مذكرات مشرف في منتدى

بصوا بقي يامعلمين
انتبهولي كده وصحصحوا الساعدى
وانا لسة منتمتش لغاية دلوقتي بسببكوا
هتجننوني خليتوا شعري يقع من كتر اما شديت فيه
بصوا
من النهاردة ومن الساعة دي
مفيش زفت مواضيع محدش عاد يكتب مواضيع هنا
عايزين تكتبوا حاجة اكتبوها برة مش هنا
مش طالبااااكوا بقولكوا
دا اللي ناقص كمان
اما انا مسكت الاشراف هنا ليه
ولو حد ناوي يكتب مواضيع يكتب موضوعين بكتيره اوي
وليه موضوعين خليها موضوع واحد كفاية
وليه تكتبوا اصلا متكتبوش اعملو اللي قولتلكوا عليه واكتبوا برة مش هنا
مش ناقصين والنبي
كل شوية موضوع مخالف ومتكرر وبلاوي زرقة
هصرف عليكوا من جيبي كمان واصلحلكوا ولا ايه
ارحموني
قرفتوني في عيشتي حرام عليكوا
كان يوم مليان رعد وبرق وزعابيب يوم ما مسكت الاشراف
سيبوني في حالي
انت ياللي بتزغر بعنيك انت ايوة بتبص عالموضوع بقرف كده ليه
مش عاجبك
طب اعمل حسابك بقي ان مواضيعك كلها مخالفة
هاه ومنتش معتبها تاني
يانا يانت في المنتدي
مش عارفين نربيكوا ولا ايه
تعبتوني الله يتعبكوا
وليكن في معلمكوا اللي هيعترض
هغوزه
مش هسيبه غير وهو متعور
واللي مش عاجبه ميتكلمش اساسا
يتكلم ليه
وكمان مفيش ردود علي اي مواضيع
اللي عايز يرد يدفع نص جنيه في الخزنة برة وبعدين يرد
هو ده النظام
وقايمة الاسعار هتنزل قريب
وشوفوا اما اقولكم
توقيعات ملهاش لازمة مش عايزين
يعني تخش هنا بأدبك
ومتتكلمش
ولو نكتة عجبتك متضحكش تضحك ليه اساسا مش عايزة اسمع صوتك
داخلين القسم نهزر بقي ولا ايه
وبعدين وانت بتقري الموضوع ده تربع ايدك وتنزل ايدك من عالماوس اساسا
وتبص عدل
بلاش التتنيحة دي
ولا رفعة الحاجب
لحسن انا عرفاكوا مبتجوش غير بالعين الحمرا
انا حذرت اهو
اللي مش هيلتزم باللي قولته هطلعهولكوا قتيل

اتمنى انكم تكونو فهمتوا قصدى من هذا الموضوع

براوة عليك يا قبطان

زائر

جااااااامده موووت يا بشمهندس
تسلم ايدك

الفكره من الموضوع يا باشمهندسين مش الضحك فقط
الفكره أكبر من كده بكتير أنا حبيت اعرف بالكلام ده بعض عيوب المشرفين اللى مش عايزين نشوفها من المشرفيين الحاليين أو الجددمن مثل أن كل مشرف يحاول يفكر أو تسول له نفسه أنه يعتقد أن القسم ملك شخصى له يفعل فيه كما يشاء دون أن يراعى الأخريين أو يترك الموضوع اللى على هواه ويحذف الموضوع اللي على هواه وأفعال كتيير بنشوفها من المشرفين

ولأزم المشرفيين كلهم يعرفوا أن الأقسام الله هم مشرفين عليها أو لسه هايتعينوا مشرفيين عليها في المستقبل ما هى الا أمانه فى أعناقهم تستوجب صيانتها والحفاظ عليها

وأنا حبيت أسرد لكم الموضوع بطريقه فكاهيه حتى يستحوز على أهتمامكم اكثر

المشرف العام على الاقسام/
القبطان

جميل يا قطبان الموضوع الساخر ده اللى بيوضحلنا طريقة تعامل المشرف مع الآخرين اللى لازم
تبقى أخويه ونابعه من شخص متعاون واللى لازم نتبعها كلنا علشان نحافظ على نظام المنتدى
والمنتدى كمان يبقى دايما ناجح إن شاء الله.

والله تمام كلامك يا قبطان ..... و بصراحة أنا كان نفسي أكون مشرف معاكو في المنتدى لأني فعلا متحمس جدا للمنتدى و مقتنع بيه جدا .... بس المشكلة اني مش عندي خط نت دائم بس هما اليومين دول ولما صاحب الخط اللي انا شغال بيه دلوقتي يرجع هاقوللكم أشوف وشكم بخي بيبكى

ر...بس البركة فيكم و الى الأمام دائما و عموما أنا في الخدمة لو في مشاكل ممكن تشركوني معاكم فيها و ان شاء الله نحلها مع بعض و يارب يفضل المنتدى ده على طول في شكل رائع و مظهر عظيم يليق بكلية الهندسة بأسوان ........ شكرا

جامد والله يا قبطان