخى.. وصلطح قفاك وربنا معاك ده اللى رمانى ع المر هو يا ابنى اللى رماك فى بلدنا.. الضرب ع القفا تاريخ مين اللى قال إن الجواز زى الحكومة زى البطيخ.. من اللى قال إن اللى فات مات.. الفرق ف المشوار إن وقتها ماكانش فيه موبايلات.. إنما باقى الحاجات.. هى.. هى مع جميع الكماليات.. الهم يا ابنى ف بلدنا كاس وداير ولو كان جيلكم وقف طابور ع العيش إحنا وقفنا طوابير ع السجاير.. كنا نشتغل طول الأسبوع مفيش أجازة لا جمعة ولا حد.. كنا ننصب السرير بالليل الصبح يتهد.. يا ترى زمان كان فيه رجالة بجد واللا دلوقتى مفيش حد.. بيعرف ينام.. ياه ع الأيام.. على فكرة.. الباب ده عايز يرتاح واللا أقولك.. الصباح رباح..
الحبار مدير عام المنتدى
عدد المساهمات : 12635 تاريخ التسجيل : 02/05/2007 العمر : 38 الموقع : فى غيابات الهندسة المدنية رقم العضوية : 3 Upload Photos : أهم مواضيعى :
موضوع: رد: حوار مع ماضى النجار لعلى سلامه الأحد 22 مارس - 22:50
(4)
ريحة الفلاحين فوتك ف الكلام.. مصر يا ابنى من أيام عبدالسلام الكهربائى والحال.. كل ما يتعدل يميل.. وإيه تعمل عيون من أول ما بتصحى ولحد ما بتنام.. مابتشفش ولا شىء جميل نرجع مرجوعنا للى حصل وإزاى شهد العسل بقى سم هارى اللى سرب الامتحانات هو اللى سمح لمية المجارى.. تنقض وضوء النيل.. أما عن تصحيح المسار آدى المنشار وآدى الشاكوش وآدى الأزميل.. ودى إيد الهون وده الجرن.. مين يصدق أن الفلاح بيشترى العيش م الفرن.. وبيشتغل فراش ف مدرسة عارف.. الحالة يا ابنى.. مش صعبة دى خطيرة.. لما شعر راسى راح راحت معاه حاجات كتيرة.. مين اللى سرق ريحة الفلاحين وزرع الحزن والحيرة.. عارف يا ابنى كل اللى انكتب على لوح الأبلكاش.. ولا شىء منه عاش.. غير مصنع البيرة.. على فكرة.. الباب ده عايز يرتاح.. واللا أقولك الصباح رباح..
الحبار مدير عام المنتدى
عدد المساهمات : 12635 تاريخ التسجيل : 02/05/2007 العمر : 38 الموقع : فى غيابات الهندسة المدنية رقم العضوية : 3 Upload Photos : أهم مواضيعى :
موضوع: رد: حوار مع ماضى النجار لعلى سلامه الأحد 5 أبريل - 20:35
(6) فى السيما
ده نتش من مسمار بس ممكن يترف.. وده يا ابنى جرح قديم كنت فاكر إنه خف.. وده قطع بس بايخ وبيكشف العورة.. يوم ما قمنا هتفنا وقلنا تحيا الثورة.. كان أملنا يا ابنى كبير.. لكن مع مرور الوقت كترت المسامير.. واتهربد التوب.. ومصر الكبيرة بقت يا دوب.. كلمتين ع الرف.. معقول دار الزمن.. بالسرعة دى ولف.. ياه.. ماله الباب ده كده عامل زى الآه.. اللى لا بتموت.. ولا بتحب الحياة.. نرجع مرجوعنا تانى لأصل العبارة اللى واضحة زى الشمس ومش محتاجة لشطارة.. ف السيما بس يا ابنى بنت الباشا ممكن تحب مبيض محارة.. وف السيما يا ابنى بس عم إسماعين ياسين يقدر يسوق طيارة.. ما تقوللى قوم نام بقى والصباح رباح..
