علي سلامة .. شاعر العامية المصرية .. أكبر موسوعة شعرية

تذكير بمساهمة فاتح الموضوع :

علي سلامة

وعلي سلامة لمن لا يعرفه شاعر جامد قوي
قصائده بالعامية

ويارب تعجبكم زي ما أبهرتني أشعاره ببساطتها
وخفة دمها ولعبها على الوتر الحساس

خايف أصحى مالاقيش مصر

ساعات بقلق بالليل

يعني بالليل شوية كده

قبل الفجر

حسب الظروف كده

بعد العصر

خايف يوم أصحي

وأفتح الشباك

مالاقيش مصر

ألاقيها لمت هدومها ومشيت

لمت هدومها

علي نيلها

علي هرمها

وطفشت

وحلفت ميت يمين ماهي قاعدلنا

ماهي زهقت

تعبت

إتخنقت

أصلنا زودناها

أكننا استعمرناها

ورثناها

مصر البنوتة الحلوة

اللي زي القمر

بقت عجوزة وشايبة

وبان عليها الكبر

خايف يوم أصحي

وأفتح الشباك

مالاقيش مصر

استراحه ع الصحراوي

الجو نار

سايق ومحدش معايا

غيري انا والذكريات

وحبه حاجات

ازازه الميه

ونظره عينيا

اللي شايفها في المرايا

بتبص لي من وقت للتاني بغباء

كأنها عارفه الحكاية

او واخدة بالها من الطريق

مر السفر من غير صديق

اول شمال احود ولف

الغنوه سكتت

والشريط عمال يسف

وازاي تخف

ياالم من غير جراحه

ادي استراحه

دماغي محتاجه الصراحه

وقلبي محتاج الحنان

اركن هنا

اشرب ياعم قهوتك

ويالا علشان

نلحق مكان قبل الغروب

واوعي الردار يسحب

ف لحظه غنوتك

معتش فاضل في الطريق

ولا استراحه

البدلة الكحلي

حد فاكر عيد الاستقلال..

يا عم ده أنا بغلط..

ف أسامي العيال..

ما بقتش شايف من ملامحهم..

غير الكتب والكراريس..

ودرجات آخر السنة..

وإنتي وأنا..

مش باقي مننا..

غير فستان الفرح..

والبدلة الكحلي الضيقة..

اللي زحمين الدولاب ع الفاضي..

وصورة عروسة وعريس..

نفسي آخد بعضي علي جنب..

وأسأل روحي كام سؤال..

ولا أقولك..

خليها بقي ليوم الخميس..

البيانو

جربت تتعشي علي أنغام البيانو

وضوء الشموع

جربت تتكلم مع قلبك

ولو الكلام مش عجبك

تغير الموضوع

جربت تسافر لوحدك

وترجع لوحدك

جربت تبكي من غير دموع

جربت تأجل أفراحك

وسألت نفسك

ليه بنعمل للميت أربعين

وللمولود سبوع

جربت تجري ورا الأتوبيس

أو تجري م الأتوبيس

جربت تقف في طابور

ولما تيجي تحلم

ألف حاجة تقولك ممنوع

جربت الإحساس

إنه ليل نهار عندك وسواس

إن قميصك مكرمش

وفيه زرار ملخلخ

والبنطلون مقطوع

جربت تقول لحد بحبك

عشان بس تكسب ثواب

جربت تاكل من غير نفس

حتي لو كان كباب

وأنت ميت م الجوع

عارف

حلوة أوي ضحكتك

لكنها بتكشفك

وتقول إنك موجوع

الطريق الدائري

جميل منظر النيل..

من ع الدائري..

والنسمة اللي بتقدر تفوت..

سرقة كده من وسط البيوت..

بس يا ريت بقي..

حد يلحق الشجرة الكبيرة..

قبل ما تدبل وتقع وتموت..

أسند علي سور الكوبري الحديد..

وأحلم وأسرح بعيد..

يصحيني صوت عربيات شايلة كراتين..

أغني هلت بشاير الدعم..

يا حلاوة بطاقة التموين..

بس من إمتي السكر والسمن..

بيمشوا ف حراسة الأمن..

وتحت عيون المخبرين..

قلت يا واد

اقطع الشك باليقين..

سألت واحد م السواقين..

سكر ده يا حاج..

قاللي ده مر متعبي ف شوية قوانين..

قلت خير برضه..

يمكن عشان نحارب الفقر والجهل..

