قول إنطباعك بعد كل إمتحان وكل عام أنتم بخير.

تذكير بمساهمة فاتح الموضوع :

غدا-الأربعاء الموافق 14/5/2008 سيبدأ بإذن الله ماراثون إمتحانات نهاية العام لدفعات الفرقه الثالثه كهرباء وذلك
بكلية هندسة أسوان وتتوالى بقية الدفعات من يوم السبت الموافق 17/5/2008 الإمتحانات وستستمر لما يقارب من الشهر إن شاء الله ونرجو من الله أن تمر هذه الأيام بردا وسلاما علينا وبالتوفيق والنجاح لجميع الطلبه.

أما بخصوص ما سيحدث إن شاء الله من إنطباعات متعدده لدى الطلاب سواء صعوبه او سهوله أو أى مشاكل فى الامتحانات لا قدر الله أرجو من كل الطلبة بجميع الفرق الدخول والكتابه عنها هنا فى هذا الموضوع ولنناقش كل شىء بهدوء ويسر والله الموفق لنا ولكم وكل عام أنتم بخير.

انا بدخل كل يوم اطمن عليكم والله جد وبشوف ردودكم واقعد اضحك

طبعا العبد لله كان محترف شيل نظرية انشاءات ( اولى - تانية ) ولو كان في تاني كنت شيلته
ومرة كمان جبت تخيلوا 1/120 عارفين الواحد دا ليه عشان كتبت اسمي بس
وكتبت الاسئلة تاني
وكان عندي كرتونة كل سنه كل ما تخلص اي مادة ارمي كتبها فيها وطبعا لو شلت اي مادة ارجع واطلع كتبها تاني

طبعا بعد الشر عليكم كلكم

انا عايز أطلعكم من المود بس

ربنا معانا جميعا
وشدوا حيلكم يا اعدادي
هي الرياضة كتيرة شوية
بس التصحيح فيها بيكون جميل جدااااااااااا
بس اهم حاجة تحلوا كل الامتحان
وما تسيبوش حاجة فيه

YAMEN كتب:: طبعا العبد لله كان محترف شيل نظرية انشاءات ( اولى - تانية ) ولو كان في تاني كنت شيلته
ومرة كمان جبت تخيلوا 1/120 عارفين الواحد دا ليه عشان كتبت اسمي بس
وكتبت الاسئلة تاني
وكان عندي كرتونة كل سنه كل ما تخلص اي مادة ارمي كتبها فيها وطبعا لو شلت اي مادة ارجع واطلع كتبها تاني

طبعا بعد الشر عليكم كلكم

انا عايز أطلعكم من المود بس

اظاهر انى خليفتك في الملاعب يا بشمهندس يامن بيبكى

الحمد لله امتحان الامداد النهاردة كان كويس وعقبال الري والخرسانة

من الواضح ان امتحان الماشين كان هوه الامتحان الوحيد اللى صعب فى الكلية كلها

انا مش عارف هوه الامتحان كان عامل ليه كده

ربنا يستر ان شاء الله و يعدى السنة دى على خير ان شاء الله

اليوم كان إمتحانات نظرية الإتصالات الرقمية
كالعادة المفروض كنا نحفظ حاجات حددها الدكتور
وجاب منها في الإمتحان
بس أنا محفتظش كويس

خالد بداية كتب:: اليوم كان إمتحانات نظرية الإتصالات الرقمية لا تعليق

النهارده كان امتحان تطبيقات الحاسب فى مجال الهندسه المدنيه
كان بيبكى

لا حول ولا قوة الا بالله

بركاتك يا terminator

قلت واضح ان امتحان الماشين كان أصعب امتحان

اتفضل امتحاننا وامتحان خالد بداية و هبة
كلمتك مش بتنزززززززل الأرض

YeHi@$MmZ كتب:: لا حول ولا قوة الا بالله

بركاتك يا terminator

قلت واضح ان امتحان الماشين كان أصعب امتحان

اتفضل امتحاننا وامتحان خالد بداية و هبة
كلمتك مش بتنزززززززل الأرض

ما احنا وبلا فخر دايما البدااااااااية
يعني احنا اللي ابتدينا المواد الصعبة
وبعدين الفرق اننا دي كانت اول مادة عندنا
بيبكى