الحبار مدير عام المنتدى
عدد المساهمات : 12635 تاريخ التسجيل : 02/05/2007 العمر : 38 الموقع : فى غيابات الهندسة المدنية رقم العضوية : 3 Upload Photos : أهم مواضيعى :
موضوع: رد: حوار مع ماضى النجار لعلى سلامه الخميس 9 أبريل - 2:37
٨- سمارة
بتسألنى يا ابنى ليه ده حصل وإزاى..؟ راحت حلاوة الشاى.. من يوم ما اتخلط بالنشارة ده أنا اللى عشقت سمارة واتجوزت أم العيال.. اتغيرت أحوال.. دخل الغريب ع الصنعة واختفى الذوق والجمال.. دبلت إيدين كانت تتلف ف حرير.. وضاعت حاجات كتير.. كنا بنتسند عليها فى وقت شدة.. عارف.. كل ما أقول لروحى خلاص.. يا عم كفاية.. لم بقى العدة.. أرجع أحن من تانى وأشتاق لعيون سمارة اللى زمانها بقت جدة.. يمكن فى يوم تفوت وتقوللى نهارك أبيض فوتك ف الكلام.. ابتدينا نسمع عن طهارة اليد.. خدنا الحكاية جد.. قالوا مدة.. مدة واحدة ولا يمكن تتمد.. ومن يوميها واحنا بنعد ولحد ما تعبنا من العد.. عرفت يعنى إيه.. لزقة بغرا.. هو ده يا ابنى وضعنا.. هو الباب فين..
MISS_R مشرفة قسم شخصيات هامه والأدب والشعر
عدد المساهمات : 3628 تاريخ التسجيل : 13/12/2007 العمر : 34 الموقع : Inside you رقم العضوية : 381 الأوسمه : Upload Photos :
موضوع: رد: حوار مع ماضى النجار لعلى سلامه السبت 11 أبريل - 22:58
الحبار كتب:
والدنيا يا ابني ساعات جميلة وساعات بخيلة بتدينا بالقطارة.. وحيلتهم إيه الغلابة غير الولد.. هو وأكله ومستقبله وخفة دمه هدية للبلد.. وده كان التمن.. لكن ف عرف الغلابة مادام معاك حق الكفن.. وبتدفع الإيجار ووصل النور تبقى مستور..
موضوع: رد: حوار مع ماضى النجار لعلى سلامه الثلاثاء 14 أبريل - 2:11
(9)الشريحة
قاللى يا ابنى الخشب هو الخشب.. إحنا بس غيّرنا شكل الكنب.. ودخلنا عصر الصالون.. هدمنا آخر معتقل لكن بنينا ف كل شارع كراكون.. عارف.. أول ما قفلنا بابنا.. وحطينا كل أحبابنا ف شريحة تليفون.. قلت استر يالطيف.. هو ده يا ابنى المصرى الشهم الجدع أبو دم خفيف.. هو ده اللى عبر وحطم خط بارليف.. وهو اللى استورد أكل القطط وباعه للناس على إنه بولوبيف.. هو اللى عمل الأغانى الجميلة دى وهو اللى سرق وغش فى وزن الرغيف.. هو اللى ولع ف روحه يوم ماتش الأهلى والزمالك وهو اللى اتبرع لمستشفى السرطان وخد بإيد العاجز الكفيف.. وهو اللى شحن أهله ف عبارة وسلمهم للوطن جثث وقبض التعويض والأتعاب والمصاريف.. كان باين يا ابنى إن اللى جاى صعب أوى ومخيف.. وكان الله ف العون.. هو الباب فين..