ويرجع تاني يطلع الفرح سهل..

م القلب الحزين..

أم يمكن عشان الاحتكار..

وحدوتة الأسعار..

والتجار الطماعين..

أو يمكن عشان الصحة والتعليم..

والطفل اليتيم..

وحقوق المعاق قبل السليم..

أخيراً بقينا بني آدمين..

لكن لما سمعت صوت بيقول..

إنت ياض يا اللي هناك..

يا زفت الطين..

عرفت إن ده كله عشان نخاف..

ونخاف ونخاف..

أكتر ما إحنا خايفين..

أول يمين

ساعات أحس إني أخرس..

بتكلم مع حد..

مش فاهم لغة الإشارة..

أقوله قلبي تعبان..

يا عم بلاش دخان..

يعزم علي بسيجارة..

أقوله ما تعرفش مصر فين..

يقولي فيه فطاطري كويس..

أول يمين بعد الإشارة..

أقوله أنا فرحان أوي..

يقولي بس لو قربت شوية..

ده لسه القطر طالع..

يا خسارة..

تصدق..

سنين بدور علي صاحبي..

وهو ساكن جنبي..

ف الشقة اللي قصادي..

ف نفس الدور..

ف نفس العمارة..

ايه الحلاوة دي

معلش اسمح لي..

لو هانتكلم عن الحلاوة..

أنا تقاطيعي مجرمة..

صحيح وداني كبيرة..

لكن مناخيري منمنمة..

وكل ما أطلع سلمة..

يقولولي شد حيلك..

لسه بدري ع السطوح..

عيوني جريئة..

جريئة..

لكن في الحقيقة..

لا بتعرف تداري..

ولا بتقدر تبوح..

شعري صحيح مش ناعم..

لكن لايق علي راسي..

ولما يصدق إحساسي..

معرفش فين من روحي أروح..

بحبك لما بتستعبط..

وتقوللي مالك..

بتبكي ليه..

ومن إيه كده قلبك مجروح..

يا عم روح..

بيض بالبسطرمة

حبيتها أيام ما كان..

شارع القصر العيني اتجاهين..

كان أياميها ممكن جدًا..

نتعشي بيض بالبسطرمة..

ونشرب شاي بنعناع ف الحسين..

كان لسه رمسيس ف الميدان..

والدنيا أمان ولذيذة..

وكان فيه أهرامات ف الجيزة..

اللي بعد كده اسم الله عليك..

اتبني مطرحها سيرك أبوعزيزة..

ماكنش لسه مترو الأنفاق..

وكنا بنرفض..

أي معني للفراق..

وكان فيه حب من نظرة عين..

تصدق بقي..

كانت البيوت فيها بركة..

رغم المساحات الضيقة..

وكان فيه شوية حاجات جميلة..

ما تعرفش راحت فين..

تانية إعدادي

بقيت عامل زي الترس ..

اللي بيلف ع الفاضي ..

وآخر الليل لما آجي أنام ..

كل طموحي ..

تزورني ف المنام ..

البت اللي كنت بحبها ..

وأنا ف تانية إعدادي ..

مابقتش عارف ..

آخد بالي من صحتي ..

ولا من جيبي ..

ولا من ولادي ..

بس ساعات بحس ..

إني مكبر الموضوع ..

و إن كل ده عادي ..

لما اكتشفت أخيرًا ..

إن ف العتمة ..

عزبة خيرالله.. ما تفرقش ..

عن مصر الجديدة ..

والزمالك ..

والمعادي ..

تحت الشجرة

إنت يا عم..

يا أخ..

يا اللي هناك ف الصورة..

ماينفعش تسلم قفاك لحد..

وبعدين تطلب منه فاتورة..

خليك منطقي وحنين..

أنا مثلا..

من وأنا آد كده..

بحلق تحت الشجرة..

عند عم زكريا المزين..

راجل مذاكر دماغي كويس..

وأنا أصل دماغي..

مفتوحة م الناحيتين زي الماسورة..

حاسب بس من الكرسي..

أحسن رجليه مكسورة..

سلامتك يا راجل يا طيب.

تقريباً

ولسه هاتشوف وتتفرج..

يا ابن آدم..

طول ما انت عايش..

مش عارف عندي إحساس..

إن مصر حد شّمْمها حاجة ف المولد..

وسرق منها الغوايش..

واداها صرة مربوطة..

