علي سلامة .. شاعر العامية المصرية .. أكبر موسوعة شعرية

تذكير بمساهمة فاتح الموضوع :

علي سلامة

وعلي سلامة لمن لا يعرفه شاعر جامد قوي
قصائده بالعامية

ويارب تعجبكم زي ما أبهرتني أشعاره ببساطتها
وخفة دمها ولعبها على الوتر الحساس

خايف أصحى مالاقيش مصر

ساعات بقلق بالليل

يعني بالليل شوية كده

قبل الفجر

حسب الظروف كده

بعد العصر

خايف يوم أصحي

وأفتح الشباك

مالاقيش مصر

ألاقيها لمت هدومها ومشيت

لمت هدومها

علي نيلها

علي هرمها

وطفشت

وحلفت ميت يمين ماهي قاعدلنا

ماهي زهقت

تعبت

إتخنقت

أصلنا زودناها

أكننا استعمرناها

ورثناها

مصر البنوتة الحلوة

اللي زي القمر

بقت عجوزة وشايبة

وبان عليها الكبر

خايف يوم أصحي

وأفتح الشباك

مالاقيش مصر

كارت حرية

بُص يَا عَم ..

قبل الماتش ما يبتدي ..

من حقك تختار ..

ملك ولا كتابة ..

ولو ف نص الليل ..

حد جرك من قفاك ..

قول له بقلب جامد ..

فين إذن النيابة ..

وطالما كده كده مسروق ..

يبقى ع الأقل تعرف ..

مين هما أفراد العصابة ..

إنت بس ..

إشحن حرية ..

كارت من أبو عشرة ..

أو عشرين ..

أو خمسين أو مية ..

تلاقي قلبك بقى زي الحديد ..

وقادر تفوت من أي بوابة ..

وتغني للصبح ..

وتقول ع الربابة ..

بس خلي بالك ..

لو رصيدك خلص ..

أو أنتهت الصلاحية ..

هاتتغير العيشة ..

وهاتعرف إن الدنيا كدابة ..

بنت كدابة ..

وهاتفتكر كل اللي راح ..

وتقول الله يرحمك يا أمه ..

ويرحمك بقى يابا ..

لا هتلاقي عيش وملح ..

ولا أصحاب ..

ولا أهل ..

ولا قانون ..

ولا نقابة ..

ساعتها بس هتعرف تفرق ..

بين العصافير والديابة ..

وإن الكلام الحلو ..

والغنا الجميل ..

كان مجرد سحابة ..

وإنك لسة الواد ..

ابن الناس الغلابة ..

وإن لسة فيه خوف ..

ورصاص ..

وعسكر ..

ودبابة ..

على فكرة مش دايماً

الأسد الجدع النبيل ..

بيبقى هو ملك الغابة ..

يا حاج .....

هو أنا ممكن ..

يبقى عندي خط حرية ..

على مهلك ..

وفكر كويس في السؤال ..

قبل ما تقول الإجابة ...

كارت حرية

بمنتهي البراءة

سألتني بنتي نور

ف أربع خمس أمور

مش ف كتاب القراءة ....

قالتلي .. بابا بابا ..

مش إنت .. يا بابا ..

بتكتب أغاني ..

وتقول أشعار ..

أنا سمعت ..

الشيخ يا بابا ...

بيقول إنك يا بابا …

ها تروح النار ...

زي الوحشين يا بابا ...

الحراميين الكفار ....

قوللي يا بابا ....

يعني إيه إستعمار ....

يعني إيه نيل ...

يعني إيه هرم ..

ومين اللي حط ...

النسر فوق العلم ...

يعني إيه يا بابا ...

إستفتاء ….

و يعني إيه إنتخاب ...

ويعني إيه حر ...

ويعني إيه نصاب….

يعني إيه إختلاس ..

ويعني إيه هجاص ..

ويعني إيه خصخصة ..

يعني إيه يا بابا ....
دستور ….

يعني إيه معارضة ..

ويعني إيه مظاهرة ..

وليه النهاردة ...

خدنا أجازة ...

م المدرسة

قوللي يا بابا ....