الحبار مدير عام المنتدى
عدد المساهمات : 12635 تاريخ التسجيل : 02/05/2007 العمر : 38 الموقع : فى غيابات الهندسة المدنية رقم العضوية : 3 Upload Photos : أهم مواضيعى :
موضوع: رد: حوار مع ماضى النجار لعلى سلامه الإثنين 20 أبريل - 23:11
١١- بياعة المناديل
على فكرة القلم ده من ريحة جدى كان محامى بس كان بيحلها ودى وكان شديد زى عرقين خشب بيسندوا البيت ساعة القطر ما يعدى مات وخد البركة وساب اليافطة واللمبة النيون عارف أول يا ابنى ما كتر الطلب ع الكالون أبو ست تكات وتلاتة لسان عرفت إننا ابتدينا نخاف من بعض وخلاص مفيش أمان أقولك إيه كمان.. كبرت الكروش وابتدى اللى معاه يستخبى م اللى ممعهوش صعب يا ابنى تكتشف بعد العمر ده كله إن حتتين الدهب اللى متشالين عشان جهاز البنات فالصو والدهب مغشوش.. بقولك.. لو مرة صادفت ست عجوزة وش مكرمش بس صبوح وجميل واقفة تنادى على المناديل خايفة تعدى الشارع وبتنهج من حمل تقيل لو ف إشارة خطفت قلبك ريحة الفل مع الياسمين أو لمسة روحك غنوة جميلة صوت م السما بيفكرك بالفرح مع إنه حزين.. عارف الست دى مين أوعى تقولى ماخدنهاش ف المدرسة
الشيمـــاء عضو مرشح للإشراف عن قسم الأدب والشعر
عدد المساهمات : 1418 تاريخ التسجيل : 06/08/2008 العمر : 33 الموقع : أرض الله الواسعة رقم العضوية : 1552 Upload Photos : أهم مواضيعى :
موضوع: رد: حوار مع ماضى النجار لعلى سلامه الثلاثاء 21 أبريل - 7:53
حوار رااااااااااائع جدا
شكرا ليك يا بشمهندس على هذا الموضوع الجميل
الحبار مدير عام المنتدى
عدد المساهمات : 12635 تاريخ التسجيل : 02/05/2007 العمر : 38 الموقع : فى غيابات الهندسة المدنية رقم العضوية : 3 Upload Photos : أهم مواضيعى :
موضوع: رد: حوار مع ماضى النجار لعلى سلامه الأربعاء 20 مايو - 8:37
حوار مع ماضى النجار
كتب على سلامة
١٤- كوم القش المطر يا ابنى حاجة تانية خالص غير عربية الرش.. ساعات أقضى الليل بحاله وأنا بدور ف كوم القش.. والف على محطات الراديو يمكن ألاقى غنوة.. فيها من ريحة سمارة لكن ف الآخر بنام واصحى على صوت الوش.. عارف.. غيرت مكان السرير بقى قفايا للدولاب ووشى للحيط بس برضة مش مرتاح.. يا سيدى.. أهى نومة والسلام يعنى اللى جاى م الأيام ها يكون أد اللى راح.. - على رأيك.. عموماً.. كلها سواد الليل ويطلع النهار وتتفرّج على ميدان الجيزة.. وتعرف إن المشى جنب الحيط عمره ف يوم ما كان ميزة.. وإن أنا النجار اللى ساب كل شىء حواليه يزيق.. أنا اللى رميت البراح وسكنت ف ركن ضيق.. فوّتك ف الكلام.. ابتدينا نسمع عن التغيّر.. لكن بعد هات وخد.. وروح وتعالى.. وكلام كتير.. مفيش شىء اتغير يا ابنى غير وضع السرير.. وقفايا اللى بقى باصص ع الدولاب.. ياه.. هو انت لسه يا ابنى ف نفس الصفحة ونفس الكتاب..! اومال بتاخدوا إيه ف المدرسة؟
موضوع: حوار مع ماضى النجار لعلى سلامه 
الأربعاء 18 مارس - 16:40