لما فاقت وفتحتها..

لاقتنا..

بجد بجد..

يا حلاوتنا..

نُصنا بيدّور

علي علاج للحموضة..

والنُص التاني..

شوية حاجات..

مش موجودة..

عموما أنا عملت محضر ف القسم..

تاخد رقمه..

حبيبتي .. زي القرش الأبيض

حبيبتي

زي القرش الأبيض

في اليوم الطين

زي آخر رغيف عيش

وآخر إسطوانة أوكسجين

وحبيبتي

حبة فرح

من زمان باقين

وحبيبتي

رغم عيونها الطيبين

مش عبيطة

لأ .. دي عارفة

ومذاكرة الخريطة

من فوق لتحت

وم الشمال لليمين

وحبيبتي

ما أتلقيتش جنب جامع

يعني معاها شهادة ميلاد

معروف أبوها

وأمها مين

وحبيبتي

عقبال السامعين

موعداني .. بكره

تلاته العصر

في مظاهرة بتحلم لمصر

وناسها المظلومين

رجل الترابيزة

يا عم قول كلام منطقى

تخبط صباع رجلك ..

ف رجل الترابيزة

وتبكى وتشتكى ..

وتحط مراهم

يفش الورم ..

ويروح شوية الألم

وترجع تتخبط

وترجع تبكى تانى وتشتكى ..

ياعم شوف قلبك ولا ده مش بتاعك

يا عم شوفلك حل

يا تبيع الترابيزة ..

يا تقطع صباعك ..

زمارة الخطر

فاكر ..

زمارة الخطر ..
وطفي النور ..
وأكياس الرمل ..
وقدام كل بيت ساتر ..
فاكر ..
أيام السهر ..
والامتحانات ..
وكوباية شاي من إيد أمك ..
وانت بتذاكر ..
كنت بتفرح لما بتنجح ..
أو حد يقول عليك شاطر ..
فاكر الأمان ..
ننام وفاتحين البيبان ..
دلوقتي ف كل شارع لجنة ..
وف كل بيت عساكر ..
وعشش عشوائيات ..
زي سوبر لوكس فاخر ..
مابنشوفش حاجة ..
وبرضة بنقطع تذاكر ..
معقول عشان تعيش ..
لازم تتاطي وتقضيها ..
طيب وحاضر ..
مين اللي قال ..
البحر غادر ..
مين اللي قال ..
إنك خلاص تعبان ..
ومش قادر ..
ومين العبقري ..
اللي سماك

شحات وعريان وصابر ..
هو أحنا ..
توهنا من بعض ..
هو أحنا ليه ..
ماشيين وباصين في الأرض ..
هو احنا لسة بنحلم ..
وبنحاول ..
وبنعافر ..
سؤال لا كان عالبال ولا ع الخاطر ..
أسأل عليك ..

يقولوا نايم ..
وتسأل علية ..
يقولولك سافر ..
واخد بالك ..
دلوقتي ف كل ثانية ..
بنسمع الزمارة ..
وبدال الغارة ألف غارة ..
لكن لا بيصحى شارع ..
ولا حارة ..
وكل واحد فينا محتاج ..
مليون أمارة ..
عشان يحس بالخطر ..
يا ساتر .....

صفارة الحكم

دي مصر

اللي كانت ف الأصل وردة

وأنا الطفل العجوز

ابن امبارح والنهارده

أنا المواطن آخر دلع

اللي من كتر ما شرب وبلع

مابقاش عارف يفرق

بين السخنة والباردة

اداني القانون

حق الكلام والبكا

والتمثيل المشرف

جوه المعارضة

من حقي ألعب وأجري

وأشوط ع الجون

لكن دايماً

تهزمني صفارة الحكم

وتلعب ضدي الأرض

وتقف قصادي العارضة

طبق اليوم

ربع كوباية مية م الحنفية..

ده لو تيسر..

نص كيلو بصل..

ومش شرط يتقشر..

وسنة ملح وفلفل أسمر..

ولو مفيش أسمر..

أي لون يعجبك..

يا عم إكتب ورايا..

إحنا من أولها هانكشر..

شعار البرنامج إيه..

الطبيخ نفس..

مش أكتر..

وتشهد علينا الحلل والبوابير..

إننا طبخنا لحم الكلاب..

والحمير..

لا حد مات..

ولا حد قال آي..

ولا حد وقع وإتكسر..

والجدع بقي اللي يعرف ليه..