انتو علي الاقل فرحتوا بمادة حليتوا فيها حلو
اما لما تبقي اول مادة وتعمل اللي احنا عملناه فيها
الواحد ساعتها بيبقي مش عايز يكمل الامتحانات اصلا
وربنا يستر علي بكررررررررة

أنا أول واحد هايتكلم عن إمتحانات رابعة حاسبات .....
أول مادة كانت التحكم الرقمي Digital Control و بصراحة الإمتحان كان غير معرف ... يعني ما تعرفش هل هو سهل و للا صعب .... بس الحمد لله حلينا لكن مش عارفين هل اللي حليناه صح و للا غلط..... بس الحاجة الوحيدة اللي فاكرها عن الإمتحان إن رقة الأسئلة كانت شبه صفحة الوفيات في جريدة الأهرام .... كلها سوووووووووووودة و حبر تقيل كمان ...

المادة التانية كانت إختبارات كهربية TEST و كان الإمتحان سهل جدا جدا جدا لأن كان عبارة عن نفس الأسألة اللي جاتلينا في المقابلة العملي ....

المادة التالتة برمجة نظم الحاسب Operating System بصراحة الإمتحان كانت عبارة عن كوكتيل من السهولة و الصعوبة و الأسألة الحلوة و الرخمة .... كل ده في ورقة واحدة ... و الحمد لله عدى على خير و ربنا يستر في التصحيح .....
يا رب

اقتباس :: إن ورقة الأسئلة كانت شبه صفحة الوفيات في جريدة الأهرام .... كلها سوووووووووووودة و حبر تقيل كمان ...

اقتباس :

أكييييييييييييييييييد
غمزه

</FONT>

جات الحزينة من المتريال تفرح مالقتلهاش في الاستكرشر مطرح حقنه

امتحان نظرية انشاءت 2 انهرده بحلقه

كان امتحاااااااااان عجيب لا عارف هو سهل ولا صعب منذهل

ولا هو امتحان بتاعنا ولا بتاع الناس التنين السؤال الاول غرررررررررريب جدا Study

المشكله ان لاقيت اول مساله مفهاش ولا رقم قولت افرضه من عندي جه الدكتور وقال اعمله باحساسك انتا المشكله انى معنديش دم وبالتالى معنديش احساس بص خبطت في السؤال وانا والله اعلم مش عارف هو صح ولا غلط والتانى اهوه كان عبارة عن جميع ماتم تدريسة في الاستركشر منذ ان كنت في اولى ابتدائي حتى وقت تسلم ورقة الامتحان اما السؤال الثالث بقي فالحمد لله كان حاجة من ضمن اللى احنا عارفينة والحمد لله عدى اما الاخير بقي عبارة عن حملين بيجروا ورا بعض وانا نفسي مقطوع اساسا من طلعة لغاية دور قسم عمارة الدنيا حر

واساسا الجزيئة دي لفينا على كدل الدفعه عشان حد يفهمه لنا مفيش المهم الفت فيها شوية وطلع التأليف صح ياعنى ااهوه نص العمى ولا العمى كله المهم ربنا يستر
المادة الجاية بقي اقتصاد هندسي ان كنت اعرف في تظرية الانشاءت عنواين فالاقتصاد لا اعرفه الا اسم المادة فقط عيان

بشمهندس يااااااااااااااااااااااااامن خليفتك في نظرية الانشاءت اصبح له وجود ياصاااااااااااااااح بيبكى

