eng_ghost مراقب عام المنتديات والحوار العام ومنتدى الهندسة المدنية
عدد المساهمات : 4632 تاريخ التسجيل : 16/04/2008 العمر : 38 الموقع : just in my dreams ,, i can reach any place رقم العضوية : 1036 Upload Photos :
موضوع: الطريق إلى إسرائيل أحمر و طويـــــــــل ,,!! الثلاثاء 17 نوفمبر - 0:15
تسمع كل من ذهب الى اسرائيل من اجل العمل و كأن الطريق لهناك مفروشا بالورود، وكأن شتى انواع الخلاف بيننا و بين دولة اليهود قد زالت و لم يتبقى سوى المصالح الشخصية و على رأسها كسب المال من اجل حياة افضل. يتناثر الكلام حول السفر لاسرائيل .. كلاما غامضا يسيل معه لعابى الصحفى لكشف ولو جزء من هذا الغموض. وعلى طريقة احمد حلمى "لو سمحت الريس موجود"، ذهبت للسفارة الاسرائيلية تحت كوبرى الجامعه وهناك استوقفنى امن السفارة فوجدت نفسى مرددا : لو سمحت ممكن ادخل السفارة.
يجيبنى احد افراد الامن بشئ من الدهشة : ليه؟ وبنفس طريقتى البلهاء اجيب: عايز بس اعرف اجراءات السفر لاسرائيل. وهنا شعرت بأن شيئا ما قد حدث و يأتينى صوتا من داخل كا بينة الأمن صائحا: طيب لف و تعالى. أدخل تلك الكابينة لأجد ظابطا و مساعدا و موظفا وجهازا للكشف عن الحقائب. يبادرنى الظابط متسائلا: عايز تعرف ايه يا حبيبى؟ ارد و علامات البراءة تكسو ملامحى : عايز بس اعرف اجراءات السفر لاسرائيل. ترتسم علامات الدهشه و الاستنكار و الاستحقار فى نفس الوقت على وجه هذا الظابط وهو يهم بتوجيه سؤاله الثانى : وعايز تعرف ليه اجراءات السفر لاسرائيل ؟ اجيب بنفس البراءة : عشان اروح اشتغل. وهنا يخرج الظابط عن شعوره موجها كلامه بنبرة انفعالية: عايز تروح تشتغل عند اليهود يعنى تبقى خدام عند الاعداء. اقاطعه للحظه: لا يافندم مش خدام و لاحاجه .. انا هاروح اشتغل زى اى شغل فى الدنيا واخد فلوس. يتمالك الظبط اعصابه موجها سؤلا اخر: انت مخلص ايه؟ انا: ليسانس اداب. الظابط : قسم ايه ؟ انا: ليسانس اداب فرنساوى. الظابط: وكمان فرنساوى اومال ايه اليأس و الاحباط اللى انت فيه ده! ارد متلامضا: يا فندم انا دفعة 2004 و لسه مش لاقى شغل هاتلى شغل هنا و انا ألغى فكرة السفر لاسرائيل. يرد الظابط مستمرا فى تمالك اعصابه: انت كبير بما فيه الكفايه و تعرف تجيب شغل لنفسك ... وواضح انك ابن ناس و لا بس نضيف، اومال سيبت ايه للى مش لاقى ياكل؟!!!. ويستطرد الظابط متسائلا : و بعدين انت جاتلك منين فكرة السفر لاسرائبل انت تعرف حد هناك؟ اجيب مستعبطا: لا و الله ما عرفش حد هناك. يؤكد الظابط على نفس السؤال : اومال جاتلك منين فكرة السفر لاسرائيل؟ اجيب مختلقا قصة على السيد الظابط: اصل انا شوفت فى التليفزيون حلقة من برنامج وائل الابراشى بيقول فيها ان فى اسرائيل 22 الف شاب مصرى عايش بيشتغل و بيكسب و بيتجوز. تفلت اعصاب الظابط هذه المرة : وائل الابراشى ده ابن.............. هو يعنى كان عد قدامك 22 الف واحد وائل الابراشى بياكل عيش و بيعمل شغله. يكمل الظابط وهو منفلت الاعصاب "ورينى بطاقتك" فيفاجأ بأن عنوانى بالبطاقة الاسماعيليه فيتمتم " وكمان من الاسماعيليه يعنى اهلك حاربوا و اتهجروا وشافوا الذل بسبب اليهود وانت برضه عايز تسافر تشتغل عندهم دا انت ابوك لويعرف هايتف على وشك". و بعد ان قام باخذ بياناتى كامله ومعها رقم هاتفى المحمول يعيد الى بطاقتى الشخصيه موجها تحذيرا شديد اللهجه " تعرف لو شفت وشك هنا تانى او فى اى حته فيها اسرائيلين مش هارحمك. وهانفذ معاك الاجراء الطبيعى اللى ينفع مع اللى زيك" انا : اللى هو ايه يا فندم؟ يعض الرجل على شفتيه : اللى هو اربع ايام تحرى فى قسم الجيزه، و بعدين اربع ايام فى امن الدوله يعرفوا فيهم أراراك ايه و ملف محترم يوقفلك المراكب السايرة فى حياتك. تحركت قدماى ببطئ شديد مغادرا كابينة الامن من امام السفارة الاسرائيلية لا اعرف ماذا افعل او ماذا اقول. حالة من الاحباط الشديد تعترينى لفشلى فى دخول مقر السفارة الاسرائلية ومن ثم كشف المزيد من الغموض. -----------