أو يقدر يفسر..

معادنا الأسبوع الجاي..

مع حلقة جديدة م البرنامج..

لو كان لنا عمر..

وفينا روح..

نضحك..

ونبكي..

ونهزر..

طبق اليوم 2

الطاجن ده زمان..

كان بيتعمل باللحمة الضاني..

والنهارده يا جدعان..

بقي فيه فكر تاني..

أولاً الطاجن ملوش لزوم..

ومش محتاجين لحوم..

كل الحكاية..

اكتب ورايا..

ربع لمونة..

وفصين توم..

وشعار البرنامج..

الجوع صحة..

وعلي الله تصحي..

يا وطن م النوم..

أي استفسار..

حد عايز يتخانق..

يتنفس..

يتكلم..

يبرطم..

أنا علي قهوة سعد رزة..

بجوار حسن كاوتش..

أمام مستشفي المقطم..

أشوفكم الحلقة الجاية..

طوابير وفواتير

طوابير وفواتير..

وحاجات تانية كتير..

ده المشهد..

وده المسرح..

ودول بقي الجماهير..

المهم..

كل يوم وأنا راجع م الشغل..

أعدي ع الست العجوزة

بتاعة الجرجير..

أميل آخد حزمتين..

لعل وعسي..

أعرف أنا مين وفين..

وربنا يكرمني ويتحسن الأداء..

ويتظبط التفكير..

الحقيقة البعد الإنساني ف الموضوع..

كبير كبير..

بس مكسوف أقول للست العجوزة..

فين الدفاتر..

ولا انت رأيك إيه يا معلم..

بقولك إيه..

هو الربيع ما بيعديش علي بلدنا..

معقول السنة كلها أمشير..

سلامتك يا طيب..

عصير فراولة

يا عم أبوس إيدك..

فيه أمل..

ولا حتي احتمالات ضعيفة..

أنا مش بقولك..

ترجع البيضة تاني بتعريفة..

ولا الانتخابات الجاية..

تبقي مية المية نضيفة..

ولا أتقابل أنا والوزير..

ف نفس الطابور..

بدون حرس وأمن وتشريفة..

ولا لما أدخل القسم..

يقولولي ف خدمتك يا مواطن..

ويجيبولي عصير فراولة..

مع ابتسامة لطيفة..

عارف..

هموت وأعرف مين..

بيسرق مني الغطا..

وأنا نايم بالليل..

بجد حركة مش ظريفة..

بس بيني وبينك..

دي غلطتي..

حد يسيب الشباك مفتوح..

ف عز الشتا..

وينام كده بهدوم خفيفة..

حصل خير..

على باب السفارة

على باب سفارة كندا

لمحت ابليس و ف ايده استماره

بقوله على فين

قاللي بص

يا هجرة .. يا اعارة

يا عم زهقت .. كفرت

الاقيش معاك سيجارة

انا انتهيت خلاص

لا نافع وسواس ولا خناس

ولا ليا عيش وسط الناس

دي عالم مجرمين

عندكوا فائض ف الفساد

في كل البلاد

ومش محتاجين شياطين

مليش عيش ف البلد دي

بقالي سنين عاطل

و انتوا بتعرفوا

تقلبوا الحق باطل

و تسلكوا القاتل

وتمشوا ف جنازة المقتول

ومفيش مشاكل

يا عم ده انا بقيت أوسوس بالمقلوب

وأقول للحرامي كفايه بقى توب

انت هاتعمل كل الذنوب لوحدك

و أنا ابليس

أشتغل واعظ

ولا كمساري ف اتوبيس

يا عم ده انا زمان

كنت استنى حد ينسى

يسمي

وهو بياكل لقمته

دلوقتي كل اكلكم ملوث

وبصراحة الواحد خايف على صحته

ده مفيش ضمير اساسا

عشان اموته

وكل واحد بمزاجه

خربانة ذمته

يا عم ده كل حاجه اتسرقت

وكده الاجيال الجديدة

م الحرامية اتظلمت

يا راجل ده من كتر ما لطشت معايا

خرجت ف مظاهرة

مع الناس اللي بتقول كفاية

و برضه مفيش فايدة

على باب المطار

علي باب المطار ..

لمحت إبليس وف عيونه شرار ..

بقوله مالك ..

قاللي بفكر ف الانتحار ..

بتتكلم بجد ..

قاللي ودي فيها هزار ..

