هل من المفروض أن يشرح المعيد فى السكشن؟؟!!

فى البداية أحب أهنأ أخوتى وأخواتى فى المنتدى ببداية العام الدراسى الثانى فاللهم اجعله خيرا علينا.

وددت فى هذا الموضوع فتح باب النقاش فى موضوع شائك قد تم التفكير فى طرحه من قبل ولكن تأجل عدة مرات
لظروف عديده ولكن أتى الوقت الذى نعرض فيه الموضوع عى سيادتكم جميعا.
يتلخص موضوعى فى معرفة هل من المفروض أن يشرح الأخ المهندس المعيد فى السكشن أم لا؟؟!!
وما هو الموقف القانونى من ذلك ؟؟ورؤية كل فرد منا فى هذا الموضوع سواء كان يوافق ذلك أم لا؟؟
ويعرض لنا وجهة نظره المقترحه؟؟؟

وأرجو من كل مشترك معنا فى الحوار ألا يخرج عن نطاق الحوار أو حدود أدب الحوار والنقاش وأرجو
أيضا أن يشاركنا الحوار والحديث أعضاء هيئة التدريس جميعا.

والله الموفق لنا جمعيا.

انا من رأيي ان المعيد المفروض يشرح في السكاشن لان ساعات الواحد ممكن ميفهمش من الدكتور حاجة معينة او مثلاً محضرش المحاضرة لظروف معينة فممكن يعوض ده بشرح المعيد في السكشن ساعات بيكون شرح المعيد أفضل من شرح الدكتور والطلبة بيفهموا منه اكتر من الدكتور ولكن للأسف في بعض المعيدين ومش كلهم لما نطلب منهم انهم يشرحوا لينا بيرفضوا وبيققولوا ان دي مش من مسئولياتهم وانا بتمني ان يكون المعيدين متفاهمين معانا لانهم أقرب سناً لنا من الدكتور

انا شايف ان المعيد لازم يشرح فى السكشن امال هو هيعمل ايه هيقعد يقول مين عنده سؤال وانا اجاوبه مش هيلاقى حد يسأل غير الناس اللى مقطعة المناهج ومذاكرة وبعدين ممكن حد يكون ما ذاكرش المحاضرة لسبب شخصى عنده يضيع عليه السكشن كده وبعدين احنا مستوانا فى الكليه وحش اوى فبلاش بقى الالتزام بالقواعد قوى والمعيد يقولى انا مش هاشرح على الاقل يحس بالانجاز لما يلاقى الطلبة ناجحة وبصراحة ما فيش مادة المعيد بتاعها كان بيشرح فى السكشن ويشرح شرح محترم ومنظم الا وكانت النتيجة فى اخر الترم كويسة جدا بالنسبة لمستوانا وبعدين احنا اسرة مع بعض الطلبة والدكاترة والمعيدين وما فيش رقيب علينا غير ربنا فبلاش بلاش نحبكها على بعض ولو كل مسؤول فى الكلية من دكتور او معيد حس وشعر بالعذاب اللى بيكون فيه الاهل والحزن الشديد اللى بيحصل لو لا قدر الله حد من ابنائهم نزل فى مادة بغض النظر عن سبب النزول ده اكيد هيراجع نفسه بس لو كان عنده تقصير وكل سوة وانتم طيبين وكل ادارة الكلية من دكاترة ومعيدين وطلبة بألف خير ويارب مصر تكسب وتاخد الكاس

انا اتوافق ما البشمهندسة MISS_R في رأيها

فعلا ياريت المعيد يشرح عشان بجد في ناس واغلب الناس لما تحضر المحاضرات مش بتفهم كويس وبيفهوا لما المعيد يشرح واحيانا المعيد بيوصل الفائده للطلاب اسرح من الداكتره وبيفهمو منه .

ثانيا شكرا يا حبار على مواضيعك الجامده والمفيده...

والله لا يحرمنا منك يا باشا

أنا ارى انه من الأفضل أن يشرح فانا كطالب افهم من المعيد أفضل من الدكتور
لأنه فى حالة المعيد تكون الحدود اقل منها فى التعامل مع الدكتور وهناك الكثير من الأسئلة والإستفسارات التى استطيع طرحها على المعيد ولا أطرحها على دكتور المادة
وما نحتاجه بالفعل هو متابعة كل نقطة فى الشرح والتعليق على أى نقطة لم يتم فهمها فى ذات الوقت وهذا ما نستطيعه فى السكاشن اكثر من المحاضرات

