i_love_h
مهندس جديد
عدد المساهمات : 40
تاريخ التسجيل : 21/08/2008
العمر : 34
رقم العضوية : 1652
Upload Photos : 
 |  موضوع: عبده وفتوح !  الأحد 7 سبتمبر - 19:37 | |
|
يكتبها : المصري
عبده وفتوح
| كان عبدالمنعم جارنا في البيت القديم.. الحقيقة من أول يوم شفته عرفت أنه نموذج عجيب.. زمان كانت الدنيا حلوة والأشية معدن. لكن عبده عمره ما شاف حاجة تفرح.. فيه ناس كانت بتقول عليه أعمي القلب.. وناس تانية قالت إنه أعمي البصيرة.
في الأول عبده صعب علي.. كل حاجة عنده زفت والناس كلها حرامية.. والستات عنده مش مضبوطة.. والعيال ناقصة تربية.. مديره حرامي ووكيل الوزارة شيخ منصر والوزير مسلكاتي.
المصيبة أن عبده كان بيشتكي في زمن كانت فيه الأزمات قليلة والحالة جميلة.. ودايما أسأل نفسي ياتري عبده لو كان عاش دلوقتي يا إما كان انتحر. يا إما كان قتل اتنين تلاتة.
عبده كان علي عكس جاره أحمد فتوح اللي الناس كانت مسمياه فتوح نحمده.. فتوح ماتت بنته وقال نحمده.. بيت أمه وقع وجت تعيش معاه وبرضه حمد ربنا.. ابنه ما جابش مجموع في الإعدادية وراح صنايع وبقي أسطي خراط بريمو.. فتوح قال لابنه ياما قلت لك كل واحد ميسر لما خلق له.. كنا في العباسية نضحك أن ربنا خلق "عبده شكوي" و"فتوح نحمده".. وسبحان الله خلاهم جيران.. والجيران تسمع كلام كل واحد مع مراته وعياله ويتعجبوا.. فتوح يسألها طابخة إيه يا بطة تقول له بصارة يقول نحمده.. وعبده يسأل فتحية.. حنطفح إيه يا وليه! تقول له شوربة ولحمة وملوخية. يرد بغضب كل يوم لحمة يا مفترية بتيجيبي فلوس منين؟! ترد كله من خيرك يا عبده.. يبرطم حلبتوني يا ولاد المؤذية.
عبده كان عنده عربية "تاونس" كل يوم يسب لها الدين عشان بتاكل بنزين.. وفتوح عاش ومات معرفش غير تروماي ..17 أول واحد ركب تكييف كان عبده يوم والتاني ولعن أبواللي اخترعه لأنه بياكل كهربا.. فتوح كان عنده مروحة مصانع يصلحها يومين ويشغلها يوم وعمره ما اشتكي.
حتقولي إيه اللي فكرك بالاتنين.. أقولك.. زمان كان فيه الأبيض عشان نشوف الأسود.. ولقينا واحد حامد شاكر ربه.. والتاني ساخط ولاعن حظه.. وكنا نقول يا سلام علي حكمة ربنا.
جاب لنا الحامد واللاعن لغاية عندنا.. لكن دلوقتي الناس كلها بتشتكي.. وكل واحد يقول اشمعني.. وليه.. وعشان إيه.. الناس نسيت ربنا. ومبقتش تعرف إن له حكمة في توزيع الرزق. وفي نعمة الصبر.. نفسي أشوف واحد يقول كده رضا.. أو الحمد لله.. أبدا.. ساعات أقول ربنا غضبان علينا وشال البركة مننا.. وساعات أقول إنه امتحان ولازم نصبر وأي حاجة نشوفها ماتجيش جنب اللي شافه أيوب!.
نفسي الناس ترجع تاني زي ما كانت زمان.. ناس تشكي وناس تحمد ربنا.. إنما كده ماينفعش الواحد يمسك جرنال يتهيألي يجيب بندقية يضرب بيها الناس.. وجرنال تاني يضحك عليك ويقول لك كلام تاني! هوه فيه إيه.. بلدنا جري لها إيه.. بالمناسبة ولاد فتوح كبروا وبقوا زي "عبده" اللي كان أبوهم بيقول عليه إنه عمره ما حمد ربنا.
|
| |
|