قلتله وإيه اللي جابك ..

قاللي هو أنا كنت عايز ..

بس تقريبا ..

جهاز الوسوسة عندي بايظ ..

محتاج دروس تقوية ف الفساد ..

متعرفش مدرس كويس وحياة أبوك ..

أنا ورايا بيت ومصاريف وولاد ..

تصور بقولهم هناك زوروا الانتخابات ..

وهيصوا وبيعوا كل الحاجات ..

قالولي دي بلدنا ..

إنت أهبل ياض ..

دول حافظين نشيد بلادي بلادي ..

أكتر منكم ..

يخرب بيتكم ..

مابقيتش نافع شيطان ..

يا راجل ده أنا بفكر أتوب ..

وأعمل تواشيح ف رمضان ..

حرام عليكم ..

عيرة

الشعر عيرة والكحل عيرة

والورد فوق الخد

ولحد الضفيرة عيرة

الصبر عيرة والضحك عيرة

والفرح والأحزان كمان وحاجات كتيرة

حتى الحنان جوه البيوت

حتى الكلام

حتي السكوت

حتى الهتاف جوه المسيرة

برضه عيرة

حيرني حيرة

بقينا ليه حبة حاجات

قمصان بدل على بالونات

ما بقيتش شايف إيه اللي جاي

وإيه اللي فات

ما بقيتش افرق

ده أزرق ده ولا أحمر رمادي

ودي كارثة ولا ده وضع عادي

وده طفل ولا راجل عجوز

وده إيه ده راخر

جايز يجوز

نعسان ده ولا ساكت وساير

بردان ده ولا ده دور وداير

وده إحنا ولا الكل حاير

قراقيش

حكومة رقيقة أوي وشيك..

بتقفل كل البيبان والشبابيك..

عشان بتخاف علينا م البرد..

لأ إحساس مرهف بجد..

الأسمنت والحديد يغلي..

تقوم تبيع الأرض..

هو ده الفكر الجديد..

اللي بيبني المجد...

وشوف الحنان والطيبة والإنسانية..

سعر تصدير الغاز..

أقل من سعر الفول والطعمية..

ده علي اعتبار إن الناس لبعضيها..

والدنيا منفاتة..

وإحنا والحمد لله..

مش محتاجين أنابيب..

والمشتري مش غريب..

جربت الشاي بالحليب

ساعة الصبحية..

قراقيش بقي وسقي يا معلم

وانسي القضية..

ده تقريباً ماحدش شايف حد

قول كمان

معاك ومعايا

مش فارقة

لا الشعر أصفر

ولا حتي العيون زرقة

وبنهاتي وبنطاطي

ولا لسانه عارف ينطق خواجاتي

وإحباطك .. وإحباطي

مدام جينا وعلي كتفنا تلال الهم والأحزان

نقول كمان

يا طالع الشجرة

هاتلي معاك إنسان

هاتلي معاك إسم

تاريخ ميلاد

عنوان

هاتلي معاك وطن حر

ومواطن مش جبان

وبعدين نبقي ندور

ع اللي ضايع

من زمان

حالة وفـــــــاة

البيت كبير..

لكنه فاضي..

وبارد أوي من جواه..

والشكل بني آدمين..

بس مين روحه معاه..

وعلي أد كبر الألم..

علي أد ما بننساه..

ياه..

مش ممكن يكون..

هو ده شكل الحياة..

ولا دي معاناة..

ولا إحباط..

خايف يكون فيه شيء..

جوانا مات..

ودي حالة وفاة..

للأسف

لما الحمول تزيد

ونرجع ونسأل من جديد

ومانلقيش غير الأسف

ناديت علي القمر أنا

عطشان ونس

بص بخجل ليه واتكسف

ومشيت كتير

وداريت الحزن ف ألف بير

بس اتكشف

مشيت أمل

ومشيت فرح

ومشيت زهق

ومشيت كده من غير هدف

وقلت من قلبي كلام

معرفش ليه كله اتحذف

كان نفسي أغني للسلام

لكن حبيبتي

للأسف

» موسوعة على سلامة :: شاعر العامية
» حتى يكون عندنا ثروة شعرية
» موسوعة شاملة عن جهاز المخابرات العام المصرية
» أكبر موسوعة إسلامية في تاريخ المنتديات لكل مسلم ومسلمة
» أكبر موسوعة تجميعية لمواد تعليمية على مستوى المنتديات العربية