الموضوع حلو قووووي

وفعلاً فيه معيدين كتييير
بيشرحواا في السكاشن
بس الأغلبية منهم
بيقولولنا احنا المفرو مانشرحش
انتوا تيجوا محضريين
ومش عارف ايه
وبعدين يشرحوا _
الصراحة المعيد اللى بيقول كدة
انا بستوعب منه بالعافية
بحس انه بيشرح غصبن عنه
كدة
وفيه معيدين مش بيقولوا كدة
ولا بيشرحوا أصلاً
وأكيد طبعاً فيه معيدين أحترمهم جداااا
وكويسين جدا _ بيشرحوا وممكن كمان أفضل من الدكاترة

أنا شايف ان المعيد المفروض يعنى يعوود نفسه ع الشرح عشان لما يبقى دكتوران شاء الله
يعرف يشرح كويييس

بس الغريب اللى بسمعه انا الدكاترة بيتضايقوا لما معيد المادة يشرح بعدهم !!!!!!!!!!!!!!
يا ترى الموضوع دة صح !!@!!!!

السلام عليكم ايها الاخوة الكرام

اريد ان اشارككم في الراي حول شرح المعيد في السكشن ام لا.

بالنسبه للمحاضرات بسبب العدد الكبير داخل المحاضره فيصعب علي بعض الطلاب الاستيعاب الكلي للمحاضره لهذا وجود السكشن مهم جدا جدا فعدم شرح المعيد في السكشن يؤدي الي ضياع الماده العلميه من الطالب وبالتالي الامتحان.

اريد ان اوضح شئ لكل الطلاب يصعب علي المعيد ان يوصل المادة العلميه للطالب والطالب لم يذاكر المحاضرة او يحاول ان يعرف الموضوع اللي هيشرحه المعيد في السكشن.

فارجوا من اخوتي الطلبه ان يحضره المادة قبل السكشن حتي يتم استيعاب الموضوع جيدا

في النهايه لابد ان انوه علي ان قانون تنظيم الجامعت بقرر ما هو عمل المعيد فنص القانون يقول باختصار ان عمل المعيد هو البحث العلمي بالاضافه الي مايكلفه رئيس القسم من اعمال
اي ان الدكتور هو القائم بالتدريس الكلي للمادة سواء المحاضرات او السكاشن

ولكن في كليه الهندسه عدد ساعات السكاشن كبير فلا يستطيع الدكتور ان يقوم بكل هذا لذالك يقوم المعيد بمساعدة الدكتور في هذه السكاشن ولكن الدكتور يرمي بكل السكاشن علي المعيد وهذا يؤثر علي البحث العلمي بالنسبه للمعيد واصبح هذا الامر متعارف عليه ان المعيد عليه كل السكاشنم/ احمد اسماعيل هندسه اسيوط

شكرا لمشاركتك لنا يا بشمهندس ahmedcivil ووجهة نظرك ممتازه.
ولكم وددت أن يشترك معنا معيدى كليتنا ولكن للأسف لم يستجب أحد منهم سواء بالنفى أم بالإيجاب فهل هذا للإنشغال ببداية الدراسه أم عزوفا عن التصريح بالآراء!!!!

الوضع القياسى (ideal) :
السكشن مكمل للمحاضرة و ليس تكرار لما سبق شرحه : تطبيق + تمارين عملية و لا مانع من تلخيص موضوع المحاضرة فى بداية السكشن

الطالب الايجابى -عايز يكون مهندس ناجح - يذاكر المحاضرة و يحضر الشيت او التكليفات -اذا وجدت -
المعاون (مدرس مساعد او معيد ): يلخص موضوع المحاضرة و يشرح المطلوب من التطبيقات و يجيب على اسئلة الطلاب

الوضع الفعلى actual :
1- المعاون يكررشرح مادة علمية على حساب التطبيقات و هذا خطأ
2- المعاون لا يشرح و لا يتكلم على الاطلاق و هذا خطأ
3- المعاون يساعد من بذل مجهودا -قرأ و حضر المحاضرة و لم يستوعب جزئية معينة او لم يحضر لظروف قسرية (ليست النوم و لا متشات الكورة و لا السفر للبلد )-
وهذا المطلوب

نقطتان هاماتن :

1- لا خلاف ان المعيد عليه ان يبذل طاقته فى البحث و اكمال الماجستير و لكن من التجربة و الخبرة لابد له من تعلم كيفية التعامل مع الطلاب -عملى و ليس من خلال دورات اعداد المعلم و ما شابهها - عليه ان يتعلم كيف يلقى درس و كيف يستمع و كيف يجيب و كيف يدير جلسة تعليمية و المشكلة ان جداول عمل المعاونين تكون ذات حمل زائد. و رأيى الا تزيد عن 4 ساعات يوميا -نصف وقت العمل و النصف الاخر يتفرغ للبحث-