يعني إيه قهر ..

وفين …

خط الفقر ...

ويعني إيه حظ ..

ويعني إيه زهر ...

يعني إيه يا بابا ...

حرية …..

يعني إيه إنسان ..

ويعني إيه سرطان ...

يعني إيه يا بابا ...

خربوها ….

ومين دول يا بابا ..

ولاد القطقوطة ...

ومين دي ...

سمارة يا بابا ....

وإزاي يا بابا ...

ضاعت من قلبك ...

يا بابا

إنت معايا ....

فيه يا بابا ناس ...

بتقول كفايه ...

وفيه كمان عساكر ...

ماسكين عصايا ...

وبنات متعورين ...

وتانين …

ماشين بيضحكوا ...

هما دول إسرائليين ..

يا بابا

ويعني إيه ...

ويعني إيه ...

قولتلها ….

نور …..

ممكن أسألك سؤال

قالتلي ….

إتفضل يا بابا ...

قلتلها ….

هيه قناة

Space toon

رقم كام …..

وخدتها

عشان تنام

كفاح الفخفخينا

بيني وبينك ..

مفيش أحسن م المرتبة القطن ..

تعبت أوي م السفنج ..

يظهر إننا محتاجين جراحة ..

بس من غير بنج ..

يمكن الألم يداوينا ..

علي فكرة ..

إحنا تقريبا ماحدش داري بينا ..

يعني كل اللي بنعمله ..

بناخد وندي بس مع بعضينا ..

وأهو ناس تكافح بالصبر ..

وناس تكافح بالفخفخينا ..

والفخفخينا ..

هي اسم الدلع للكحول ..

إزاي نبقي عايشين ف العتمة ..

وتقولي صباح القشطة ..

صباح الفل ..

مش تفتح بقى يا اخينا..

كيس بلاستيك

من كتر ما الحزن رطرط..

مبقاش خلاص يتحس..

فضلت الأحلام..

تتقص تتقص تتقص..

لحد ما بقت ف النهاية..

رغيف..

وكيس بلاستيك.

وبس..

عارف..

بصحي قلبي..

عشان يحب..

قام بقرف..

واتلفتلي وبص..

ورجع نام تاني..

لب وسوداني

بقول لها ..

ما تيجي نهزر ..

نجري ونلعب ..

ونكسر كل الحاجات ..

ونجيب م اللي فات ..

يومين حلوين ....

قالتلي والنبي إنت فايق ورايق ..

قولتلها ...

طب وليه نتضايق ..

إحنا لسه صغيرين ..

وأكبر عيالنا ..

يا دوب تسع سنين ..

يعني لو بنحكم مصر ..

تبقي يا دوب لفة ونص ..

مش عشرين ..

- وطي صوتك البت بتذاكر ..

والواد مصدقت إنه نام ...

إنما إيه اللي صحي ف قلبك ..

من تاني الغرام ..

قولتلها جوايا كلمتين غزل ..

قالتلي والنبي إنت عسل ..

بس الظروف ..

- مالها الظروف ..

فاكرة لما كنتي ..

بتحوشي م المصروف ..

جبتيلي ورد ف عيد ميلادي ..

- وجبتلك بلوفر صوف ..

- وجبتيلي بلوفر صوف ..

- فاكر لما بوستني ..

وإحنا لسه مخطوبين وأبويا لاحظ ..

يالهوي كنت هموت م الكسوف

- فاكرة أول مرة قلت لك بحبك ..

وشك إحمر ..

- إنت اللي وشك كان مخطوف ..

- مش إنتي كنتي بترسمي زمان ..

- وإنت كمان كنت بتكتب شعر ..

- هو احنا بطلنا نحس ..

- إحنا بطلنا نشوف ...

وطلعنا اللب والسوداني ..

وفتحنا التليفزيون ..

وسكتنا تاني ..

ولا زال السبب ..

غير معروف ..

غير معروف

ربنا يسهل

بقول لها..

بحبك بحبك بحبك..

قالتلي..

كل ده كذب..

قولتلها صدقيني..

لا أنا في المعارضة..

ولا ف الحزب..

قالتلي..