حلو اعمله باحساسك دةة
يا جودز انت أبو الأحاسيييييس

ليه ياعم ماعندكش احساس تلاقيك خلصتة في قسم الحب

عزيزي جودز معلش وحصل خير المهم انتبه للمواد اللي جاييه

وربنا يوفق الجميع

رغم اني ماشاركتش في الموضوع ده قبل كده , الا اني مصر اني اشارك المرة دي

امبارح كان عندنا امتحان " نظرية الاتصالات الرقمية " , اولا المادة لذيذة جدا , بس للاسف احنا يعتبر ما اخدناش المادة لان المحاضرات كانت قليلة جدا بجانب ان المستوي العلمي للمحاضرة كان ضعيف . فبالتالي ماحدش كان فاهم حاجة في المادة , وماحدش حاول انه يفهم لان الامتحان كان هيجي من مجموعة مسائل متحددة , فكان رأي الناس انهم ليه يوجعوا دماغهم في المذاكرة , اللي حصل ان كل الناس ليلة الامتحان مسكو الحلول بتاعة المسائل وقعدوا يحفظوا يحفظوا وكل واحد بقي وشطارته في الحفظ

العبد لله بقي مالوش في الحفظ ولازم يفهم قبل مايحفظ , تقدروا تقولوا اني عتيق حبتين , المهم قعدت دماغي تعصلج ومش راضية تحفظ وتقول لا الحفظ مش مبدئي , وانا اضغط عليها لغاية ما لانت وابتدت المعلومات الغزيرة الغير مفهومة المحفوظة تثبت في دماغي

وكانت النتيجة هيه امتحان يقيس قدرات الطالب في الحفظ ليس الا , وطبعا لا يخفي عليكم اني بما اني مش حفيظ فبالتالي نيلت وكل حاجة دخلت في بعضها معايا

الف مبروك للي عرفوا يحفظوا تمام

النهارده جت اللحظه اللى كنا مستنينها من سبعتلاف سنه ويا ريتها ما جت!!!!
وكأن عبثى بتوقيعى عاقبنى

اقتباس :: عندما تعشق الألم
وعندما تعشق الحيره
وتنشد اليأس وتتجرعه
يمكنك حل الStructures

جاء اليوم إمتحان مادة الأستركشر كالسيل الهادر وكسهم إنطلق من جعبة رامى!!!
بمجرد النظر إليه وللوهلة الأولى تجد محصلة ما تعرفه صفر يضىء الأرض نورا!!
وجاء المدد بتفسير الألغاز وتم تفسيرها بألغاز أخرى!!!!
السؤال الأول تنبأ أشكال المومنت والشير والنورمال وأرسمهم!!!!
أعتقد إنى زمن التنبؤ والتخرصات والأكاذيب والأقاويل وقراءة الكف والفنجان قد إنتهت!!!
وكذب المنجمون ولو صدفوا!!
وعندما ضاقت بنا الدنيا تم تبسيط السؤال إلى إرسم تلك الحركات ولكن بإحساسك!!!!
يا ربى أين هذا الإحساس فقد تصفى دمى وإنحرقت أعصابى وإلتوى لسانى وأصبحت عاجز
عن الحركه وفقدت جميع المشاعر وأصبحت كأعجاز نخل خاويه!!!!
للأسف فقدنا الكثير والكثير من الدرجات اليوم ولا أمل فى النجاح إلا بدعوات تمانين مليون مصرى!!!
لذلك أقولها بكل صدق وحب وعرفان بالجميل

Structures In Bag!!!!!

والله الموفق

امتحان الـ Test
انا قولت اسيب حد غيري يقول الامتحان كان ظروفه ايه
لاني بصراحة ما حلتش حلو فيه
بس لاقيت ما حدش قال رأيه
يبقي خلاص اقول انا وخلاص
بيضحك

هو الامتحان مقسوم اتنين .. نص ماشين ونص ديجيتال
الماشين سؤالين السؤال الاول رسومات وكان سهل واعتقد اغلبية الدفعة ضمناه
السؤال التاني ده انا ضايع عندي
بس هو الصراحة سهل .. لانه مثال في الكتاب
بس انا سمعت من الناس انهم كانوا مستغربين المطاليب اللي بعد كده
انا بقي الحمد لله ما وصلتش للمطاليب دي عشان استغرب ضحك ببكا

نيجي بقي لنص الديجيتال
كان اربع اسئلة واول سؤالين كل واحد متكون من تلات جزئيات
نوعا ما كانت الاسئلة حلوة
واخر سؤال كان مكرر .. وليلة الامتحان كنت بسأل علي جزئية فيه
وما حدش كان عارفها .. وسألت كتييييير ودورت في النت وما لقيتهاش
وفي الاخر لاقيتها في الامتحان غضبان