يتنامى الى مسامعى اسم احد شركات السياحة الشهيرة بمنطقة شبرا، حيث يؤكد البعض قدرتها فى الحصول على تأشيرة دخول سرائبل لكل من يطلبها. اتوجه لمقر هذه الشركة وفى ذهنى كل ما حدث لى مع السادة المسئولين عن امن السفارة الاسرائيلية. اتوجه متوجسا خشية ان يتم القبض على هذه المرة اتوجه وعلامات القلق تظهر واضحة امام كل من يرانى. تبادرنى موظفة استقبال شركة السياحة: اى خدمة يا فندم؟ ارد متلعثما : لو سمحت عايز اسافر اسرائيل. ترد الموظفة دون اى تردد وكأنى طلبت السفر الى فرنسا مثلا: عايز تروح سياحة ولا شغل؟ انا: سياحة. الموظفة: طيب اتفضل عند مكتب الاستاذ يسرى. تشير الى ناحية مكتب الاستاذ يسرى فأتوجه اليه وقد اطمئننت قليلا. ادخل مكتب الاستاذ يسرى موجها نفس الطلب : عايز اسافر اسرائيل. الاستاذ يسرى: سياحة و لا شغل؟ انا : هو ايه الفرق يا فندم؟ الاستاذ يسرى: سياحة تأشيرتها سهلة انما شغل دى ما أقدرش أوعدك بيها. انا: و التكلفة فى حدود قد ايه؟ الاستاذ يسرى: لا بسيطه بس المشكله مش فى التكلفة المشكلة فى الاجراءات. انا: اجراءات ايه ؟ الاستاذ يسرى: 1. تقديم طلب للسفارة الاسرائيلية. 2. اجراء مقابلة شخصية مع موظف بالسفارة الاسرائيلية. 3. تقديم طلب لامن الدولة بالدور الاول بمجمع لتحرير. 4. اجراء مقابلة شخصية (تحقيق) بامن الدولة للتأكد فعلا من انك مسافر سياحة مش عشان اى حاجه تانية. ارد انا : حاجه تانية اعوذ بالله. ثم استدرك فى الكلام عائدا الى سؤال حول حدود التكلفة المادية للسفر الى اسرائيل : بس برضه يا فندم احب اعرف تكلفة السفر هاتكون كام؟ الاستاذ يسرى: ما تشلش هم حاجه وعموما ياسيدى 115 دولار تذكرة اتوبيس ومن 200 دولار ل 300 دولار رسوم شركة السياحة اللى هاتستقبلك فى اسرائيل. اتدخل مقاطعا : وبالنسبة لرسوم الشركة هنا؟ الاستاذ يسرى: حاجة بسيطة مش هانتكلم فيها الا بعد موافقة امن الدولة. اتدخل مقاطعا للمرة الثانية: واضح ان موافقة امن الدولة حاجة مهمة جدا اومال الناس الى بتسافر دى بتسافر ازاى ؟ الاستاذ يسرى: على فكرة زمان ماكنش المفروض الحصول على موافقة امن الدولة الحصول على موافقة امن الدولة اجراء جديد من كام سنة كده بس. ينتهى حديثى مع الاستاذ يسرى بعد ان يتضح امامى ان جملة تكلفة السفر لاسرائيل لن تتعدى ال 500 دولار، يعنى على اقصى تقدير 3 الاف جنيه مصرى. اغادر شركة السياحة مع وعد بالمثول غدا للبدء فى الاجراءات لكن بكره ميــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــن ....!!!!
-----------
ألتقى عادل شكوكو، 39 سنة، رئيس رابطة مشجعى النادى الاسماعيلى عن شارع مكة بالاسماعيليه، واحد شباب الاسماعيليه اللذين سافروا لاسرائيل خلال فترة التسعينات و تحديدا فى 1995. اتوجه اليه مداعبا اياه: الدورى هنا احلى و لا فى اسرائيل ؟ شكوكو: لا طبعا الدورى هنا احلى، رغم ان عدد الفرق اللى بتنافس ع الدورى الاسرائيلى اكتر من عندنا. ونظام دخول الماتشات فى اسرائيل احسن من عندنا .. هناك كل واحد له الكرسى بتاعه، و الامن مش كتير زى هنا .. و مافيش سور بينك وبين الملعب زى اوروبا بالظبط. انا : سافرت ازاى لاسارئيل يا عم شكوكو؟ شكوكو: زى اى حد بيسافر لهناك. انا : يعنى روحت السفارة الاسرائيلية تطلب تأشيرة؟ شكوكو: لا انا ماروحتش السفارة الاسرئيليه ... انا روحت شركة سياحة بتجيبلك اى تأشيرة فى العالم. انا : وهل شركة السياحة بتجيبلك تاشيرة عمل؟ شكوكو: لا بتجيب تاشيرة سياحة مكتوب عليها "المذكور غير مصرح له بالعمل" بس انا كسرت التاشيرة و اشتغلت لانهم هناك محتاجين ناس للشغل. انا : سفرك لاسرائيل كلفك كام؟ شكوكو" 1350 جنيه مصرى. انا : كنت بتشتغل فين بالظبط فى اسرائيل؟ شكوكو: كنت بشتغل فى يافا وهى منطقة تجمع عرب 48 ودول ناس مسلمين ويعرفوا ربنا وكنت بشتغل عند واحد مسلم فى محل خضار.