بس السكوت خيبة..

ولولا العيبة..

كنت أقول..

وأقول كمان..

الله يرحمك بقي يابا..

ويا ميت خسارة ع الجدعان..

قولتلها وطي صوتك..

بلاش جنان..

كل الحكاية..

أنا حاسس بشوية سخونة..

وبردان..

اديني بس إنتي شوية حنان..

وربنا يسهل..

مرايا

قلت أبص ف المرايا ..

يمكن أكون إحلويت ..

فضلت داير أبص ..

مخلتش ولا مرايا ف البيت ..

في الحمام ف الأودة ف دولاب ..

أو متعلقة ع الحيط ..

شوفت ..

سكت شويه ..

وبعدين إتخضيت ..

معقول أنا قضيت العمر ده كله ..

وزي ما روحت زي ما جيت ..

معقول أنا عمري مافكرت

ولا إتغيرت ولا حبيت ..

وإزاي ساكت علي روحي ده كله ..

وليه إستنيت ... !

يا ريتني ما كان عندي مرايا ..

وياريتني ما بصيت ..

مش بتاع كده

لما أنا مش بتاع كده..

ولا بتاع كده ولا كده..

أمال أنا بقي..

أبقي بتاع إيه..

لما أنا مش شيخ..

ولا فلتان..

لما أنا مش فايق..

ولا سكران..

وساعات يتهيألي..

إن أنا فرحان..

أتنطط وأصرخ..

وأقول هيه..

لما أنا مش أفندي..

ولا فلاح..

ولا شجرة جميز..

ولا تفاح..

لا أنا بتألم ولا مرتاح..

لا عندي شيء استناه..

ولا عندي شيء أبكي عليه..

ولما أنا شايف الحال بقي كده..

طب ساكت ليه..

يا عم أنا مش بتاع كده..

فيه إيه!

مش دي بطاقتي

مش دى .. بطاقتى

وده .. رقمى القومى

ودى .. الحقيقة ..

وده الخيال ....

ومش دي الخريطة ..

ودي المدينة ..

وده المحور ..

وده المترو ..

وكده يمين .. وكده شمال ..

مش ده ظابط .. وده عسكرى ..

وده طبيب .. وده كمسرى ..

وده منجد .. وده بقال ..

مش ده جامع .. ودى مدرسة

وده بيت دعارة ..

وده سمسار ..

وده شيال .....

مش ده فستان .. ودى جلابيه

وده شورت .. وده مفيش ..

وده شال ....

مش ده اتوبيس .. ودى عجلة

ودول حمير ....

ودولا جمال .....

مش ده عمى .. ودى أختى

و دول صحابى ..

وده كمال ....

مش ده شارعنا .. وده بيتنا ..

ودى مراتى ..

ودولا العيال ...

مش ده الوطن .. وده المواطن ...

وده التاريخ .. اللى إتقال ...

أمال ليه .. كل ما اروح فى حته

و أسأل سوأل ....

يقولولي .. جايز ... يمكن .... إحتمال

مصاريف المدرسة

البنت بنتي..

كل يوم تكبر سنين..

حلوين عينيها..

بس ليه..

مش فرحانين..

في السن ده..

وبتقول كلام..

ليه لما تصحي..

بكون بنام..

حاولت أقرب منها..

لاقتني مش عارف أنا..

أبقي مين..

وفتحت قلبي يقولها..

ملقيتش غير..

مصاريف المدرسة..

وفلوس المدرسين..