الخلااااااااااصة
تقريبا كل الدفعة مبسوطة
الا انــــــــــا

عشان انتوا في جو امتحانات وانا شايف اضافة لحر الصيف والامتحانات احر

والبكاء والعويل والسوووووووووويط
فكروتني بموقفين الاول ان كل يوم امتحانات كانت فيه عربية اسعاف بتيجي الكلية وللاسف كانت بتنقل طالبة
طبعا الف الف سلامة عالجميع
لكن انا حسيت ساعتها اننا في مخيم لاجئين او اننا في لبنان او الشيشان او فلسطين

والتاني ان يوم امتحان الاستراكشر بتاع تانيه
يومها اتلميت انا واتنين من اصحابنا اللي دماغهم ضاربة شوية
واتربعنا امام باب اللجنة بعد انتهاء الامتحان وخد عندك بقا
عارف الستات اللي بيأجروها عشان تعدد ( او توولول ) والله الكلام جه لوحده
صوتي يا انشراح دا اللي راح راح .......
صوتي يا عليه الامتحان مش ليا........
صوتي يا تفيدة المادة دي جديدة ......
صوتي يا احسان انا سقطت في الامتحان ....

وكان احد لنا مات وصراحة الدفعة كلها طلعناها من جو الامتحان والكل بدل ما كان بيبكي او يسوط قعد يضحك

وطبعا كعادتي كل عام عند دخولي كل امتحان كنت قبل ما اكتب اسمي كنت بسال احد الزملاء
( هوا اسم المادة ايه ؟؟؟؟؟؟ )
يا خراااااااااااااابي ترم كامل ومعرفش اسم المادة
طبعا لان المواد ليها اسم متعارف عليه فمثلا هندسة السكك الحديدة كنا بنسميها سكة
وهندسة المنشئات المعدنية كانت اسمها ستيل .
وخد عندك بقا يا سيد

انا اسف طولت عليكم لكن قلت اطلعكم شوية من جو الملل دا ويمكن اضحككم شوية لكن لو مضحكتش فمتخفش
فانت في هندسة اسوان .....

امتحان قواعد البيانات Data base

Comment

هو الواحد النهاردة كان رايح و بيقول انه
لو ماحلش النهاردة في الداتا بيز

مش حيحل تانى في أى امتحان

وفعلاً لا حلينا ولا حنحل تاااانى في امتحااان

يالا مش مشكلة بس الظاهر ان العيب في دفعتناا
وان فيه حد في الدفعة عمل حاجة غلط
ربنا بيحاسبنا عليهااا

شاكك فيك يا أمييير

edbs كتب:: امتحان قواعد البيانات Data base

Comment

ما تخافيش الوش ده بيحكي كل الامتحان
والعاقبة عندنا في المسرات
ربنا يسسسسستر

YeHi@$MmZ كتب:: بس الظاهر ان العيب في دفعتناا
وان فيه حد في الدفعة عمل حاجة غلط
ربنا بيحاسبنا عليهااا

شاكك فيك يا أمييير

وهو فين اميـــــــر
كان بيدخل اول واحد بعد اي امتحان
اوعي تكون عملت في نفسك حاجة
الدنيا مش مستاهلة
ده مجرد امتحان
عادي يعني
بيضحك2

ان لله وان لله راجعون
نتقلت الي رحمة الله مادة تصميم منشأت الري 3 مدني
العزاء بعد النتيجة جنب غرفة الحرس بيبكى

مع تحيات الدفعة المنحوسة مش كويس

» قول إنطباعك بعد كل إمتحان وكل عام أنتم بخير "يناير 2011"
» قول إنطباعك بعد كل إمتحان وكل عام أنتم بخير " يونيو 2010 "
» قول إنطباعك بعد كل إمتحان وكل عام أنتم بخير "يناير 2010"
» قول إنطباعك بعد كل إمتحان وكل عام أنتم بخير "يونيو 2009"
» كل عام و أنتم بخير