2- الحاجز بين الطلاب و المدرسين (الدكاترة ) موجود و يتفاوات من شخص للاخر و من طالب للاخر بسبب عوامل كثيرةو من جهة المدرس فان الاعباء عليه كبيرة فاذا اعطى المبادرة و الحافز للطالب -الاصغاء و التشجيع - فإن الطالب عليه ان يبادر بتقليل مساحة الحاجز عن طريق الاهتمام بالحضور و الاستيعاب الجيد و السؤال المفيد - فيه اسئلة سطحية او غير منطقية او فى مواضيع خارج المحاضرة غير مفيدة اطلاقا -

الملخص : أدى ما عليك تجد الدنيا اكثر انتظاما اما اذا انتظرت ان يشرح الدكتور ثم يشرح المعيد ثم يأتى الامتحان مكررا و محفوظا فلن تكون المهندس(ة) الناجح الذى نتمناه

انا مش فاهمة يعنى الطلبة عايزين الدكتور يشرح والمعيد يشرح وبعدين..........
ويقعد هو يتلقى المعلومات طول الوقت
نسبة استيعاب الطلبة تختلف من واحد للتانى عشان كدة السكشن المفروض الطلبة تكون ذاكرة المحاضرة وعرفت ايه الحاجات الصعبة عشان تسال فيها والمعيد ممكن يشرح الحاجات اللى لقى الاسئلة فيها كتير عشان يبقى فى تفاعل وتقييم للطلاب مش يبقى زيد زى عبيد
وفى طلبة بتبقى جاية وحلت الشيت ةمش عايزة تسمع الحاجات اللى غهمتها تانى ويبقى السكشن ممل ليه بس للاسف بيبقو قليلين

موضوع جميل جدا وكويس انك طرحته للنقاش يا بشمهندس الحبار اما بالنسبة لرأيى فى شرح المعيد فى السكشن فهو لازم وضرورى لان فى غالب الاوقات بتكون المادة صعبة وفيه كمان غموض ومحتاجة لشرح المعيد ذو الخبرة ....

وشكرا

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ شكر وتقدير

أنا من رايي أني صح فى ناس كتيير تستاهل أن المعيد ما يشرحش في السكشن وده فى حالة ان الطالب يستهتر بالمحاضره او بشرح الدكتور أتكالا على السكشن أو أنه يطنش المحاضره من اساسه لا سباب فعلا تعيظ أى معيد او دكتورمثل
ربما تكون الاسباب واحد من دول
1- الاحساس بانه مش هيستفيد من المحاضرة او بالنسباله مش محاضرة مهمه
2-انه ممكن يكون لاقى بنت يقف يتكلم معاها يقضى وقته يعنى
3- يكون اتأخر على المحاضرة فانكسف يدخلها
4-استهتار بقيمه العلم
5- انه طالب مش لازماه دراسه وكدة كدة هينجح وبس
بصراحه كلها أسباب تخلى أي معيد حتى لو كان في الاساس بيشرح من نفسه أنه يتخذ اجراء التهديد بعدم الشرح لكن لابد أنهم يعرفوا ربما يكونوا كذلك قله من الطلاب لماذا يعاقب الكل بذنب طالب أو طالبين في السكشن

لكن في نفس الوقت برده في طلبه عندهم حق في أنهم ما يحضروش الحاضره وينتظروا السكشن أو يحضروها وميفهموش منها حاجه

وانا فى رأيي لو الدكتور جيد فى الألقاء و قادر على توصيل المعلومه والطلاب بتفهم منه أتحدى اى اى طالب كويس هيفوت المحاضره و هتلاقى الطلاب نفسهم منظمين و أتجمعوا بدرى و كل شئ تمام
وممكن تلاقى دكتور عنده علم فظيع يعنى ما شاء الله عالم فى مجاله و لما تلقيه بيلقى المحاضره للطلاب بيتكلم على اساس ان اللى ادامه دول مش طلاب لا دكاتره زيه
هو مفكر كده
وعارفه له طالب قال يا دكتور مش فاهم
تلاقى الدكتور بيبص بأستغراب كده للطلاب
كفايه البصه دى
تحسس الطالب انه معوق ذهنيا
والدكتور ممكن يكون مفكر كده بردوا
ولو دققنا النظر هنلاقى اسباب كتيير وكتيير تجعل الطلاب عدوهم الاول المحاضره وبعديين يستكتروا المعيدين علينا الشرح في السكاشن بسبب أن في قله مش من الطلاب فى السكشن مستهترين

ربما اكون خرجت عن نطاق الموضوع قليلا ولكن الكل يدور فى ساقيه واحده

اقتباس :: المحاضرات والسكاشن
هل هي حق للطالب أم منة من الدكاترة والمعيدين
هل من حقنا ان ناخذ محاضرات وسكاشن ام هي تفضل علينا

اظن ان هذا موضوع مختلف تماما عن موضوع شرح المعاون فى حصص التدريبات و التمرينات العملية (يمكن تتفهم احسن بالعربى)

و لى رجاء الا ترهق نفسك بالتفكير فى مسئوليات الدكتور و المعيد.