مصر والكاميرون

بقول لهم

مين اللي بيعيط بحرقة دة؟

قالوا لي

مواطن اتصور وهو بينضرب

قلت لهم

ومين الأمور اللي بيضحك دة؟

قالوا لي

دة واحد عمل شوية كوارث وهرب

قلت لهم

والدنيا عتمة هناك كدة ليه؟

قالوا لي

دي حتة جديدة بتتخرب

قلت لهم

ومين الحاوي اللي بيتكلم دة؟

قالوا لي دة الوضع بيتقلب

وايه الهيصة اللي في الساحل الشمالي دي؟

قالوا لي

دي البقرة بتتحلب

قلت لهم وانتوا قلقانين كدة ليه؟

قالوا لي اصل بنلاعب الكاميرون

وخايفين نتغلب

مطلوب عروسة

مطلوب عروسة طيبة

ومتعلمة ومؤدبة

ومؤمنة بالقضاء والقدر

سنها من سني

أصغر أو أكبر مني

مش هنختلف

المهم مبتعرفش تطبخ

عشان مش هقدر أجيب

أي حاجة تنفع للطبيخ

وتكون بتحب القراءة

وتهوى الرحلات

وتعشق السفر

مش عضو في أي حزب

وطبعاً عارفة ان الكدب حرام

بتحب الكورة ..

مهمومة بالدوري العام ..

وملفوفة القوام ..

حلوة وزي القمر ..

شعرها ناعم حرير ..

ملهاش أي مصلحة

فـــ شارع القصر العيني ..

أو مجمع التحرير ..

وفاهمة كويس ميدان الجيزة ..

مش متابعة جلسات مجلس الشعب

ولا بتسمع البيان الختامي

لأي مؤتمر ..

وتكون من عيلة بتشتري راجل

لا عايزة شبكة ولا مهر ..

وأنا بقى .....

خبرة في المرمطة ..

وجميع أشكال القهر ..

مواطن من إنتاج مناهج

وزارة التربية والتعليم ..

ثانوية عامة ...

النظام القديم ..

أيام الأرنب الغضبان ..

والخس والجزر ..

وزي النسمة والله ..

يعني تعتبرني من دلوقتي

مش موجود ..

لا حس ولا خبر ..

بس مخي نضيف ..

وعاقل ورزين ..

وعندي شوية نظر ..

ورغم إني ياما أتزحلقت ..

لكن لسة بفرح بالمطر ..

على فكرة .......

أنا حاجز شقة بحري

أربعين متر ..

أخر طريق الواحات ..

بس لسة محطوش الأساس ..

عشان تقريباً ..

مش لاقيين الحجر ....

مفيش حد

مَحَدَّشْ فيِْنا قَامْ الصُبْحْ يتمطَّعْ...

وقالْ نِفسىِ أطْلعْ القَمَر...

ولا حَدْ فيِنْاَ بيْغيِرْ...

منْ العَصَافيرْ الحُرةَّ ع الشَّجَرْ...

ولا حَدْ فِينَاَ إنْدَهَشْ

م السُؤالْ والخَبرْ...

عايِشينْ بَسْ كدهْ...

عَاَلة ع البَشَرْ...

هىَّ الَمراكِبْ للْهُرُوبْ

ولاَّ السَّفَرْ...

لو عِشْنا نَسْتَنى المَطَرْ...

هَنْمُوتْ أَكيْدْ عَطشانينْ...

هوَ إحْنا مِينْ...

مفيش كوكو

آخر كلام يا عم..

طعام..

يعني مم..

يعني علي سبيل المثال..

سندويتشات..

وأرجوكو..

ماحدش يجيب سيرة الكوكو..

قدام العيال..

وكوكو للي مش عارف..

يعني دجاج..

يعني شوربة..

يعني ظفر..

معقول ده محتاج..

عقد عمل..

وغربة..

وسفر..

عارف..

لسه شوارعنا بتخاف من المطر..

ومطر للي مش عارف..

يعني خير..

إزاي ف بلدنا الخير..

أصبح خطر..

من بعيد

بَقيِتْ أخَاف

من طَبيِب الأسْناَن

ومِن كل الطيور

حتَى الكَرَوان

وم الشَّاى اللى ف الدكان

وم السُكروم الحَادق وم الحراق

وم الحَلاق

منْ العسكرى وم الأُتوبيسْ

ومِن إبليس

من الشَّارع والرَّصيفْ والرََّغيفْ

وأخويا الضعيف

وقَطر السَكَة الحَديدْ

مِش هو القمح برضه

زَمَان كان لُه عيد

وكَان لهُ غنوةْ حَلْوة

وف كِتاَب الأناشيد

بَحبِكْ يا بَلَدْنا

بَس من بِعيِد لبِعيِد

ميدان العتبة

لما أنا والسرير بنتخاصم..

