علي سلامة .. شاعر العامية المصرية .. أكبر موسوعة شعرية

تذكير بمساهمة فاتح الموضوع :

علي سلامة

وعلي سلامة لمن لا يعرفه شاعر جامد قوي
قصائده بالعامية

ويارب تعجبكم زي ما أبهرتني أشعاره ببساطتها
وخفة دمها ولعبها على الوتر الحساس

خايف أصحى مالاقيش مصر

ساعات بقلق بالليل

يعني بالليل شوية كده

قبل الفجر

حسب الظروف كده

بعد العصر

خايف يوم أصحي

وأفتح الشباك

مالاقيش مصر

ألاقيها لمت هدومها ومشيت

لمت هدومها

علي نيلها

علي هرمها

وطفشت

وحلفت ميت يمين ماهي قاعدلنا

ماهي زهقت

تعبت

إتخنقت

أصلنا زودناها

أكننا استعمرناها

ورثناها

مصر البنوتة الحلوة

اللي زي القمر

بقت عجوزة وشايبة

وبان عليها الكبر

خايف يوم أصحي

وأفتح الشباك

مالاقيش مصر

معمل التحاليل

الميه زي الشهد

أشرب وأرتوي يا نيل

يخضر قلبي

ويكتر ف إيدي القليل

يا نيل

ده أنا اللي بيني وبينك عشق

لا أقدر علي فراقك

ولا تقدر علي بعدي

مين ابتلاك وخلاك مريض معدي

ورماني أنا وانت

في معمل التحاليل

خربوها

الأوله آه

والتانية … آه

والتالتة ... مفيش

معنديش

نفسي أقول آه

معنديش

قالوا إقلعوا

قلعنا

ومفيش بتعكوا

وبتاعنا

وصار متاعهم .. متاعنا

وألف مرة إتلسعنا

و برضك مفيش

الأوله …آه

والتانية .. آه

والتالتة ... مفيش

قالو إبصموا

بصمنا

ده بكرة سكر

وسمنا

سيبنا غيرنا رسمنا

إتقسمنا

على اد ما فينا من جراح

ابتسمنا

الأولة .. والتانية .. والتالتة

مفيش

الدنيا هاصت .. وهيصنا

ريحنا لما .. تيسنا

تاه الطريق من اتوبيسنا

يئسنا

لا عرفنا ليه قلعنا

ولا عرفنا

إيه لبسنا

الأوله والتانية والتالتة مفيش

واهى ماشية تجرى المسائل

ولا حد سائل

تصحى مرسي

ينام وائل

ده انا كنت واد م الأوائل

وكنت شاطر شطارة

وكنت فن .. وعمارة

وكنت صاحب تجارة

معرفش إيه اللى صابنى

فى قلبى ضاعت سمارة

خربوها

خربوها ولاد القطقوطة

لا طرحت باميه ... ولا قوطه

وسابوها فى سرير مربوطه

و يا ريتهم طلعم رجاله

و يا ريتها رايقه .. ومبسوطه

خربوها

دول سرقوا الهوا ... والضى

ويا عينى ... عليها بلد

يا ريتها ما قالت أى

ويا ريتها ما جابت ولد

خربوها

دول سرقوا النخلتين .. والنهر

والمدرسة

والهندسة .. والجبر

سرقوا الشوارع ... والمعانى

والأغانى

وسيد درويش .. والريحانى

سرقوا المشاعر .. والمزاهر

والبخور

سرقوا الحزن

سرقوا حتى القبور

خربوها

دول سرقوا الطيب .. والزين

وسرقوا …الكحل من العين

وسابوها تاكل بالدين

وان يوم أتعدلت

عوجوها

خربوها ولاد ال .....

خربوها

خس وجزر

فاكر الأرنب الغضبان

بتاع زمان

اللي كان في كتاب المطالعة

لما قال أنا زهقان

م الخس والجزر

قالوا عليه كفر

ومرمطوه غربة وسفر

م الواحات للقلعة

لحد ما قال خلاص حرام

مش قادر أقول الآه

وكل أمه ما تقوله

إيه أخبار الجزر

يقولها يا سلام يا سلام

وأخبار الخس

الله الله

إيه الحلاوة دي

طب فاكر

القضاء ع الإقطاع وأعوانه

الله يرحمك بقي يامه

قلتيلي الكتاب بيبان من عنوانه

طب فاكر

كامل عامل ف المصنع

معرفش فين المصنع

وكامل علي ما اسمع

مات غريق وهو بيحاول

يهرب ل إيطاليا

فاكر تحيا الحرية

طب آدينا كلنا بقينا

أرانب ف حلة ملوخية

بالهنا والشفا

يا كابتن

ابتسامة مصر

بلدي

ورغم الكدب

أنا لسه بصدقها

خايف عليها من أزمة قلبية

وخايف كمان

مانقدرش نلحقها

وبحلم بموسم مطر

يغسل قلبها

مش يغرقها

يارب تحفظ إبتسامتها

لا يخطفها حرامي

ولا حزن يسرقها

أحسن م الأول

قلنا النضافة م الإيمان

البلد بقت أوسخ م الأول

رفعنا شعار الأمن والأمان

الخوف بقي أكتر م الأول

كهربنا السور

حطينا سم فيران

الحرامي بقي أشجع م الأول

اتعلمنا لغات

وعلوم بيئة وإنسان

الجهل بقي أبشع م الأول

وفرضنا ضرايب

ع الهوا والموت والأحزان

ضهر البلد انحني أزيد م الأول

وعندنا زيادة ف عدد السكان

بس احنا أقل كتير م الأول

ومحمد وحنا

بيتقابلوا بالأحضان

بس الحضن

مش صافي ليه زي الأول

وأنا وانت سوا ف كل دقيقة

وكل مكان

لكن مش شايفين بعض زي الأول

وأهو ميت مسنود علي عيان

وبيتمني العمر يطول

يمكن

يمكن

يرجع أحسن م الأول

لو موصوفلك

لو موصوفلك ترجع.....جوة الهيصة
وعيش
لو موصوفلك ترجع....روح وياريت
متجيش
لو موصوفلك تضحك......اضحك
على أحزانك
لو موصوفلك تعشق...حب واقف فى
مكانك
لو تختار فى زمانك........أحسن
ماتنقيش
لو موصوفلك تحلم....قضى الليل
بردان
واعمل روحك ترتاح....ناسى انك
انسان
لو موصوفلك ترتاح....نادى وقول
يا جراح
ما يغركش براح ساكت ما بيبكيش......
ساكت ما بيبكيش !

تم بحمد الله ومنقووووول للأمانه

» موسوعة على سلامة :: شاعر العامية
» حتى يكون عندنا ثروة شعرية
» موسوعة شاملة عن جهاز المخابرات العام المصرية
» أكبر موسوعة إسلامية في تاريخ المنتديات لكل مسلم ومسلمة
» أكبر موسوعة تجميعية لمواد تعليمية على مستوى المنتديات العربية