بلا شك هناك اوجه قصور فى اداء الكل و لكن عليك نفسك ...احضر ..ذاكر و بعد ذلك ستجد باب الدكتور و المعاون مفتوح لك.

بعض الاسئلة التى تظن انها لعدم الفهم قد تثير احباطا عند المدرس او تتسبب فى ضياع وقت طلاب اخرين فلا تأخذ موضوع نظرة المدرس بحساسية

انا رأيى انه اذا كان الطالب لازم يكون محضر عشان يدخل السكشن يبقى معنى الكلام ده ان الطالب فهم المحاضرة بنسبة كبيره تتعدى 70% يبقى هو كده ايه لازمة السكشن انا رأيى ان السكاشن ما يبقاش فيها غياب او ان الغياب فيها تكون الدرجات بتاعته اوفر ويتلغى موضوع الحرمان من الامتحان ويبقى السكشن مدته اطول وكده هيحضر اللى محتاج السكشن ضرورى والمعيد يشرح بس مش شرح مفسر اوى زى الدكتور لكن شرح ملخص يعنى اللى مذاكر هيفتكر اللى ذاكره واللى ما ذاكرش على الاقل هيعرف احنا بنحكى فى ايه واللى ما حضرش المحاضرة هيعرف احنا بنتكلم فى ايه ونبدأ بعد كده نحل الشيت عشان اللى عنده سؤال يسأل واللى حالل الشيت ومخلصه ومش محتاج السكشن ما يجيش ما هو الغياب اوفر واللى منفض للمحاضرة طبيعى لو حضر السكشن ده اذا حضر مش هيفهم واللى مش محتاج السكشن لقدرته العاليه فى الفهم فى المحاضرة وحل الشيت بمفرده لو حضر السكشن هيبقى لتثبيت المعلومات اكتر وهيتفاعل مع المعيد اكتر والمعيد هيديله درجات اوفر وكفايه اوى ان المعيد هيحترمه ويعرف انه شاطر وهيبقى كسب حب المعيد بس ياريت ياريت المعيد يتعامل معانا بدون حواجز ويعاملنا زى اخواته لانه مر بنفس المرحله اللى احنا فيها فى نفس المكان واكيد احتاج ان المعيد اللى كان بيشرحله يكون زى اخوه بس بشرط ان الطالب يعرف انه طالب وان المعيد معيد يعنى ما يستنطعش عليه وما يستخفش دمه وده اللى بنشوفه فى السكاشن لما المعيد بيعامل الناس كويس واتمنى برضه ان حد من الكاتره او المعيدين يرد عليا ويقولى رأيه ويقولى اذا كنت انا صح ولا غلط وفى النهايه احنا كلنا اسرة واحدة مع بعض

السلام عليكم ورحمة الله وبركاتة

سوف اعرب عن وجهة نظرى فى النقاط التالية

1- لقد اجاب بعض الزملاء والاساتذة على موضوع الوجهة القانونية من شرح المعيد فى السكشن.

2- المشكلة الحقيقية ان بعض الطلاب غير مستوعبين انهم فى المرحلة الجامعية وهناك فرق كبير بين مرحلة التعليم حتى الثانوية العامة والتعليم الجامعى.

3- لابد ان يعى الطالب انة فى هذة المرحلة لابد ان يعتمد بشكل كبير على نفسة وبيذل مافى وسعة لتحصيل المحاضرات ومحاولة فهم المادة العلمية والسؤال فى المحاضرة او فى السكشن عن النقاط الغير مفهومة

4- يعتمد الطلاب الان على ان يدخل المعيد السكشن ويشرح المسائل بالارقام ثم يقوم هو بحفظ هذا الشرح لسردة فى الامتحان لذلك تحول الطالب الى جهاز تسجيل يقوم بستجيل الكلام بدون استعابة ثم سردة فى الامتحان

5- اصبحت الامتحانات تقيس مستوى الحفظ للطالب والاسوء من ذلك انها مكررة حيث يستوى فيها الطالب المجد والطالب الحافظ مجموعة من الامتحانات

6- لو تخيلت انك مررت بجوار بئر قد سقط بة احد الاشخاص فانك تحاول ان تساعد هذا الشخص فى الخروج من البئر لكن لابد ان يستغيث بك الشخص فى البداية لتعرف ان هناك شخص فى البئر ويقوم هذا الشخص برفع يده لكى تاخذ بيده او يحاول ان يمسك الحبل. لو طبقت هذا المثل على الطلاب تجد انهم لايحاولون الخروج من البئر وعندما تقول لهم " في حد مش فاهم حاجة" لا تجد من يجيبك وبعد الحاح يقولوا فاهمين.