لا يمكن أرتاح ع الكنبة..

ولا ع الكرسي ولا ع الأرض..

ولما يومي بيبتدي..

من ميدان العتبة..

بعرف أد إيه يا حبيبتي..

إحنا لسه بعاد عن بعض..

ولما العلاج يبقي كله مسكنات..

بتتساوي كل الأوجاع..

الصداع..

زي المرارة..

وسرطان..

زي نزلة البرد..

المهم..

يوم التلات اللي فات..

كان يوم حافل..

طول النهار بلف..

علي كالون ست تكات..

روحي ضايعة..

وقلبي قافل..

قالتلي بحبك..

قلتلها مش سامع..

قالتلي وحشتني..

قلتلها مش شايف..

قالتلي إنت سافل..

سكت ومشيت..

زي ما بتمشي كل المسائل..

تسرقني من تاني..

نفس الحاجات..

وكل ما حس بالألم..

أقول لقلبي تستاهل..

آد إيه يا حبيبتي عيونك..

جميلة أوي وصافية..

لكن ميدان العتبة..

ديما يفكرني..

إني لسه..

في العشق جاهل..

ورد وشمع

جابت ورد وشمع..

وظبطت الإف إم..

وطفت النور..

وقالتلي..

وأنت معايا بتحس بإيه..

قلتلها ولا حاجة..

قامت.. ولعت النور

وراحت غابت حبة..

ورجعت سألتني برقة..

طب لما بغيب عنك..

بتحس بإيه..

قلتلها برضه ولا حاجة..

قالتلي بجد..

قولتلها أمال هزار..

قالتلي..

والنيلة الأغاني اللي بتكتبها

والزفت الأشعار..

قلتلها بس أمي قالتلي..

اللي بيكدب بيروح النار..

بصتلي من فوق لتحت

بكل احتقار..

وقالتلي

ابقي خللي أمك تنفعك..