انا: كنت بتقبض كام؟ شكوكو: كنت باخد 1200 دولار فى الشهر و بشتغل 10 ساعات فى اليوم وعندى يومين اجازة فى الاسبوع. انا: الاسعار هناك غالية؟ شكوكو: لا الاسعار هناك زى هنا بس الدهب هناك ارخص من هنا. انا: حد كان بيضايقك هناك؟ شكوكو: لا خالص و الصراحة ما شوفتش منهم حاجه وحشة. انا : يعنى لو انت ماشى ووقعت هاتلاقى حد يجرى عليك يلحقك ويوديك مستشفى؟ شكوكو: مش اليهودى اللى هايلحقك، انما زى ما حصل مع ميدو صاحبى لما اتخبط فى بوابة البيت الحديد ودماغة اتفتحت ... ماكنش ينفع حد فينا اللى يوديه لاننا كاسرين فيزا وهانترحل لو وديناه بنفسنا المستشفى، فصاحبة البيت، وهى من عرب 48، هى اللى وديته المستشفى يتعالج ودخلته باسم ابنها. انا : من وجهة نظرك هل يصح انك تروح تخدم اليهود و تشتغل عندهم؟ شكوكو: انا ما بخدمش الاعداء و لا بشتغل عند يهود، وربنا قال" وما تدرى نفس ماذا تكسب غدا وما تدرى نفس باى ارض تموت" ... وبعدين ما انت ممكن تروح هولندا و يطلع اللى بتشتغل عندهم يهود. دا غير ان حكومتك مطبعة العلاقات مع اسرائيل وموظفين الدولة رايحين جايين على اسرائيل، والريس راح عزا اسحق رابين ... ثم انا سافرت رسمى قدام الناس كلها وقدام امن الدولة، ولو كان فيه حاجه غلط كانوا منعونى .... من الاخر ربنا كان كاتبلى رزق هناك. انا: حد ضايقك لما رجعت؟ شكوكو: لا ابدا كل اللى حصل تحقيق مع امن الدولة فى المطار، وتحقيق مع امن الدولة هنا فى الاسماعيليه. انا: رجعت ليه ؟ شكوكو: مصر وحشتنى. ----------- انهيت حديثى مع عادل شكوكو لأفاجأ بالاستاذ هيثم فرج، 27 سنه، بيقول انا نفسى اروح اسرئيل ... وقبل حتى ان التفت اليه وجدته ساردا اسبابه للسفر الى اسرائيل قائلا: انا دفعة 2003 يعنى متخرج من 5 سنين ... ولحد النهاردة مش لاقى شغل ثابت وعلى فكرة انا متجوز وعندى بنت. انا: بس فى بلاد تانية اشمعنى اسرائيل؟ هيثم: لان السفر للبلاد التانية صعب انما لاسرائيل سهل. انا : سهل ازاى؟ هيثم: هاوصل للسفارة واخد تاشيرة. اقاطعه موضحا له انى قد ذهبت للسفارة ولم تكن الامور ابدا بهذه السهوله ... وانه قد تم تهديدى بالزج بى فى تحقيق بامن الدولة. هيثم: انا بقى مستعد اروح امن الدولة لان المره الوحيده اللى اشتغلت فيها هنا كانت الساعة شغل بـ 70 قرش. انا : بس اسرائيل دولة بينا و بينها مشاكل كتيره جدا ... و السفر لاسرائيل يحمل اتهام فورى بالخيانه؟ هيثم: انا مش شايف اى خيانة انى اسافر اشتغل انا هاروح اشتغل مش هاروح اتجسس. انا : بس اسرائيل دى دولة اذتنا كتير .... برضه مصمم انك تروح تشتغل هناك؟ هيثم: انا شخصيا محدش اذانى فى حاجه. انا : طيب عرفت منين ان الشغل هناك سهل؟ هيثم: من الناس اللى راحت اشتغلت و رجعت. انا: الناس دى قالولك ايه بالظبط؟ هيثم : قالولى هناك فى عدالة اجتماعية ومرتبات مجزيه ... الشيال هناك بياخد 6 دولار فى الساعة. ----------- انتهى حوارى مع هيثم .. اشعر بمزيج من المرارة و الحزن معا.. احاول اقناع نفسى بمبرر ان اللى ايده فى الميه مش زى اللى ايده فى النار .. بس ولو
موضوع: الطريق إلى إسرائيل أحمر و طويـــــــــل ,,!! 
الثلاثاء 17 نوفمبر - 0:15