7- اندثرت فكرة العمل الجماعى بين الطلبة واصبحوا يحبون العمل الجماعى فى الامتحانات.

8- بالنسبة الى الاخ الذى اسرد انة "ولو كل مسؤول فى الكلية من دكتور او معيد حس وشعر بالعذاب اللى بيكون فيه الاهلوالحزن الشديد اللى بيحصل لو لا قدر الله حد من ابنائهم نزل فى مادة بغض النظر عنسبب النزول ده اكيد هيراجع نفسه" اقول له لو فكرت انت فى اهلك اولاً واجتهد وعرفت كم من المعاناه التى يتحملها الاب او رب الاسرة فى توفير لك احتياجاتك اثناء الدراسة لذاكرتم اناء الليل الى اطراف النهار.

9- موضوع الحلال والحرام دة شئ بين العبد وربه ولا احد يستطيع ان يعرف ما بين العبد وربه. واعلم انة كل الميعدين يسعون جاهدين على ان تكون مرتباتهم حلال. وكم اتتهم عروض للعمل خارج الجامعة بمرتبات اضعاف اضعاف ما ياخذونه لاكنهم رفضو ذلك واستمرو فى العمل بالجامعة.

10- لقد لاحظنا من خلال ردود الاخوة الطلاب ان كل منهم له موقف شخصي مع احد السادة المعيدين حكم من خلاله علي جميع المعيدين وهذا تفكير خاطئ من الطلاب .

11- وقد لاحظنا ايضا تدني اسلوب الحوار في المنتدي حيث تحتوي الردود علي تعبيرات غير لائقة ادبيا لذلك نرجو من الساده المشتركين اعضاء المنتدي تعلم اسلوب الحوار قبل الدخول في مناقشات تمس الجميع.

12- نلوم علي السادة المشرفين علي الحوار العام عدم مراقبتهم لردود الاعضاء وعدم التنبية علي الاعضاء بتعديل اسلوب الحوار ومراعاة اسلوب الحوار.

لذا قررنا نحن عدم المشاركة في المنتدي حتي يتم الترقي في مستوي الحوار:

1. م-عصام خلف الله علي .

2. م-أشرف طلعت محمد.

3. م-حماده أحمد حماده.

وقرر المهندس –هاني صابر

الانسحاب النهائي من المنتدي

أولا أحب أن أشكر الساده أعضاء هيئة التدريس على قبولهم الحوار والنقاش وإبداء
الرأى والرأى الآخر وهذا شىء أفخر به شخصيا وأعتز بممارسته فى المنتدى.
ثانيا أعتذر بشده لأننى فتحت هذا الموضوع الشائك الذى أثار ضجة ونتائج غير محموده
وغير مرجوه بالمره وتفسد ما بدأناه وبنايناه منذ أكثر تسعة أشهر.
ثالثا أخوتى المهندسون "المهندس عصام والمهندس أشرف والمهندس حماده"
أنتم أشخاص ليست بالهينه سواء بالمنتدى أو بالكليه فأنتم أشخاصا يسمع لكلامهم
ويأخذ برأيهم فكيف تأخذون على وجهات نظر خاطئه أو فرديه فواجب على المناظرات
والمحاجات أن يكون هناك عرض للحجج والبراهين ومن الطبيعى أن يظهر الحق
ويضحض الباطل فأنتم ذوى وجهات نظر سديده والطلبه ذو وجهات أقل قوه وذلك
لفارق السن والدرجه العلميه فشتان بين ذاك وذلك.
رابعا لا مكان للكمال فى دنيانا تلك فالكمال لله وحده وليس هذا يعنى أن نترك المخطىء ولا
نردعه بالعكس واجب أن نسن قوانين ونطبقها حتى لا يجور منا أحدا على أحد ويحصل كل
ذى حق على حقه ولكن واجب علينا أن نقوم المخطىء ونعلمه كيف يكون أصح ونعلمه كيف يفكر ويتعامل
ويتجاوب مع الآخرين أو بمعنى أصح نعلمه كيف يصبح مهندسا بمعنى الكلمه فعندما تنسحبون
أنتم وأخرون أيضا فهذا يعنى غياب القدوه الحسنه والمثل والحافز الذى يقود الطلبه
إلى النجاح والعمل والمثابره وإتقان مع هو واجب ومفروض.
خامسا:بخصوص المهندس هانى صابر فلنا هنا وقفه أى قرار هذا أخى فى الله الذى يدعوك للإنسحاب النهائى!!
لقد قيل فى الطب "آخر الدواء الكى" وأنت قد كويتنى شخصيا بهذا القرار ولم تأخذ فى الإعتبار أنك جزءا
لا يتجزأ من المنتدى فأنت كسورة الفاتحه بالصلاه فلا تجوز الصلاه بلا فاتحه فإسمح لى أخى فى الله
أنا أقول لك وبكل أخوه وحب إستقالتك عن منتدانا مرفوضه رفضا باتا فأنت المهندس هانى
وأنا الحبار هانى أيضا ولا يبتعد هانى عن هانى ما دامت تشرق على أرضنا شمس الدنيا ومادمت أنا أحيا
على هذا الكوكب فاسمحلى بألا أقبل تلك الإستقاله جزاك الله خيرا.
سادسا:كل ما دار محض أفكار دارت فى أذهان الأخوه الطلبه واجب أنا نعرف إلى أى مدى هم يفكرون
ويتحدثون ويتسلسلون بمنطقهم فإذا لم نسمع لهم وحذرناهم وكبتنا ما بهم ما بال المنتدى سيصبح ليس للأفكار
بل للقرارت فقط ويمكنهم أيضا المداهنه وقول ما هو غير صحيح وأعتقد أنه لا يوجد أحد منكم يقبل بذلك
فقول الحق حتى ولو كان صعب أطعم بكثير من غيره حتى ولو كان جميلا لذلك يجب أن نعلمهم
الشىء الصحيح ونلغى من قواميسهم كل عبارات الإتكال والخطأ.