وش القفص

علي فكرة

إحنا يادوب بس الشوية

اللي علي وش القفص

بدل وكرافتات

وكام شارع ومدارس لغات

أما القعر

لا دقن ولا شنب

ولا شعر ولا أوصاف

اطلع واتفرج يا معلم ع الأطراف

عندنا قري وشوارع وبيوت

كل دقيقة بتموت

لا ميه ولا نور

ولا حلم ولا رجل ولا لحاف

اتفرج يمكن تتخض

ولو لسه بتحس بجد

أكيد هاتخاف

أشرب

عرفاك .. عرفاك

هاتلف تلف

وفِى الأخر جاى

سمعاك

بتقولِ ضمينى

سامحِينى

لأ يا روح أمك

مَبقَاش

عيان

تعبان

مديون ومفلس

ما أنا مديت إيدى للى يسوى

واللى ما يسواش

لا عندى بن

ولا عندى قطن

ولا عندى شاش

ضحكوا عليك

وقالولك خللى السلاح صاحي

وهما طول الليل والنهار نايمين

وانت طول عمرك

بِتبيع ببِلاش

اشرب

الأهلي وطنطا

يميِن حاضر

شمال حاضر

ماهو السواق جدع شاطر

يسوق دوغرى

وعند نزلة الكوبري

لقينا روحنا مش فاهميِن

مفيش ميه ولا بنزيِن

قلعنا الصبر والفساتين

والدنيا هيصة

والزحمة ورطة

ومعدش ينفع تتصلح الغلطة

وأنا كل خوفي

يفوتني ماتش الأهلي وطنطا

في كاس مصر

الفاتحة ع الأموات

وفضلت أستنى أستنى

لحد ما عدى أخر قطر وفات

حزنت

قعدت أعيط أعيط

قلت أتمشى أتسلى

أتفرج ع الشوارع والناس والعربيات

زهقت

قلت أرتاح

سنَدت على روحى

إتلخبَطت جُوايا كل الحَاجَات

مدّيت إيدى ف جيوُبُى

لقيت شوية ورق قديم

وصور وكروت تليفونات

قلت أكلم مراتى

افتكرت إنها خدت الدوا

ونامت من تلات ساعات

قلت أكلم أخويا

افتكرت إنه طلع معاش مبكر

وكاره تاريخه

ومركز في التأمينات

أكلم أختي

هاتعيد وتقول نفس الحكَايات

أكلم خالي

افتكرت إنه غتت غتاتة

ومعايا أنا بالذات

أكلَم خالتي

قلت يا واد

دى كانت خالتى وخالتك

واتفرقّت الخالات

أكّلم صاحبى صلاح

افتكرت إنة سافر العراقُ

وفى إحتمال يكون مات

قُلت أنا أصطاد مُزة

واعمل دماغ

بسّ معرَفش حد بتاع مُخدَّرات

قُلت أمشى ف مظَاهرة

لقيت العساكر راجعين

مشَطبين علَى كل الُمظاهرات

قُلت اتصل بالسّادة المسئُولين

هايتّهمونى بإزعاج السُّلطات

قُلت ياربّ

هُو أنا إيه

وليه

ونسيت إيه

وقطر إيه اللّى فات

اَلَلًه يرحَمَك بقَى يَابَا

والفاتحة عَلَى كُل الأموات

الكيلو تسعين

يكون في علمك

أنا متواضع جداً

ومش طالب كتير

يعنى شقَة صغيِرة

ف الكيلو تسعين

ما هى الحياة مشاوير

مِشِ شرط بَقى بتطل

عَلى جَناين وهوا وعَصافير

وبنت حَلال ومِش شَرط

زَى اللى ف الكليب الأخيِر

وحتة مدرسة صغيرة

أهَى العيال تفك الخَط

ومِش شَرْط لُغات وحرَكات

وجَغرافيا وتعبيِر

وأدْخل القسم

أطلع زي ما دخلت

محترم وكبير

زي الجن

ساعات كده بعيد عنك

يجيلي كرشة نفس

وألم ف المعدة

ودربكة ومغص

وساعات أحس

إني شوية أمراض

محطوطة ف قفص

بس ماشي الحال

وساعات من غير سبب

أجري ع الحمام

ويجيلي برد وزكام

وساعات أسهر

وساعات م العصر أنام

وساعات ألاقي

صعوبة ف الكلام

وده تقريباً طول السنة

وساعات أحس

إني مش أنا

بس زي الجن

فاكر اسمي واسم مراتي

وأسامي العيال

وعلي طول بقي

جسمي مكسر ومهدود

صحيح باكل وأشرب

واضحك والعب

بس مش موجود

ومعرفش ليه عيني بترف

عمال علي بطال

هو أنا عندي إيه يا دكتور

غسيل قلوب

هي القلوب بتتغسل

زي الهدوم

وإزاي بتغرق ف الغرام

وإزاي تعوم

وإزاي بتبقي طوق نجاه

وبتبقي شط

وإزاي بتنخل الكلام

وإزاي بتعرف أي خط

وإزاي بترقص م الفرح

وإزاي بتقتلها الهموم

وإزاي بتبكي وتبتسم

واشمعنا يعني بتترسم

فوق الشجر

ساعات بتدبل ف الربيع

وساعات بتعشق المطر

ليه لما بتبطل غونا

بنحس فعلا

بالخطر

زغزغني

زغزغنى

يمكن أضَحَك

يمكن أفرح

يمْكَن أطلَع

مِ الَلى أنا فيِه

زغزغنىِ

يمكِن أحلَم

يمكَن أقَول اِللى مخَبيه

مِش جَايز

لسه الدُنيا جَميلَة بِجَد

ولسه النَاس

فِى الصيِف والبَرد

مِش يِمكن

يطلَع فيا العيِب مِش فِيه

زَغْزَغْنِىِ

» موسوعة على سلامة :: شاعر العامية
» حتى يكون عندنا ثروة شعرية
» موسوعة شاملة عن جهاز المخابرات العام المصرية
» أكبر موسوعة إسلامية في تاريخ المنتديات لكل مسلم ومسلمة
» أكبر موسوعة تجميعية لمواد تعليمية على مستوى المنتديات العربية