أخيرا أعتذر من الجميع بشده فأرجو أن تتقبلوا إعتذارى المتواضع فأنا من جلبت هذه المشكله وأنا من فتحت
الموضوع فليتنى لم أفتحه حتى لا أحرم منكم أخوتى المهندسين ولينضم إليكم المهندس هانى فى فترة التوقف
عن المشاركه ولتكن لمدة ثلاثة أيام كالحداد "وهى كعقاب شخصى لى أولا وللمنتدى بعد ذلك" وبإذن الله أوعدكم بأن تشدد الرقابه فى قسم الحوار العام بالذات فهو واجهتنا أمام الدنيا كلها والكليه وأريد أن أسبب عذرى ذلك بأننى أعمل تلك الأيام كالأخطبوط بجميع الأزرع والإمكانيات وأصول وأجول فى كل مكان فالتمسوا لى العذر من السبعين عذر كما قال الحديث الشريف فيما معناه

والله الموفق لنا ولكم

انا اضم صوتى لصوت الحبار

وأعتذر عن أى كلام صدر من أى عضو بالمنتدى أو عنى شخصيا لأن فعلا أطرقنا لمواضيع وتركنا الفرصه لم لا يملك الا الجعجعه التى لا فائده منها بس المهم أن النيه كانت خير فقط

وأرجو من الساده أعضاء هيئه التدريس قبول اعتذارى

المشرف العام/
القبطان

السلام عليكم
أعتقد ان الموضوع المطروح امامنا الأن موضوع صعب كان لا يجب فتح الحديث فيه أصلا وانا ارى ان بعض الساده المشاركين فى الموضوع قد خانهم التعبير عن كلامهم عن الموضوع والمطلوب منهم ان يعدلوا اراهم فورا او قصدهم من هذه الكلمات وخاصة "أحمد سيد" ومن سبقه فى الحديث وان ينتقوا كلماتهم بوضوح و يعبروا عن أراءهم بسلاسة و دقه.
أما بالنسبه للمهندس عصام فانا متفق معه فى كل أراءه الخاصة بالموضوع و لكنى أختلف معه فى الأنسحاب المؤقت مع بعض الزملاء "معذرة يا باشمهندس" فلن نهدم ما بنى فى شهور عدة من أجل بعض التعبيرات التى جانبها الصواب او بعض الناس التى خانها التعبير فلابد ان نوضح الفكره السليمه و نصحح مفاهيم الطلاب كان هذا هدفنا فى البدايه اليس كذلك؟ فنحن تحمل مسئولية كبيره نحو هذا المنتدى فلا يجب ان نتخلى عنه "يا باشمهندس هانى" ويجب ان نتحمل بعض الإختلاف والأنتقادات وبعد ذلك يجب ان صححها. ارجو الا ياخذ الموضوع أكبر من حجمه.

الاسف كل الاسف والعذر لكل من قال رأيه بطريقة غير مهذبة وغير لائقة بأن تقال فى هذا المنتدى المحترم وانا اعتذر انا وزملائى فى المنتدى وانا اولهم عن كل الاخطاء اللى وقعنا فيها واحنا بنرد على هذا الموضوع وباعتذر لكل المعيدين اللذين امتنعوا عن الاشتراك فى هذا المنتدى واعتذر للمهندس عصام واقوله نحن متأسفين جدا ونرجوا انك ما تزعلش منا ونرجوا عودتك سريعا للمنتدى واتمنى ان يعود المهندس هانى للمنتدى واكرر الاعتذار مرة اخرى انا وزملائى

الحوار الايجابى افضل من الاعراض

دورك كمعيد او مدرس مساعد المشاركة فى تعليم و تأديب اخوتك الصغار فلا تنسحب

و للادراة برجاء حذف اى كلمة غير لائقة او اتهام غير مبرر و الابقاء على باقى المداخلة للحفاظ على سياق الردود

و لكل الطلاب الذين يرون تقصيرا غير مبرر من الاخوة المعاونين فى السكاشن عليهم بابلاغ مدرس المادة اثناء المحاضرة ثم ابلاغ رئيس القسم

موقف فعلى :

بعض سكاشن اعدادى العام الماضى مع م/ محمود على و م/ حاتم -و يعلم الله كم هما غاليان على قلبى -
تم الغاء السكاشن لعذر قهرى -اتذكر انه حضور دورات تنمية القدرات-

و فى المحاضرة التالية كان السؤال التقليدى

اخدتوا ايه فى الاسبوع الماضى فى السكشن

و كان الجواب مفيش سكشن

الحل :
تم تعويض السكشن بمواعيد اضافية بتراضى وود من المدرسين و الطلاب

حد عنده مشكلة فى حاسب اعدادى ؟ ^-^

فعلا لازم ادارة المنتدى تراجع كل الردود اللى بتتقال ويتحذف الرد الغير لائق بالكامل عشان ما يحصلش التصادم اللى حصل ده وانا باعتذر عن نفسى عن اى رد سيء قمت به وانا الان فى ندم واتمنى لو ان ادارة المنتدى قامت بمراجعة الردود حتى لا يحدث ما حدث واعتذر لكل المعيدين والدكاتره فى هذا المنتدى وارجوا انهم ما يزعلوش منا احنا برضه زى اخواتهم وولادهم

أولا تحية كبيرة جدا لكل من شارك في الموضوع و خاصة المهندس عصام و المهندس حاتم و الدكتور محمود ........
ثانيا من حيث السؤال المطروح للمناقشة فأنا أرى أن الدافع الأول للغالبية العظمى للطلبة من حضور السكاشن هو الغياب فقط لا غير ........
أذا فالمشكلة ليس في هل من الواجب الشرح أم لا ..؟؟ و لكن الدور الأساسي في توعية الطلاب بمدى أهمية حضور السكاشن و الأستفادة منها ....
و لكن هناك مشكلة أخرى و هي أن من يحضر السكشن يريد أن يرمي كل الحمل على المعيد من حيث توضيح المعلومة و لا يكون عند الطالب أي استعداد لمساعدة نفسة أو التعب في فهم المحاضرة بنفسه .... وهذا الموضوع بيؤثر تأثير قوي جدا على زملاؤه الحضرين من حيث أنه بيضيع وقت السكشن في تساؤلات سطحية و لا يعطي الفرصة لغيره من الزملاء في مناقشة النقاط الغير واضحة من المحاضرة ....
لذا فأنني من هذا الرد أود أن أوجه النصيحة لكل طالب قبل أن تحضر السكشن حاول فعل الآتي:
1- قراءة المحاضرة و فهما فهما جيدا و ترك ما قد يصعب عليك فهمه للمناقشة في السكشن
2-محاولة قراءة الشيت و حله حتى لو بمجرد النظر و التعليم على ما قد يصعب من المسائل أو الأسئلة المعطاه في الشيت
3-حاول أن تساعد نفسك علشان تلاقي المساعدة من الآخرين
لأن بصراحة أنت كطالب حط نفسك مكان المعيد و حاول أنك تشرح الموضوع لطلبة مش معاك من البداية و هاتصبح أنت في وادي و الطلبة في وادي تاني وطبعا ماحدش هايفهم حاجة
و أكيد طبعا لا يمكن تلخيص شرح أربع ساعات في المحاضرة في ساعتين في السكشن
و أذا كان في حد مش عارف يذاكر المحاضرة الزاي تبقى دي مشكلة أخرى و محتاجة علاج فوري و سريع علشان مايتدهورش الحال بيه للأسوء من ذلك
و في النهاية أحب أن أشكر جميع أعضاء هيئة التدريس و المعيدين على مجهودهم المبذول و مشاركتهم لنا في هذا الموضوع الذي يوضح مدى اضمحلال عقليات الطلبة الذين هم من المفروض أن يكونوا مهندسين الغد والله الموفق.......... طارق عادل

عاهدت نفسي ألا أتحدث في هذا الموضوع مرة أخرى، وآسف اني اتكلمت أساسًا
لكن تعقيبي هنا غرضه الاعتذار
بدا لي ان اعضاء هيئة التدريس لم يتفهموا وجهة نظرى
لذا أرجو المعذرة
بالتأكيد لم أقصد سوءًا بالمرة
وحاشا لله أن يكون ذلك مني من قبيل التهكم أو عدم الاحترام
المهم..
عــذرًا
وشكرًا
...
بالمناسبة لم أتهم المعايير التي ذكرتها بالاهمال او عدم الاهتمام..
...
عذرًا للجميع
وتحياتي
احمد سيد

اولا:انا بشكر الحبار على هذا الموضوع الشائك الذى يشغل كل اذهان الطلبه فى كل الكليات وليس فى
كليتنا فقط
ثانيا:انا بعتذر لكل المعيدين عن الكلام الغير لائق من قبل بعض الطلاب ولكن اود التماس العر لهم فها الموضوع "جه على الوتر الحساس"يعنى من الممكنان يكو هذا الكلام غير مقصود به الاهانه قطعيا
ثالثا:انا رأى الشخصى فى هذا الموضوع انالحكايه كلها عباره عن مثلث بل ومتساوى الاضلاع يعنى:
الضلع الاول:الدكتور وشرحه فى المحاضره ويجب ان يكون على مقدره لتوصيل المعلومه للطلبه باى طريقه المهم ان المحاضره متنتهيش قبل ما يكون على الاقل70% من الطلبه فهموا المحاضره
الضلع الثانى:المعيد فنحن لا نطلب منه اعادة كل ما قيل فى المحاضره لان بالطريقه دى مش هيكون فى فرق بين المحاضره والسكشن ولكن المطلوب منه مجرد تلخيص عام لاهم نقاط المحاضره بما تحتويه من قوانين او رسومات او نقاط هامه...................إلخ ثم يقوم بحل بعض المسائل التى تقوم بتطبيق النظريه وماركة الطلاب فىذلك
الضلع الثالث:الطالب"الى دايما حاسس ان العيب مش فيه"فيجب على الطالب حضور المحاضره(وهذه النقطه تتوقف على مدى فاعلية الضلع الاول)ثم مذاكرتها فى وقتها وليس بعد تراكم عد كبير من المحاضرات فيصبح الموضو مستحيل ثم حضو السكشن ليس خوفا من درجة الغياب ولكن لعلمه ان السكشن سوف يكمل له ما تم عرضه فى المحاضره(وهذا يتوقف ايضا على فعالية الضلع الثانى)ثم يقوم بحل التمارين المتعلقه بالموضوع وتحديد التى لم يستوعبها ولكن بعد فعل كل ما سبق
ثم يأتى موعد المحاضره التاليه............
الضلع الاول:يقوم بالقاء سريع عما ذا كان هنا شئ غائب فى المحاضره السابقه مع جود تقبل وصدر رحب لسماع اسئلة الطلاب لان ليس كل الطلاب بمستوى احد فى الفهم فالذى يستوعبه طالب قد لايستوعبه الاخر وهكذا(وهذا يعتمد على مدى فاعلية الضلع الثالث) ثم شرح المحاضره الجديده
الضلع الثانى:يقوم بتابعة الطلاب فيما تم حله من التمارين وتصحيح الاخطاء الموجوده ثم البدء فى السكشن بنفس الطريقه
الضلع الثالث:يقوم باعدة نفس الكره مره اخرى
كما نلاحظ فان كل ضلع من اضلاع المثلث معتمده بشكل كامل على الضلعين الاخرين اى قو اى ضلع او التقصير فيه يؤدى الى انهيار المثلث وبالتالى عدم الحصول على النتيجه المتوقعه وهى النجاح طبعا
اخوتى فى الله..اساذتى ومعيدينى وزملائى الطلبه ارجو الا اكون خرجت عن حدود الموضوع المطروح او الخروج عن حدود الادب والطريقه الائقه فى الحديث وارجو ان لا يتم القاء اللوم على كاهل ضلع من الاضلاع دون الاخرين
وفقكم الله

» هل يحق للاخوة المعيدين التأخر عن ميعاد السكشن ويحرم علينا ذلك ولو لظروف؟
» المعيد
» السيكشن(المعيد والطالب)
» المفروض انهم ....مسلمين...تعالوا اتفرجوا....والله بتحصل..
» اكتب اسمك تطلعلك وظيفتك الى المفروض تكون فيها غير مهندس...شد